«قازاقستاندى جايلى ايماقتىق حاب رەتىندە تانىتۋ ءۇشىن كوشى-قون ۇدەرىستەرى وڭتايلاندىرىلىپ جاتىر. ونىڭ ءبارى تولىق تسيفرلىق فورماتقا كوشىرىلەدى. تاياۋدا قولدانىسقا ەنگىزىلگەن «التىن ۆيزا» وسى باعىتتاعى ەلەۋلى شەشىمدەردىڭ ءبىرى بولدى. بۇل ۆيزانىڭ يەگەرلەرى ۇزاق ۋاقىت بويى ەلىمىزدىڭ رەزيدەنتى بولا الادى. ارتىق اكىمشىلىك جۇكتەمەدەن بوساتىلادى. ولارعا ەداۋىر سالىق جەڭىلدىگى بەرىلەدى. باعدارلاماعا قاتىسۋشىلاردىڭ جانە ولاردىڭ وتباسى مۇشەلەرىنىڭ قازاقستان ازاماتتارىمەن بىردەي ساپالى ءبىلىم الۋعا, مەديتسينالىق قىزمەتتى پايدالانۋعا مۇمكىندىگى بولادى», دەدى پرەزيدەنت.
توقاەۆ: مەملەكەتتىك دەرەكتەردىڭ بىرىڭعاي جۇيەسى بولماسا, جاساندى ينتەللەكتىدەن پايدا جوق
مەملەكەت باسشىسى جاساندى ينتەللەكتىنى ءتيىمدى قولدانۋ ءۇشىن دەرەكتەرگە باعدارلانعان باسقارۋ مودەلىن ەنگىزۋ كەرەك دەپ سانايدى.
پرەزيدەنت ۇكىمەت پەن ۇلتتىق بانككە شۇعىل تاپسىرما بەردى
«جۇيەلەنگەن دەرەكتەر – جاساندى ينتەللەكتىنى دامىتۋدىڭ ەكونوميكالىق نەگىزى. مۇنداي دەرەكتەر تەحنولوگيانىڭ الەۋەتىن پايدالانىپ, ونىمدىلىكتى ارتتىرۋعا جول اشادى. وسى رەتتە ءتىل بۇكىل جۇيەنى بىرىكتىرەتىن باستى قۇرال بولۋعا ءتيىس. ەڭ الدىمەن, قازاق ءتىلىن زاماناۋي تسيفرلىق جۇيەلەرگە تولىق كىرىكتىرۋ كەرەك. سوندا عانا دەرەكتەردى قۇرىلىمداپ, يننوۆاتسيانى بارلىق سالاعا ەنگىزەمىز. ورتاق دەرەكتەر جيناقتالىپ, ءوزارا ۇيلەسىمدى جانە ماشينا وقي الاتىنداي فورماتتا بولۋعا ءتيىس. ايتپەسە, ەڭ مىقتى الگوريتمنىڭ ءوزى دۇرىس جۇمىس ىستەمەيدى, ونىڭ ەش پايداسى بولمايدى. قازىر اسا قۇندى اقپاراتتىڭ كوبى ارحيۆتەردە شاڭ باسىپ جاتىر. ونىڭ ءبارىن تسيفرلىق فورماتقا كوشىرۋ قاجەت. ءبىز ۋاقىتتان ۇتىلىپ, مۇمكىندىكتى پايدالانا الماي جاتىرمىز», دەدى مەملەكەت باسشىسى.
مەملەكەت باسشىسى ۇكىمەت جاساندى ينتەللەكت ۇلگىلەرىن وقىتۋ ءۇشىن ارحيۆتەردەگى جانە قولدانىستاعى مالىمەتتەردى ساپالى دەرەكتەر تورابىنا جيناقتاۋعا ءتيىس ەكەنىن ايتتى.
«بۇل جۇمىسقا دەرەۋ كىرىسكەن ءجون. بۇدان بولەك, ستراتەگيالىق جوسپارلاۋ جانە رەفورمالار اگەنتتىگى دەرەكتەر ساپاسىن ايقىندايتىن ۇلتتىق ستاندارتتى بەكىتۋى كەرەك. ول ەكونوميكا, عىلىم جانە بيزنەس وكىلدەرىنە قولجەتىمدى بولعانى ابزال. جالپى, دەرەكتەرگە باعدارلانعان باسقارۋ ۇلگىسىنە تولىق كوشۋ ءۇشىن ۇكىمەت مەملەكەتتىك باعدارلامالاردىڭ نورماتيۆتىك بازاسى مەن مازمۇنىن قايتا قاراپ شىعۋعا ءتيىس. مالىمەتتەردى جۇيەلەپ, «دەرەكتەر قويماسى» دەپ اتالاتىن بىرىڭعاي جەلىگە كىرىكتىرۋ ماڭىزدى. جۇمىستىڭ تيىمدىلىگى سوعان قاراپ باعالانادى. ءبىز وسى باعىتتا شۇعىل شارالاردى قولعا الماساق, سالىنعان ينۆەستيتسيا قۇمعا سىڭگەن سۋداي جوق بولادى, دەدى پرەزيدەنت.
