ايماقتار • 25 ناۋرىز، 2020

اقتوبەدە سەكتورلار قۇرىلىپ، ارنايى بازا جاساقتالدى

161 رەتكورسەتىلدى

وبلىس تۇرعىنى شەتەلدەن كوروناۆيرۋس جۇقتىرىپ كەلگەنى باقىلاۋ مەن ساقتاندىرۋ شارالارىن ودان ءارى كۇشەيتۋگە ءارى بۇل باعىتتا اتقارىلاتىن جۇمىستاردىڭ اۋقىمىن تەرەڭدەتە تۇسۋگە نەگىز بولىپ وتىر. وسىعان بايلانىستى تۇرعىندار سانى جارتى ميلليوننان اسىپ تۇسەتىن ۇلكەن قالا 23 سەكتورعا ءبولىنىپ، كۇردەلى كەزەڭ تالابىنا ساي ارنايى بازا جاساقتالدى. بۇل جونىندە باق وكىلدەرى مەن ءوڭىر تۇرعىندارىنا ونلاين رەجيمىندە وتكىزىلگەن بريفينگتە اقتوبە قالاسىنىڭ اكىمى اسحات شاحاروۆ ايتىپ بەردى.

ارنايى بازا تۇرعىنداردىڭ قاۋىپسىزدىگىن ساقتاۋ ماقساتىندا قۇرىلعان. الداعى كۇندەردە ماسەلە تىپتەن ۋشىققان جاعدايدا بارلىق مالىمەتتەر مەن دەرەكتەر وسى قۇرىلىم ارقىلى جەتكىزىلمەك. مۇنداي ورتالىقتاردى نەگىزىنەن مەكتەپتەردە ورنالاستىرۋعا باسىمدىقتار بەرىلگەن. ولاردىڭ مەكەن-جايىن الەۋمەتتىك جەلىلەر ارقىلى حابارلاندىرۋ كوزدەلگەن. جەرگىلىكتى مەملەكەتتىك ورگاندار وكىلدەرى اتالعان سەكتورلار اياسىندا ءىس-قيمىل تانىتا باستادى.

بۇگىندە وبلىس ورتالىعىندا جانە تۇتاستاي ايماق اۋماعندا ساقتاندىرۋ شارالارى وڭ ناتيجەلەر بەرۋ ءۇشىن قالاعا تاياۋ جانە الىس شەتەلدەردەن ۇشاق جانە تەمىرجول قاتىناستارى ارقىلى كەلگەن جولاۋشىلاردى تەست ءتاسىلى بويىنشا قاتاڭ باقىلاۋ مەن تەكسەرۋ جۇمىستارى جۇرگىزىلۋدە. بۇل باعىتتا مەديتسينا ماماندارى مەن وزگە دە وكىلەتتى ورگان وكىلدەرى ۋاقىتپەن ساناسپاي جۇمىس ىستەۋدە. ارينە، بۇعان قاراپ وڭىردە كوروناۆيرۋستان ساقتانۋعا قاتىستى بارلىق ماسەلەلەر تۇبەگەيلى شەشىمىن تاپتى دەۋ ەرتەرەك سەكىلدى. اتاپ ايتقاندا ءدال قازىرگى كۇنى وڭىردە مەديتسينالىق بەت-پەردەنىڭ جەتىسپەۋ كوىرىنىستەرى بار ەكەنىن ەشكىم دە جوققا شىعارا المايدى. ەندەشە، تاياۋ كۇندەردە وڭىردەگى كاسىپورىندار مەن شاعىن تىگىن تسەحتارى ءوز قىزمەتىن ودان ءارى شيراتا تۇسۋلەرى قاجەت-اق. سونداي-اق تۇرعىنداردىڭ ايتۋىنشا قالا ءدارىحانالارىندا دەنەنىڭ قىزۋىن تۇسىرەتىن "پاراتسەتامول" پرەپاراتى تاپتىرا بەرمەيدى. ءوز كەزەگىندە فارماتسيا ماماندارى بۇل ولقىلىقتىڭ ورنىن تولتىرۋ شارالارىن بەلگىلەگەندەرى ءجون.            

سونىمەن بىرگە ورتالىق بازار مەن تەمىرجول ۆوكزالى ماڭىندا ءتيىستى سانيتارلىق نورمالاردىڭ ساقتالا بەرمەيتىنى دە ايتىلىپ قالىپ ءجۇر. مۇنداي كورىنىستەردىڭ ورىن الىپ جۇرگەنى دە شىندىق. سونداي-اق بىرقاتار قوعامدىق كولىك تازارتىلماي، جۋىلماي لاس كۇيىندە جۇرگىزىلىپ كەلگەنى دە قالا تۇرعىندارىنىڭ ورىندى وكپە-رەنىشتەرىن تۋعىزعان-دى. بۇعان بايلانىستى اقتوبە قالاسىنىڭ اكىمى اسحات شاحاروۆ ءوز تۇجىرىمىن تومەندەگىشە جەتكىزدى.

- اۆتوبۋستار مەن ايالدامالاردا كۇنىنە ەكى رەت دەزينفەكتسيا جۇمىستارىن جۇرگىزۋ قولعا الىندى. سوعان سايكەس 347 اۆتوبۋس پەن 280 ايالداماعا زالالسىزداندىرۋ شارالارى جاسالدى. قالا بيۋدجەتىنەن بۇل ماقساتقا 42 ميلليون تەڭگە ءبولىندى. الداعى كەزدە قاجەتتىلىككە قاراي تاعى دا قوسىمشا قاراجات كوزدەرى قاراستىرىلماق.

ارينە، بۇل ايتىلعاندارعا قاراپ اقتوبەدە كۇردەلى سانيتارلىق-ەپيدەميولوگيالىق احۋال ورنىققان ەكەن دەپ قابىلداساق شىندىققا كىرەۋكە ءتۇسىرىپ الامىز. مۇنداعى جاعداي نەگىزىنەن قالىپتى دەۋگە ابدەن بولادى. اقتوبە ەلىمىزدىڭ باتىس وڭىرىندەگى ءىرى  جول-كولىك لوگيستيكاسى ورتالىعى بولا تۇرسا دا، ءبىر دە ءبىر جولدىڭ جابىلماعانى الدىڭعى پىكىرىمىزدىڭ ايقىن ايعاعى. جامان ايتپاي، جاقسى جوق دەگەندەي قازىرگى كەزدە كەز كەلگەن قيىن، كۇردەلى جاعدايعا ءارى ونىڭ ۋشىعۋ كورىنىسىنە ساقاداي ساي ءازىر بوۋلىمىز كەرەكتىگىن ۋاقىتتىڭ ءوزى العا تارتۋدا. اگلومەراتسيا ورتالىعىنىڭ 23 سەكتورعا ءبولىنىپ، مۇنداي ارنايى بازا قۇرىلعانىنىڭ باستى سىرىن وسى تۇرعىدان ءتۇسىنۋ پارىز، - دەدى اقتوبە قالاسىنىڭ اكىمى.

 

اقتوبە

 

سوڭعى جاڭالىقتار

ىستىق تاماق تاراتتى

قازاقستان • كەشە

ۇقساس جاڭالىقتار