وبلىستىق دەنساۋلىق ساقتاۋ باسقارماسىنىڭ باسشىسى جاقسىلىق ابدىسامەتوۆ سىرتتان كەلگەن ازاماتتاردى انىقتاپ, ولاردىڭ دەنساۋلىق جاعدايىن تەكسەرۋ باعىتىنداعى ماماندار ەڭبەگىن اتاپ ءوتتى. بىراق بۇل جۇمىس ناتيجەلى بولۋى ءۇشىن تۇرعىنداردىڭ دا كومەگى كەرەك.
- بىزدە كۇدىك تۋا قالعان جاعدايدا ادامداردى وقشاۋلاۋ ءۇشىن بارلىق جاعداي جاسالعان, قاجەتتى ءدارى-دارمەك قورى دا جەتكىلىكتى. بىراق سىرتتان كەلگەندەردى انىقتاۋ قيىندىق تۋعىزىپ وتىر. قازىر سىرتتا وقىپ جاتقان ستۋدەنتتەردىڭ بارلىعى تۇرعىلىقتى جەرىنە قايتارىلدى. ءبىزدىڭ وبلىس اۋماعىنا 8 مىڭداي ستۋدەنت كەلۋ كەرەك دەپ جوسپارلانعان. قازىر وسىلار تولىق انىقتالماي وتىر. ءوزىنىڭ, جاقىنىنىڭ اماندىعىن ويلاعان جان دارىگەرلەرگە حابارلاسۋى كەرەك. بۇل ىندەتپەن كۇرەستە بار مىندەتتى مەديتسينا ماماندارىنا ارتىپ قويۋعا بولمايدى, ونى تەك بىرىككەندە عانا جەڭەمىز, – دەدى باسقارما باسشىسى.
وبلىس بويىنشا تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى اليا ابدىقايىموۆا دا ايماقتا شەتەلدەردەن كەلگەن 87 ادام مەديتسينالىق باقىلاۋعا الىنعانىن ايتىپ ءوتتى.
بىراق سىرتتان كەلەتىن جەرگىلىكتى تۇرعىنداردىڭ, اسىرەسە, جاستاردىڭ اراسىندا مەكەن جايى تۋرالى جالعان ايتۋ دەرەكتەرى كەزدەسىپ قالادى.
قىزىلوردا وبلىسى
