اباي • 27 ناۋرىز، 2020

اباي ءانىن ايبەن شىرقادى

59 رەتكورسەتىلدى

اباي حاكىمنىڭ ولمەس ولەڭدەرى الاشتى اسىپ، تۇركيا تورىندە سالتانات قۇرۋدا. اقىن مەرەيتويىن ەلىمىزدەن بولەك تۇركىتەكتەس حالىقتاردىڭ كوبى اتاپ ءوتىپ جاتىر. مەرەيتويعا تارتۋ رەتىندە تۇركيانىڭ وپەرا ءانشىسى ايبەن ەرسوي ۇلى ويشىلدىڭ ءانىن اۋەلەتىپ، ءتىپتى بەينەبايان دا ءتۇسىردى. بۇل تۋرالى گازەتىمىزدىڭ سايتىندا العاش جاريالاپ، وقىرماندارىمىزعا ۇلىستىڭ ۇلى كۇنى قارساڭىندا سۇيىنشىلەگەن بولاتىنبىز. كەيىن قازاقپارات ءتىلشىسى، ارىپتەسىمىز ايجان سەرىكقىزى انشىمەن سۇحباتتاسىپ تا ۇلگەرگەن ەكەن.

تۇركيالىق ەسترادا جۇل­دىزى ايبەن ەرسوي ءوزىنىڭ Instag­ram-داعى پاراقشاسىندا «بيىل ماۋسىم ايىندا قازاق­ستان­نىڭ استاناسىندا ۇلى اقىن ابايدىڭ 175 جىلدى­عى قۇر­مەتىنە فەستيۆال ۇيىمداستىرۋ جوسپارلانعان بولاتىن. شارت بويىنشا، ءاربىر ەلدەن كەلگەن قاتىسۋشى ۇلى اقىننىڭ ءبىر ءانىن شىرقاۋى كەرەك ەدى. ءبىز دە ابايدىڭ «كوزىمنىڭ قاراسى» اتتى تۋىندىسىن زاماناۋي ارانجيروۆكادا ازىرلەدىك. وتكەن اپتادا ىستانبۇلدىڭ ەڭ كورىكتى جەرلەرىنىڭ ءبىرى – سۇلتان احمەت مەشىتى ماڭىندا كليپ تۇسىردىك. وكىنىشكە قا­راي، قاۋىپتى ۆيرۋستىڭ تارالۋىنا بايلانىستى بۇل جوبا توقتاتىلدى. الايدا ءبىز باس­تا­عان ءىسىمىزدى اياقتاپ، تۋىندى­نى سىزدەرمەن ءبولىسۋدى ءجون كوردىك»، دەپ جازىپتى.

سونىمەن بىرگە ءانشى قاز­اقپارات تىلشىسىنە بەرگەن سۇح­باتىندا قازاق انىمەن قالاي تانىسقانىن ايتىپ بەرگەن. «قازاقستانعا ءتۇرلى جوبا بو­يىنشا بىرنەشە رەت بارعانمىن. «Qazaqstan» ۇلتتىق ارناسى وتكىزگەن «Silk Way Star» باي­قاۋى­نىڭ قازىلار القاسىنا مۇشە بولدىم. بۇل كەرەمەت جوبا بولدى. وندا تەك كامەرا ال­دىندا عانا ەمەس، ساحنا سىر­تىندا دا باۋىرلارىممەن ۇمى­تىلماس ساتتەر وتكىزدىم. سول كەزدەرى قازاق مۋزىكاسىن ەستىپ، ءبىزدىڭ حالىق اندەرىمەن ۇقساس ەكەنىن اڭعاردىم. قازاق مۋزى­كاسىمەن تانىسقان كۇنى ەكى حالىققا دا وسى سەزىمدى جەتكىزىپ، ەرتەدەن ۇلان-عايىر اۋ­ماقتا تامىرىمىزدىڭ ورتاق بول­عانىن ەسكە سالعىم كەلدى. «كو­­زىمنىڭ قاراسى» ءانىن العاش ەستى­­گەن ساتتە-اق جۇرەگىمە جەت­تى. باستاپقىدا سوزدەردى تۇسىن­­بەسەم دە، ءاننىڭ نە تۋرالى ەكە­نىن سەزىنگەندەيمىن. سون­دىق­تان مەن ءۇشىن ابايدىڭ وسى ءانى­ن­ىڭ ورنى بولەك»، دەدى ا.ەرسوي. 

قازىر ايبەن حانىم قازاق­ستان سىندى وزگە دە باۋىرلاس حالىقتاردىڭ ۇلتتىق ان­دەرىمەن تانىسۋعا مۇمكىندىك بەرەتىن جوبالاردى جوسپارلاپ جۇرگەنىن ايتا كەتكەن ءجون. ء«بىزدىڭ الەم اينالامىزداعى نارسەنى تەز وزگەرتىپ جاتقانىنا قاراماستان، ءبىزدىڭ ىشىمىزدە وتە قۇندى نەگىز بار. ءبىز – كۇن سايىن ءوزىمىزدى جاڭا دەڭگەيگە كوتەرىپ، ۇزدىكسىز داميتىن جاراتىلىسپىز جانە كۇن سايىن ءوزىمىزدى جاڭا قىرىمىزدان تانيمىز. جاڭا باعىتقا ۇمتىلا وتىرىپ، ءبىز اباي سياقتى قۇندى نەگىزدەردى بولاشاققا جەتكىزۋىمىز كەرەك. اباي سىندى تۇلعالار الەمدى جاقسىلىققا باستاۋ ءۇشىن تۋادى. الەمدەگى بەيبىتشىلىك پەن ماحاببات ءۇشىن ۇلى اقىننىڭ مەرەيتويىمەن قۇتتىقتايمىن»، دەيدى تۇركيالىق ءانشى.

دانا ابايدىڭ ادامزاتقا ورتاق تۇلعا ەكەنىن انىمەن ناسيحاتتاپ جۇرگەن تالانتتى ءانشى ەرسويعا ەلدىڭ ىقىلاسى ەرەكشە دەپ بىلەمىز. قانداس قارىنداسىمىزعا ۇلكەن ونەر كوگىنە قاققان قاناتىڭ تالماسىن دەپ تىلەك ايتامىز.

 

سوڭعى جاڭالىقتار

الماتى: جولاۋشىلار اعىنى مەن كولىك سانى ازايدى

وڭتۇستىك قازاقستان • بۇگىن، 18:10

بەتپەردە كيگەن كوكتەم - 6

قوعام • بۇگىن، 17:09

د دارۋمەنى - ينفەكتسيالاردىڭ «جاۋى»

كوروناۆيرۋس • بۇگىن، 16:47

شىمكەنت: تسيفرلى وتباسىنىڭ ءبىر كۇنى

وڭتۇستىك قازاقستان • بۇگىن، 15:58

ازيانىڭ احۋالى قانداي بولماق

ەكونوميكا • بۇگىن، 15:23

ۇقساس جاڭالىقتار