ۇلتتىق كاسىپكەرلەر پالاتاسى 16 ناۋرىزدا ارنايى جەدەل شتاب قۇردى. وعان 3 كۇن ىشىندە 6 مىڭعا جۋىق ءوتىنىش تۇسكەن. ەلدەگى جاعدايعا بايلانىستى كومپانيالار جۇمىسشىلارىن قىسقارتۋعا ءماجبۇر. كاسىپكەرلەر شيكىزاتتىڭ جەتىسپەۋشىلىگىنەن ءارى كۇرت قىمباتتاۋىنان زارداپ شەگىپ وتىر. سوعان وراي ۇكىمەتتەن عيمارات جانە جەر جالداۋ اقىسىن تولەۋ مەرزىمىن ۇزارتۋدى, سالىقتان ۋاقىتشا بوساتۋدى سۇرايدى.
– بۇل قيىندىقتاردىڭ دەنى شەكارانىڭ جابىلۋى مەن ارنايى قاۋىپسىزدىك شارالارىن ەنگىزۋ سالدارىنان تۋىنداپ وتىر. جالپى ءوتىنىش جىبەرگەن كومپانيالاردىڭ 85 پايىزى – شاعىن بيزنەس, 13 پايىزى – ورتا بيزنەس, 2 پايىزى – ءىرى بيزنەس وكىلدەرى. ءوتىنىش جاساعان كومپانيالاردىڭ جارتىسى نۇر-سۇلتان مەن الماتى قالالارىنا تيەسىلى, – دەيدى ن.بوكەيحانوۆ.
كاسىپكەرلەردىڭ 60 پايىزى قارجىلاي قيىندىققا تاپ بولعان. سوندىقتان كاسىپورىندار ەڭبەك رەسۋرستارىن ساقتاۋعا وتەماقى بەرۋدى سۇراپ وتىر.
– ايتىلعان ۇسىنىستار مەملەكەتتىك ورگاندارعا جىبەرىلدى. ولارمەن ارنايى شارالار جۇرگىزىلىپ جاتىر. ەڭ ءبىرىنشى قولدانىلاتىن شارا – كاسىپكەرلەردى سالىقتان بوساتۋ. الداعى جاڭالىقتاردى كاسىپكەرلەر atameken.kz پورتالىنان بىلە الادى, – دەدى ش.تەمىر. ونىڭ ايتۋىنشا, كەيبىر بانكتە تۇتىنۋشىلارىنا جەڭىلدىكتەر جاساعان. ولاردىڭ نەسيە بويىنشا مىندەتتەمەلەرىن 90 كۇنگە كەيىن شەگەرىپتى. بۇگىندە بۇل جۇمىستاردى باسقا دا بانكتەر قولعا الۋدا.
ايتا كەتەيىك, «اتامەكەن» ۇلتتىق كاسىپكەرلەر پالاتاسى تولىقتاي ونلاين رەجىمگە كوشتى. سوعان ساي كاسىپكەرلەرگە ارنايى call-تسەنتر ۇيىمداستىرعان. كەز كەلگەن كاسىپكەر 1432 نومىرىنە حابارلاسىپ, كوكەيدەگى سۇراقتارىنا جاۋاپ الا الادى.
