دانيال احمەتوۆتىڭ قارىنداسىنا شابۋىل جاساعاندار سوتتالدى

ايماقتار • 26 ناۋرىز، 2020

دانيال احمەتوۆتىڭ قارىنداسىنا شابۋىل جاساعاندار سوتتالدى

111 رەت كورسەتىلدى

ءىستى وبلىس ورتالىعىنداعى قىلمىستىق ىستەر جونىندەگى اۋدانارالىق مامانداندىرىلعان سوت قاراستىرىپ، وتىرىس بەينە-كونفەرەنتس-بايلانىس تۇرىندە وتكىزىلدى.

فاريدا بىقاي

وقيعا بارىسى 2019 جىلدىڭ 18 قىركۇيەگىندە بولعان.

وسى كۇنى شىعىس قازاقستان وبلىسى اكىمىنىڭ 62 جاسار قارىنداسىنا ءۇيىنىڭ جانىندا شابۋىل جاسالعان. جاۋاپكەرشىلىككە «كومپانيا ارك» جشس ديرەكتورى اسحات تەزەكباەۆ پەن فيرمانىڭ قىزمەتكەرى يگور ميلوۆانوۆ تارتىلدى.

تەرگەۋ امالدارى بارىسىندا كومپانيا ديرەكتورىنىڭ قارجىلىق قيىندىقتارعا تاپ بولىپ، نەسيەنى وتەۋ قاجەتتىلىگى بولعانى انىقتالعان.

قىلمىسكەرلەر گۇلفاز اۋبانوۆانى ۇرلاپ، ول ءۇشىن 200 ميلليون تەڭگە وتەماقى تالاپ ەتپەك بولادى.

الايدا، اكىمنىڭ قارىنداسىن كولىككە كىرگىزىپ، الىپ كەتە الماعان. اۋبانوۆا قىلمىسكەرلەر قولىنان قاشىپ ۇلگەرەدى.

ءسويتىپ، سوت زالىندا اسحات تەزەكباەۆ پەن يگور ميلوۆانوۆقا بوپسالاۋعا ازىرلەنۋ مەن ادامدى ۇرلاۋ بويىنشا ايىپتار تاعىلدى.

- سوت اسحات تەزەكباەۆقا ماكسيمالدى قاۋىپسىز كولونيادا 13 جىل باس بوستاندىعىنان ايىرۋ، يگور ميلوۆانوۆقا ماكسيمالدى قاۋىپسىز كولونيادا 11 جىل باس بوستاندىعىنان ايىرۋ جازاسىن قولدانۋدى تاعايىنداۋ. تەزەكباەۆتان اۋبانوۆانىڭ پايداسىنا 4 ميلليون تەڭگە كولەمىندەگى مورالدىك شىعىن جانە 200 مىڭ تەڭگە ماتەريالدىق شىعىندى وتەۋگە شەشىم شىعاردى، - دەپ جاريالادى سۋديا قىدىربەك ساتاباەۆ.

ال گۇلفاز اۋبانوۆا ءار جىلدارى وبلىس دەنساۋلىق ساقتاۋ باسقارماسى، وبلىس بويىنشا مەديتسينالىق جانە فارماتسەۆتيكالىق قىزمەتتى باقىلاۋ كوميتەتى دەپارتامەنتىن باسقاردى.

پاۆلودار

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز