ايماقتار • 27 ناۋرىز، 2020

كوكشەتاۋدا قاۋىپتىڭ الدىن الۋعا قاپىسىز كوڭىل بولىنگەن

10 رەتكورسەتىلدى

اقمولا وبلىسىنىڭ اكىمى ەرمەك مارجىقپاەۆتىڭ توراعالىعىمەن وبلىستىق اكىمدىكتە داعدارىسقا قارسى وڭىرلىك جەدەل شتابتىڭ كەزەكتى وتىرىسى وتكىزىلدى.

وبلىس اكىمى ەرمەك مارجىقپاەۆ بۇگىنگى تاڭدا كوروناۆيرۋسكە بايلانىستى ەلىمىزدە كۇردەلى جاعداي قالىپتاسىپ وتىرعاندىعىن ايتىپ ءوتتى. ءدال وسىنداي ۋاقىتتا بىرلىكتىڭ، ءتارتىپتىڭ قاجەت ەكەندىگى دە ەسكە سالىندى.

ەل جاعدايى ەشقاشان نازاردان شىعارىلمايدى. «بيزنەستىڭ جول كارتاسى» باعدارلاماسى بويىنشا 700 ميلليارد تەڭگە قاراجات بولىنگەلى وتىر. سونىڭ ىشىندە 32 ميلليارد تەڭگە اقمولا وبلىسىنا تيەسىلى. مۇنىمەن قاتار، جۇمىسپەن قامتۋ ماقساتىندا رەسپۋبليكا بويىنشا 300 ميلليارد تەڭگە، سونىڭ ىشىندە ءبىزدىڭ وبلىسقا 13 ميلليارد تەڭگە قاراجات بولىنەتىنى شتاب وتىرىسىندا ايتىلدى.

–«جۇمىسپەن قامتۋدىڭ جول كارتاسى»، «بيزنەستىڭ جول كارتاسى»، «قاراپايىم زاتتار ەكونوميكاسى» سەكىلدى بارلىق جوبالار وبلىس ەكونوميكاسىنا جۇمىس ىستەۋى كەرەك، – دەدى وبلىس اكىمى،– ازىق-ت ۇلىك، اتاپ ايتساق، ۇن، كارتوپ، قاراقۇمىق سەكىلدى ونىمدەرگە ەكسپورتتى شەكتەي تۇرۋعا شەشىم قابىلداندى. مۇنىڭ بارلىعى وزىمىزدەگى ساۋدا ورىندارىندا ازىق-ت ۇلىك باعاسىن تۇراقتاندىرۋ ءۇشىن قاجەت.

كوروناۆيرۋستىڭ تارالۋىن بولدىرماۋ ماقساتىندا وبلىستا كوپتەگەن جۇمىس اتقارىلۋدا. وبلىس اۋماعىندا ونلاين-ساۋدا قىزمەتى ىسكە قوسىلدى. وڭىرىمىزدە مادەني-بۇقارالىق شارالاردى وتكىزۋگە شەكتەۋ قويىلىپ، بالا باقشالار جۇمىسىن ۋاقىتشا توقتاتتى. وبلىس اكىمىنىڭ ورىنباسارى اينا ءمىسىرالىموۆانىڭ ايتۋىنشا، بۇگىندە وبلىس بويىنشا 159 ادام كارانتيندە. ونىڭ 47-ءسى ەمحاناعا جاتقىزىلعان. تۇرعىندارعا بۇقارالىق اقپارات قۇرالدارىندا كوروناۆيرۋس قاۋپى، ودان ساقتانۋدىڭ جولدارى تۋرالى حابارلامالار كۇن سايىن تاراتىلۋدا. ارنايى سايت ازىرلەنۋدە. سونىمەن قاتار، «تىنىس» زاۋىتى 77 وكپەنى جاساندى جەلدەتۋ اپپاراتىن وبلىستىق دەنساۋلىق ساقتاۋ باسقارماسىنا سىيعا تارتقانى اتاپ ءوتىلدى. وبلىستىق ىشكى ساياسات باسقارماسىنىڭ جانىنان كارانتينگە جابىلعان تۇرعىندارعا پسيحولوگيالىق كومەك كورسەتۋ ماقساتىندا ارنايى ونلاين قىزمەتى اشىلعان. جانە 109 ءنومىرى بويىنشا call-ورتالىق جۇمىس ىستەيتىن بولادى.

وكىنىشكە وراي، ەلىمىزدە كوروناۆيرۋسكە بايلانىستى جاريالانعان توتەنشە جاعدايعا قاراماستان، كەيبىر ساقتىق شارالارى ءالى دە دۇرىس ەسكەرىلمەي كەلەدى. ادام كوپ جينالاتىن ورىندارعا بارماۋعا كەڭەس بەرىلگەنىمەن، بالالار مەن جاسوسپىرىمدەر ويىن، سپورت الاڭدارىنان تابىلۋدا. وسى رەتتە، وبلىس اكىمى تۇرعىندار اراسىندا ءتۇسىندىرۋ جۇمىستارى ناشار جۇرگىزىلىپ جاتقانىن، ازاماتتاردىڭ قاۋىپتى ىندەتكە بەيقام قارايتىنىن سىنعا الىپ، ءتيىستى ۆەدومستۆولارعا كوروناۆيرۋس قاۋپى جايلى اقپاراتتىق-ءتۇسىندىرۋ شارالارىنشيراتا ءتۇسۋدى تاپسىردى.

سونداي-اق، وبلىس اكىمى ەرمەك مارجىقپاەۆ شتاب وتىرىسى كەزىندە قاشىقتىقتان وقىتۋ ماسەلەسىنە نازار اۋداردى. وبلىستىق ءبىلىم باسقارماسى باسشىسىنىڭ ورىنباسارى ۆالەري گامازوۆتىڭ مالىمدەۋىنشە، توتەنشە جاعداي كەزىندە بارلىق ءبىلىم بەرۋ مەكەمەلەرى قاشىقتىقتان وقىتۋعا كوشكەن. 2020 جىلدىڭ 6 ساۋىرىنەن باستاپ مەكتەپ وقۋشىلارىن قاشىقتىقتان وقىتۋ ماسەلەسى ويلاستىرىلۋدا. قازىرگى تاڭدا وبلىستا ورتا ءبىلىم بەرەتىن 556 مەكتەپ بار. قازاقستان رەسپۋبليكاسىنىڭ ءبىلىم جانە عىلىم مينيسترلىگى قامتىلۋى 80 وقۋشىدان اسپايتىن مەكتەپتەردى ادەتتەگى رەجيمدە وقىتا بەرۋدى ۇسىنىپ وتىر. بىزدە ونداي مەكتەپتەردىڭ سانى 207.

شتاب وتىرىسىن قورىتىندىلاعان وبلىس اكىمى ءوز ورىنباسارلارىنا جانە جاۋاپتى ۆەدومستۆو باسشىلارىنا جاعدايدى قاتاڭ باقىلاۋدا ۇستاۋدى تاپسىردى.

اقمولا وبلىسى

سوڭعى جاڭالىقتار

ۇقساس جاڭالىقتار