فرانتسياداعى قازاقستاندىقتاردىڭ نەگىزگى ساناتتارى – جوعارى وقۋ ورىنداردىڭ ستۋدەنتتەرى (171), سونىڭ ىشىندە «بولاشاق» جانە «اباي-ۆەرن» باعدارلامالارىمەن جانە جەكە باستامامەن وقىپ جۇرگەندەر, فرانتسۋز كومپانيالارى مەن حالىقارالىق ۇيىمداردىڭ قىزمەتكەرلەرى, جەرگىلىكتى ازاماتتار جانۇيالارىنىڭ مۇشەلەرى. پاريجدان بولەك وتانداستارىمىز ليون, ستراسبۋرگ, گرەنوبل, مونپەلە, ليلل جانە ت.ب. قالالاردا تۇرادى.
ەكى مەملەكەت اراسىنداعى تىكەلەي اۋە قاتىناسى توقتاتىلعاننان بەرى (6 ناۋرىزدان باستاپ) ەلشىلىك قازاقستانعا, نەگىزىنەن «بەلاۆيا» جانە «اەروفلوت» كومپانيالارىنىڭ رەيستەرىمەن, 50-دەن استام وتانداسىمىزدىڭ جانە باسقا دا ەلدەردەن ترانزيتپەن كەلە جاتقان بىرقاتار قازاقستاندىقتاردىڭ ەلگە ورالۋىنا جاردەمدەستى.
فرانتسيا ۇكىمەتى 12 ناۋرىزدا تۇرعىنداردىڭ جۇرۋىنە قاتال شەكتەۋلەردى ەنگىزگەنىنەن كەيىن ەلشىلىك وتانداستاردىڭ سۇراقتارىنا دەر كەزىندە جاۋاپ بەرۋ ماقساتىندا تاۋلىك بويى ىستەيتىن «جەدەل جەلى» اشىپ, الەۋمەتتىك جەلىلەردە اقپاراتتىق جانە تۇسىندىرمە جۇمىسىن كۇشەيتتى.
وتانعا ورالۋ نەمەسە فرانتسياداعى قازىرگى تۇرىپ جاتقان ورنىندا وقشاۋلانۋ تۋرالى شەشىمدى ءاربىر قازاقستاندىق جەكە ءوزى قابىلدايدى. دەگەنمەن, ديپلوماتتار جەكە تاۋەكەلدەرىن سالىستىرۋعا شاقىرادى. ەلگە قايتۋ جونىندە شەشىم قابىلدانعان جاعدايدا ديپلوماتتار شۇعىل وزگەرىپ جاتقان احۋالعا بەيىمدەلگەن مۇمكىندىكتەرىن ىزدەستىرۋدە كومەك كورسەتۋدە.
ەلشىلىك قىزمەتكەرلەرى فرانتسياداعى وتانداستار «ساناعىن» جۇرگىزۋىن جالعاستىرىپ, ولاردا تۋىنداپ جاتقان ماسەلەلەردى زەردەلەۋدە. وسى ورايدا اتالعان مەملەكەتتە ۋاقىتشا نەمەسە تۇرعىلىقتى تۇرىپ جاتقان بارلىق قازاقستان ازاماتتارىن كونسۋلدىق ەسەپكە تۇرۋعا شاقىرامىز. بۇل حالىقارالىق قاعيدا ءبىرىنشى كەزەكتە توتەنشە جاعدايلاردا قاۋىپسىزدىك شارالارىن قامتاماسىز ەتۋگە باعىتتالعان.
