بريتانيانىڭ Daily Mail باسىلىمى قازاقستاننىڭ سولتۇستىك وڭىرىنەن تابىلعان بەلگىسىز پەنتاگراممانىڭ نە ەكەنىن تۇسىنبەي باس قاتىرۋدا. بۇل تۋرالى «نۇر استانا» گازەتى جازادى.
«بۇل وراسان پەنتاگرامما قازاقستاننىڭ الەمنەن تىس قالعان بولىگىندە بەينەلەنگەن. سۋرەت Google Earth-تە پايدا بولا سالا, ءارتۇرلى تەوريا ايتقاندار تابىلدى. ديامەترى 366 مەتر بولاتىن بەس جۇلدىزدى سيمۆول مەملەكەتتىڭ سولتۇستىگىندە, توبىل وزەنىنىڭ جوعارعى ساعاسىندا ورنالاسقان. ادەتتە پەنتاگراممالار ءىبىلىستىڭ قارعىسىمەن بايلانىستىرىلادى, سونداي-اق, باحاي دىنىندە, قىتايلىق داوسيزمدە, نەوپاگاندىقتاردا, ءتىپتى گرەك ماتەماتيگى پيفاگوردا كەزدەسەدى. مۇنداي بەلگىنىڭ جان بالاسى اياق باسپاعان جەردە ورنالاسۋى تۇسىنىكسىز», – دەيدى Daily Mail باسىلىمى.
بىرەۋلەر مۇنى بەلگىسىز شايتاني ۇيىمنىڭ قولتاڭباسى بولۋى مۇمكىن دەسە, ەكىنشىلەرى رەسەيدىڭ قۇپيا بازاسىنىڭ ورنى دەگەندى ايتادى. ۆاشينگتون شتاتىنىڭ تۇرعىنى كۋرت يەيتسLive Science-تىڭ ۋەب-سايتىندا سۋرەت تۋرالى ءوزىنىڭ ويىن جازىپتى: «بۇل زەنيتتىك باسقارۋ زىمىرانىن قولدانۋ ءۇشىن پايدالانىلعان ايماق سەكىلدى. مەن ۇشقىش بولىپ قىزمەت اتقارعاندىقتان مۇنداي بەلگىلەر جاقسى تانىس. رەسەيدىڭ (كەڭەس ۇكىمەتىنىڭ) اۋە قورعانىس قىزمەتى بۇلاردى پايدالانۋى مۇمكىن (نەمەسە ءالى پايدالانادى). دوڭگەلەك راداردىڭ قانشالىقتى دۇرىس جۇمىس ىستەپ تۇرعانىن انىقتاۋ ءۇشىن كەرەك. بەلگىنىڭ كولەمىن جانە بايقوڭىر عارىش ايلاعىنىڭ جاقىن ەكەنىن ەسكەرسەك, «سويۋز» عارىش كەمەسىن باسقارۋ ءۇشىن قولدانىلعان سەكىلدى».
بەيمالىم تاڭبانىڭ شايتاني ۇيىممەن بايلانىستى دەيتىندەردىڭ دالەلى – سۋرەتتى Googlemap-تان تاۋىپ, ينتەرنەتكە سالعان ەكى قولدانۋشىنىڭ نيگى «Adam» جانە «Lucifer» بولۋى. ەكى ەسىم دە ءىبىلىستىڭ اتىمەن بىرگە جۇرەدى. حريستيان دىنىندە پەنتاگرامما بەس سەزىم مەن يسانىڭ بەس دەڭگەيىن بىلدىرەدى. شايتاننان قورعايدى دەگەن تۇسىنىك تە بار. قالاي دەگەنمەن, بۇل تاڭبانىڭ توبىل وزەنىنىڭ بويىنا قايدان كەلگەنى تۇسىنىكسىز. دەگەنمەن, تۇبەگەيلى قورىتىندى الداعى ۋاقىتتىڭ ەنشىسىنە قالىپ وتىر.
باقىتبەك كەنەش ۇلى.
