الەم • 25 ناۋرىز، 2020

الەم ەلدەرى ساقتىق شارالارىن كۇشەيتتى

71 رەتكورسەتىلدى

كوروناۆيرۋستىڭ جاڭا ءتۇرى دۇنيەجۇزىن شىنداپ ابىگەرگە سالدى. بۇرىن قامسىزداۋ وتىرعان مەملەكەتتەر ەتەك-جەڭىن قىمتاپ، ساقتىق شارالارىن مىقتاپ قولعا الا باستادى. كەيبىرەۋلەر كومەندانتتىق ۋاقىتىن ەنگىزسە، ءبازبىر ەلدەردىڭ تۇرعىندارى ۇيدەن مۇلدە شىقپاۋ تۋرالى بۇيرىق الدى.

جاقىندا قىتاي يتاليا بيلىگىن كارانتين شارالارىن دۇرىس قولعا الماي جاتقانىن سىنعا العان ەدى. بۇل ەلدەگى اۋرۋ جۇقتىرۋ كورسەتكىشى 69 مىڭعا جەتسە دە اۆتوبۋستار ءجۇرىپ تۇر، اۆتوماشينالارعا دا ءارى-بەرى جۇرۋگە تىيىم سالىنباعان.  دەگەنمەن دە يتاليا كەش تە بولسا ساقتىق شارالارىن كۇشەيتە باستادى. قازىر مۇندا ون ادامنان ارتىق باسقوسۋعا بولمايدى. دۇنيەجۇزىلىك دەنساۋلىق ساقتاۋ ۇيىمى يتاليا اۋرۋدى بوگەۋ ستراتەگياسىن ءتيىمدى جۇرگىزىپ،  ۆيرۋستى جۇقتىرۋ كورسەتكىشىن انىقتايتىن تەستتەرمەن حالىقتى كوبىرەك قامتىسا، جاعدايدى تۇزەۋگە مۇمكىندىگى بار دەپ مالىمدەدى.

قازىر الەمنىڭ كوپتەگەن مەملەكەتتەرى يتاليادان ساباق الا باستاعان سەكىلدى. كوپشىلىگى ىندەتتى ءارى قاراي ورشىتپەۋ، تۇرعىنداردىڭ قاۋىپسىزدىگىن قامتاماسىز ەتۋگە شىنداپ كىرىستى. مىسالى، كۇنى كەشە ءۇندىستاننىڭ پرەمەر-ءمينيسترى نارەندرا مودي 1،3 ملرد تۇرعىنى بار ەلىنە «ۇيدەن مۇلدە شىقپاۋعا» شەشىم شىعاردى. ەگەر باسقا ەلدەردە ازىق-ت ۇلىك، ءدارى-دارمەك الۋ ءۇشىن سىرتقا شىعۋعا رۇقسات بەرىلسە، ءۇندىستاندا بۇعان دا تىيىم سالىنعان. كارانتين 21 كۇنگە سوزىلادى. مۇنداي شەشىم حالىققا جاريالانا سالىسىمەن ىلە-شالا كۇشىنە ەندى، جۇرتشىلىقتىڭ مويىن بۇرۋعا دا مۇمكىندىگى بولعان جوق. وسى ءۇشىن ءۇندىستان بيلگى سىنعا دا ىلىكتى. بىراق كارانتيننىڭ اتى – كارانتين، امال جوق، ەندى ميللياردتاعان حالىق ءۇش اپتا بويى ۇيدە وتىرۋعا ءماجبۇر.

ۇلىبريتانيادا دا كارانتين شارالارى مىقتاپ قولعا الىنا باستادى. بۇگىنگە دەيىن كوشەلەردە ەركىن جۇرگەن اعىلشىندار ەندى ۇيىنە قاجەتتى زاتتار الۋ ءۇشىن عانا سىرتقا شىعا الادى. بريتاندىقتاردىڭ كوبى ونلاين رەجيمگە كوشكەن. جۇمىسقا قالا تىرشىلىگىن قامتاماسىز ەتەتىن جۇيەلەردىڭ قىزمەتكەرلەرى عانا بارادى. سوڭعى مالىمەتتەر بويىنشا، بۇگىندە ۇلىبريتانيادى COVID-19 جۇقتىرعانداردىڭ سانى 8 مىڭنان، ودان كوز جۇمعاندار 400-دەن اسقان.

ال تۇركيا تۇرعىنداردى ازىق-ت ۇلىكپەن قامتاماسىز ەتەتىن ۇلكەندى-كىشىلى دۇكەندەردىڭ جۇمىس ۋاقىتىن شەكتەپ، تاڭەرتەڭگى ساعات 9.00-دەن كەشكى ساعات 21.00-گە كوشىردى.  دۇكەندەرگە كىرىپ-شىعاتىن ادامدارعا دا شەكتەۋ بار: 10 شارشى مەتردە ءبىر ساتىپ الۋشى عانا تۇرۋى كەرەك.

يندونەزيادا دا ۆيرۋس جۇقتىرعانداردىڭ قاتارى ءوسىپ كەلەدى. وتكەن تاۋلىكتە ىندەتكە ىلىككەن 100-دەن استام ادام اۋرۋحاناعا تۇسكەن. بۇل ەل دە ساقتىق شارالارىن كۇشەيتىپ، كوپشىلىك ورىنداردا عانا ەمەس، كوشەلەردە دە قول جۋعىشتار مەن انتيسەپتيكتەر ورناتتى. بۇل ەلگە سىرتتان كەلگەندەر ۆيزامەن قوسا، ۆيرۋس جۇقتىرماعانى تۋرالى انىقتامانى دا الا ءجۇرۋى قاجەت.

 

قىمبات توقتامۇرات

سوڭعى جاڭالىقتار

پاندەميا: ساقتانساڭ ساۋ بولارسىڭ

ايماقتار • بۇگىن، 20:08

ەرىكتىلەر بالالاردى قۇتتىقتادى

ايماقتار • بۇگىن، 16:47

ازيادا COVID-19-دان ءولىم نەگە از؟

كوروناۆيرۋس • بۇگىن، 16:07

ۇقساس جاڭالىقتار