–جۇرگىزىلگەن ينتەنسيۆتى تەراپياعا قاراماستان №2 وبلىستىق كوپبەيىندى اۋرۋحاناسىندا وبلىسىمىزدىڭ 64 جاستاعى تۇرعىنى كوروناۆيرۋس ىندەتىنەن قازا تاپتى. ايەل ناۋرىزدىڭ 25-ءى كۇنى تاڭعى ساعات 7.00-دە اۋرۋحاناعا جەدەل جاردەم كولىگىمەن وتە اۋىر جاعدايدا ءتۇستى. الگوريتمگە سايكەس, جەدەل رەسپيراتورلىق ۆيرۋستىك جۇقپاسى بار دەگەن ەسكەرتپە جاسالىپ, كوروناۆيرۋسكە كۇدىكتى رەتىندە ەسەپكە الىندى.وبلىستىق دەنساۋلىق ساقتاۋ باسقارماسىنىڭ جانە ءوز اتىمنان مارقۇمنىڭ تۋعان-تۋىسقاندارىنا قايعىرىپ كوڭىل ايتامىن, – دەدى باسقارما باسشىسى.
ەكى وكپەسىنىڭ قابىنۋى, تىنىس الۋىنىڭ قيىنداۋى, سونىمەن قاتار قانت ديابەتى سالدارىنان تۋىنداعان سەپسيس, گيپەرتونيالىق اۋرۋ مەن اتەروسكلەروز اجالعا سەبەپ بولعان. ناۋقاستا پنەۆمونيا قاتەرلى ىندەتتىڭ سالدارىنان پايدا بولعان. ول شەتەلگە شىقپاعان جانە كوروناۆيرۋس جۇقتىرعاندارمەن بايلانىستا بولماعان. قازىرگى تاڭدا مارقۇممەن بايلانىستا بولعان تۇلعالار كارانتينگە جاتقىزىلىپ, ءتيىستى زەرتتەۋلەر جۇرگىزىلۋدە. بريفينگ بارىسىندا باسقارما باسشىسى سۇلەن ءىلياسوۆ اتالمىش جاعدايعا بايلانىستى قاجەتتى ەپيدەميولوگيالىق شارالار جاسالىپ جاتقانىن ايتتى.
اقمولا وبلىسىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى سەرىك ومارحانوۆ ەلىمىزدە كوروناۆيرۋستەن ءبىر ازاماتشانىڭ كوز جۇمعانى تۋرالى جەدەل حابار تۇسكەن بويدا, تسەلينوگراد اۋداندىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسى كوروناۆيرۋستەن كوز جۇمعان ناۋقاسپەن بايلانىستا بولعانداردى انىقتاپ, وقشاۋلاعانىن ايتتى. ولاردىڭ بارلىعى مەديتسينا قىزمەتكەرلەرىنىڭ ءجىتى باقىلاۋىندا. سونىمەن قاتار, مارقۇمنىڭ تۇرعان ءۇيى دە زالالسىزداندىرىلادى.
