قازاقستان • 27 ناۋرىز، 2020

جازىلعان جايدىڭ جالعاسى: كىتاپحاناشى مەن مەدبيكەنىڭ ماسەلەسىن كىم شەشەدى؟

69 رەتكورسەتىلدى

مەن 16 جاسىمنان بەرى مەكتەپتە ەڭبەك ەتىپ كەلەمىن. تاربيەشى، مەڭگەرۋشى، ۇستاز، كىتاپحاناشى ماماندىقتارىن جەتىك مەڭگەردىم دەسەم دە بولادى. اللا قالاسا، ەندىگى جىلى ەڭبەك ءوتىلىم 40 جىلعا تولادى. 

«Egemen Qazaqstan» گازەتىنىڭ 2020 جىلدىڭ 27 اقپانى كۇنگى №40  سانىندا جاريالانعان «ۇمىت قالعاندار كىمنەن قورقادى؟» اتتى ماقالا مەكتەپ كىتاپحاناشىلارىنىڭ ماسەلەسىن قوزعاپتى. كوتەرىلگەن ماسەلە وتە ورىندى، العىسىمىز شەكسىز. بىراق ءبىزدىڭ جانايقايىمىز تەك قاعاز بەتىندە عانا كوتەرىلمەي، تالقىلانىپ، ىسكە اسسا ەكەن دەيمىز. قانداي مامان يەسى بولماسىن، وزدەرى وسى بۇلاقتان سۋ ءىشىپ، ءوسىپ-ونگەنىن، قولىنا مەكتەپ كىتاپحاناسىنان كىتاپ العانىن، سول كىتاپتان ءبىلىم الىپ، وسىنداي دارەجەگە جەتىپ وتىرعانىن ۇمىتپاس. مەكتەپ كىتاپحاناسى – ۇلى ماماندىق. ەڭ كوپ قازىنا كىمدە دەسە، مەكتەپ كىتاپحاناشىسىندا دەپ ايتار ەدىم. مەكتەپ ديرەكتورىنان باستاپ، كىشكەنتاي وقىرمانداردىڭ جۇرەگىن جاۋلايتىن، ەشقاشان «جوق» دەمەيتىن،  ءبارىنىڭ كوڭىلىن، ءتىلىن تاباتىن، جانى باي، جايساڭ جاندار عانا بۇل ماماندىق يەسى بولا الادى. مەكتەپ كىتاپحاناشىسى دەگەنىمىز – اقىن، جازۋشى، ۇستاز، تاربيەشى، ادىسكەر، ءانشى، ءبيشى، پسيحولوگ.

كىتاپحاناشى وقۋىن ءۇش جىل، مۇعالىمدىك وقۋدى التى جىل وقىدىم. ءبارىن قوسقاندا توعىز جىل. مەن ەڭبەك ەتكەن 40 جىلدا ءبىلىم سالاسىندا كوپتەگەن وزگەرىس بولدى. مەكتەپسىز ءومىرىمىز قاراڭ قالاتىن سياقتى. قانداي كەزەڭدەردەن وتپەدىك. بارىنە شىداپ باقتىق. بىراق ەڭبەكاقى ماسەلەسىنە كەلگەندە مەكتەپ كىتاپحاناشىلارىن ۇمىتىپ كەتكەنى جانىمدى جاي تاپتىرمادى. وندا نە ءۇشىن جوعارعى وقۋ ورىندارىندا وقىدىم؟ اكەم مارقۇم ايتقانداي، كۇرەكتەي ەكى ديپلومدى نە ءۇشىن الدىم، مەنى وسىنشاما جىلدان كەيىن مازاق ەتۋ ءۇشىن بە؟ مارتەبەمىزدى تۇسىرۋگە كىمنىڭ قاقىسى بار؟ مادەنيەت جانە ءبىلىم سالاسىندا قىزمەت ىستەگەنىمىز ءۇشىن، مەكتەپ وقۋشىلارىن وقۋلىقپەن قامتىپ، قالالىق، مەكتەپىشىلىك ءىس-شارالاردى جوعارى دەڭگەيدە وتكىزگەنىمىز ءۇشىن بە؟

نازارباەۆ زياتكەرلىك مەكتەپتەرىنىڭ كىتاپحانالارىندا كىتاپحاناشى-پەداگوگ، كىتاپحاناشى-ادىسكەر دەگەن مارتەبە بار. ال قالا كىتاپحاناشىلارى ادىسكەر، مەڭگەرۋشى، بيبليوگراف، وقۋ ءبولىمى، ت.ب. سالالارعا بولىنە وتىرىپ، جۇمىستارى جەڭىل بولسا دا، الاتىن جالاقىلارى كوپ. ەندەشە ءدال وسىنداي ەڭبەك ەتىپ وتىرعان مەكتەپ كىتاپحاناشىلارىنىڭ ەڭبەكاقىسىن جەۋ، قورقىتۋ، قورلاۋ كىمگە كەرەك؟ ارينە، ەشقانداي مەكتەپ ديرەكتورى نەمەسە اكىمشىلىك ماعان «ەدەن جۋ» نەمەسە «بارىپ كەل، الىپ كەل» دەگەن جوق. اقشاسىن از تولەسە دە، نامىسىمدى ەشكىم قورلاعان ەمەس. الايدا مۇعالىمدەر، مادەنيەت قىزمەتكەرلەرىنىڭ جالاقىسىن ءوسىرىپ، ۇكىمەتىمىز مەكتەپ كىتاپحاناشىلارىن ۇمىتىپ كەتكەنى ادامنىڭ اقىلىنا سىيمايتىن جايت. ياعني، ءبىزدىڭ قۇقىمىزدى اياقاستى ەتىپ وتىر.

مەنىڭ ءسۇيىپ تاڭداعان ماماندىعىمدى ەشكىمگە قورلاتۋعا جول بەرمەيمىن. راس، كەيبىر كىتاپحاناشىلار جالاقىنىڭ ازدىعىنان ءوز مەكتەبىندە قوسالقى  جۇمىس ىستەۋگە ءماجبۇر. ايتسە دە قازىرگى زاماندا  مەكتەپ كىتاپحاناشىلارىنىڭ ەڭسەسى بيىك بولۋى ءتيىس. مەكتەپ كىتاپحاناشىلارى باسشىلاردىڭ «بارىپ كەل، شاۋىپ كەل» دەگەنىنە ەلپىلدەپ جۇگىرە بەرەتىن، كەي كەزدە ەدەندى دە جۋا سالاتىن «قولبالا» ەمەس. ءبىز ءوز ماماندىعىمىزبەن ماقتانامىز. ەندەشە تىنىمسىز ەڭبەگىمىزگە سايكەس ەڭبەكاقىمىز دا جوعارى بولۋى كەرەك.

باحتىقان باشيبەكوۆا،

№ 5 گيمنازيانىڭ كىتاپحانا مەڭگەرۋشىسى.

نۇر-سۇلتان

 

رەداكتسيادان: «Egemen Qazaqstan» گازەتىنىڭ بيىلعى 27 اقپانى كۇنگى №40  سانىندا جاريالانعان «ۇمىت قالعاندار كىمنەن قورقادى؟» اتتى ماقالاعا بايلانىستى ءبىراز وقىرماننان حات كەلدى. بۇل ماقالادا جاڭا جىلدان باستاپ ءبىلىم جانە مادەنيەت سالاسى قىزمەتكەرلەرىنىڭ جالاقىسى 30-دان 50 پايىزعا دەيىن كوتەرىلىپ، مەكتەپ كىتاپحاناشىلارىنىڭ بۇل جاقسىلىقتان قۇر قالعانى ايتىلعان بولاتىن. ايتسە دە جالاقى ماسەلەسىندە تەك كىتاپحاناشىلار عانا ۇمىت قالماپتى. رەداكتسياعا سونىمەن بىرگە ەلىمىزدىڭ مەكتەپكە دەيىنگى مەكەمەلەرىندە ەڭبەك ەتەتىن مەدبيكەلەردەن دە حات كەلدى. «جاڭا جىلدان باستاپ ەلىمىزدەگى مەديتسينا سالاسى قىزمەتكەرلەرىنىڭ جالاقىسى كوتەرىلدى. باسىندا بالاباقشالاردا جۇمىس ىستەيتىن مەدبيكەلەردىڭ دە جالاقىلارى كوتەرىلەدى دەگەن بولاتىن. بىراق، جەمە-جەمگە كەلگەندە بالاباقشاداعى مەدبيكەلەردى ۇمىت قالدىردى. ءبىز وسى ماسەلە بويىنشا دەنساۋلىق ساقتاۋ مينيسترلىگىنە حات جازىپ ەدىك، بىزگە «سىزدەر ءبىلىم جانە عىلىم مينيسترلىگىنە نەمەسە ەڭبەك جانە حالىقتى الەۋمەتتىك قورعاۋ مينيسترلىگىنە ارىزدانىڭىزدار» دەگەن جاۋاپ كەلدى. وسى ماسەلەنى ءتۇسىندىرىپ بەرە الاتىن جان بار ما؟» دەيدى حاتقا قول قويعان اق حالاتتى جاندار.

نۇرلىگۇل سماعۇلوۆا، اقتوبە وبلىسى شالقار اۋدانى، ايناش وتەۋليەۆا، اتىراۋ وبلىسى قۇرمانعازى اۋدانى، مانزۋرا تۇقاشەۆا، الماتى وبلىسى ىلە اۋدانى، زالكەن ۋسانوۆا، شىعىس قازاقستان وبلىسى اياگوز قالاسى، ساپاركۇل مۇسابەكوۆا، تۇركىستان وبلىسى شاردارا اۋدانى، حاليما اقىلبەكوۆا، جامبىل وبلىسى مويىنقۇم اۋدانى، حاتقا باس-اياعى جيىرماعا جۋىق مەبديكە قول قويعان.

شىنىندا ءبىلىم سالاسىندا ەڭبەك ەتىپ جۇرگەن كىتاپحاناشى مەن مەدبيكەلەردىڭ ماسەلەسىنە قۇلاق اساتىن  جان بار ما؟ ەل ۇكىمەتى جانە جەرگىلىكتى اكىمدەر بۇدان حاباردار ما؟ قالاي ايتساق تا ءبىلىم مەن مەديتسينا سالاسى قىزمەتكەرلەرىنىڭ جالاقىسىن وسىرگەندە، وسىناۋ ماماندىق يەلەرىن ۇمىت قالدىرىپ كەتۋ زاڭعا دا، ارعا دا سىيمايتىن تىرلىك ەمەس پە؟

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار