30 ناۋرىزدان باستاپ ءار قالادا ءبىر-ءبىر حقو دايىن قۇجاتتاردى بەرۋ ءۇشىن بىرىڭعاي تەرەزە رەتىندە جۇمىس ىستەيدى. مۇندا قازاقستاندىقتار ونلاين تۇردە كورسەتىلەتىن مەملەكەتتىك قىزمەتتەردىڭ دايىن ناتيجەسىن الا الادى. eGov پورتالىندا قىزمەت ناتيجەسى قاعاز تۇرىندە بەرىلەتىن 23 ءتۇرلى مەملەكەتتىك قىزمەت بار.
مامانداندىرىلعان حقو-دا دا دايىن قۇجاتتاردى بەرۋ تەرەزەلەرى عانا جۇمىس ىستەيدى, وندا اۆتوكولىگىن قايتا تىركەۋگە قويعان نەمەسە جۇرگىزۋشى كۋالىگىن ونلاين اۋىستىرعاندار دايىن قۇجاتتارى مەن مەملەكەتتىك تىركەۋ ءنومىرىن الا الادى. بىرنەشە مامانداندىرىلعان حقو-سى بار قالالاردا (الماتى, شىمكەنت) قۇجاتتاردى بەرۋ بويىنشا ءبىر مامانداندىرىلعان حقو بەلگىلەنگەن.
قىزمەت الۋشىلاردىڭ دايىن قۇجاتتارىن بەرۋ جۇمىسىنا «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ 400-گە جۋىق قىزمەتكەرى تارتىلعان. ولاردىڭ بارلىعى قورعانىس جانە دەزينفەكتسيا قۇرالدارىمەن جابدىقتالعان.
دايىن قۇجاتتاردى بەرۋ تەرەزەلەرىنىڭ جۇمىس كەستەسى: دۇيسەنبى-جۇما 9.00-دەن 17.00-گە دەيىن. سەنبى – ساعات 9.00-14.00 ارالىعى.
ايتا كەتەيىك, 21 ناۋرىزعا دەيىن حالىققا قىزمەت كورسەتۋ ورتالىقتارىنا ءوتىنىش تاپسىرعان ازاماتتار دايىن ناتيجەلەرىن 29 ناۋرىزعا دەيىن العاش جۇگىنگەن حقو-دان الا الادى.
