اتباسار اۋدانىندا سۋ تاسقىنى قاۋپىنە دايىندىق قىزۋ جۇرگىزىلۋدە. ياعني, ءار اپتا سايىن تۇرعىندار مەن جەرگىلىكتى شارۋا قوجالىقتارى, توتەنشە جاعداي سالاسىنىڭ ماماندارى بىرلەسىپ, جاباي وزەنى ارناسىن تازارتۋعا باعىتتالعان اۋقىمدى جۇمىس اتقاردى. ساقتىق شارالارىنىڭ الدىن-الۋعا 48 تەحنيكا مەن 150-دەن استام ادام جۇمىلدىرىلعان. سونداي-اق,12 ناۋرىزدان باستاپ اۋداندا 4 جەدەل جاساق ۇيىمى تاۋلىك بويى جۇمىس ىستەپ تۇر. اۋدان اكىمدىگىندە حالىقتان وتىنىمدەر قابىلدايتىن شتاب تاۋلىك بويى كەزەكشىلىكتە. ال وبلىس ورتالىعىنان بارعان قوسالقى كۇش اۋداننىڭ قاۋىپسىزدىگىن قامتاماسىز ەتۋگە ۇلەستەرىن قوسپاق.
–اتباسار جانە استراحان اۋداندارىنا سۋ باسۋدىڭ الدىن-الۋ ءۇشىن قوسىمدا كۇش جىبەرۋدەمىز. بۇل اۋداندار ەرەكشە باقىلاۋدا. الداعى 30-31 ناۋرىز كۇندەرى جانە ءساۋىر ايىنىڭ باسىندا كۇننىڭ كۇرت جىلىنۋىنا بايلانىستى قار ەرىپ, جاباي وزەنى ارناسىنان تاسۋ قاۋپى جوعارى. ازىرگە اتباسار اۋدانىندا توتەنشە جاعداي تىركەلگەن جوق. ساقتىق شارالارىن جۇرگىزىپ جاتىرمىز. ءبىز وسىنداي قوسالقى كۇش پەن تەحنيكانى تسەلينوگراد, ارشالى, استراحان اۋداندارىنا دا جىبەردىك. سونداي-اق, ارنايى رەزەرۆتە ۇستاپ تۇرعان قوسالقى توپتار بار,–دەيدى وبلىستىق توتەنشە جاعدايلار جونىندەگى دەپارتامەنتىنىڭ باستىعى الەكسەي سوۆەتوۆ.
كوكتەمگى سۋ تاسقىنىن الدىن-الۋ ءۇشىن وڭىردە 1 مىڭ ارنايى تەحنيكا دايىن تۇر. ازىرگە اۋىل-ايماقتان 1,5 ميلليون تەكشە مەتر قار شىعارىلدى. سونداي-اق, 93 مىڭ دانا قاپ پەن 31 مىڭ توننا ينەرتتى ماتەريال دايىندالدى.
اقمولا وبلىسى
