كارانتيندىك رەجيمگە بايلانىستى ۆيرۋس تارالماس ءۇشىن قالادان تىس جەردە تۇراتىن پوليتسيا دەپارتامەنتىنىڭ قىزمەتكەرلەرى ۋاقىتشا جاتاقحانالارعا جايعاسادى.
ء«بىزدىڭ قالامىز كارانتين رەجيمىندە بولعاندىقتان, كەز كەلگەن تۇرعىن جۇقپالى اۋرۋدىڭ قوزدىرعىشى بولا الادى. توتەنشە جاعدايدا قۇقىق قورعاۋ جۇيەسىنىڭ جۇمىسى كۇشەيىپ, پوليتسيا قىزمەتكەرلەرىنىڭ حالىقپەن بايلانىسى – جۇمىستىڭ اجىراماس بولىگى بولىپ تابىلادى. پوليتسيا جۇمىسىنىڭ ەرەكشەلىگىنە بايلانىستى قالانىڭ سىرتىندا تۇراتىن ءتارتىپ ساقشىلارىن ۋاقىتشا تۇرعىن ۇيمەن قامتاماسىز ەتۋ تۋرالى شەشىم قابىلداندى. مەملەكەت ەسەبىنەن ءبىزدىڭ قىزمەتكەرلەرگە بارلىق جاعداي جاسالدى. كارانتين كەزىندە الماتىنىڭ بارلىق پوليتسيا قىزمەتكەرلەرى كازارمالىق رەجيمدە – قالادا بولادى», – دەدى الماتى قالالىق پوليتسيا دەپارتامەنتى باسشىسىنىڭ ورىنباسارى ابدۋالي ناشاربەكوۆ.
ءتارتىپ ساقشىلارى تۇراتىن جاتاقحانالاردا تۇرمىسقا قاجەتتىنىڭ ءبارى بار. پوليتسەيلەردىڭ پىكىرىن تىڭداپ كورۋگە بولادى.
«ۇيدە ءۇش بالام, ايەلىم جانە انام قالدى. ارينە, ءبىز ساعىنامىز. بىراق بۇل – قىزمەت. تۋىسقاندار الدىنداعى جاۋاپكەرشىلىك بار, وزىمىزگە جۇكتەلگەن مىندەتتەر بار, ءبارىن تۇسىنەمىز. تۇرعىن ءۇي جاعدايلارى تۋرالى شاعىم جوق, ءبارى بار دەۋگە بولادى. قاجەت بولعان كەزدە كازارمادا, شاتىرلى لاگەرلەردە دە تۇرامىز, ەڭ باستىسى – ەلىمىز تىنىش بولسا, ازاماتتارىمىزعا قاۋىپ تونبەسە بولدى», – دەيدى مەتروپوليتەندەگى پوليتسيا باسقارماسىنىڭ قىزمەتكەرى قۋات بايشۋاقوۆ.
