ونىڭ ايتۋىنشا رەسەي استاناسى ماسكەۋدەن ۇشىپ كەلىپ اقتوبە اۋەجايىنا قونعان ۇشاقتىڭ سالونىندا ەكيپاج مۇشەلەرىن قوسپاعاندا ەلۋ سەگىز جولاۋشى بولعان. سول ساتتە ولاردىڭ ءبارى تەست ءتاسىلى بويىنشا تەكسەرۋدەن وتكىزىلگەن كەزدە ءبىر ايەل ادام كوروناۆيرۋس دەرتىن جۇقتىرعان دەگەن كۇدىكپەن ەرەكشەلەنىپ, تەست ناتيجەسىندە بۇل جاعىمسىز ءجايت تولىعىمەن راستالدى. بۇدان سوڭ تۇرعىلىقتى مەكەن-ءجايى اقتوبە بولىپ تابىلاتىن ايەل- ازاماتشا وبلىس ورتالىعىنداعى پروۆيزورلىق گوسپيتالگە جەتكىزىلگەن. قازىرگى كەزدە ناۋقاستىڭ ءجاي-كۇيى قالىپتى دەڭگەيدە دەدى گازەت تىلشىسىنە ودان ءارى ءا.قاليەۆ. بۇعان قوسا اعزاسىندا كوروناۆيرۋس بەلگىسى تابىلعان اقتوبەلىك ايەلمەن بىرگە ۇشىپ كەلگەن 56 جولاۋشى دا تەستىدەن وتكىزىلگەن سوڭ پروۆيزورلىق گوسپيتالگە اپارىلىپ وقشاۋلانعان.
تاۋارلار مەن قىزمەت كورسەتۋ ساپاسىن باقىلاۋ جانە قاۋىپسىزدىكتى ساقتاۋ جونىندەگى اقتوبە وبلىستىق دەپارتامەنتىنىڭ باسشىسى نۇرسۇلۋ بەركىمباەۆا قازىرگى كەزدە ولاردىڭ ءجاي-كۇيى قاناعاتتانارلىق جاعدايدا ەكەنىن جەتكىزدى. سونداي-اق ونىڭ ايتۋىنشا ۇشاق سالونىنداعى جولاۋشىلاردى ارنايى ازىرلەنگەن ورتالىققا ورنالاستىرعان سالالىق قىزمەتكەرلەردىڭ ءبارى دە ءتيىستى ءتارتىپ بويىنشا وقشاۋلانىپ, گوسپيتالگە جاتقىزىلعان.
تىكەلەي ەفيرگە قاتىسقان جاۋاپتى تۇلعالار تۇتاستاي العاندا قازىرگى كەزدە اقتوبە وبلىسىندا سانيتارلىق-ەپيدەميولوگيالىق جاعداي قالىپتى ەكەنىن مالىمدەدى. اقتوبە قالاسى كورانتينگە جابىلا ما؟ دەگەن باق وكىلدەرى تاراپىنان قويىلعان ساۋالعا ولار. بۇل ساۋالعا جاۋاپ قايتارۋ تىكەلەي ءوز قۇزىرلارى مەن وكىلەتتىلىگىنە كىرمەيتىنىن, ايتسە دە ازىرگە مۇنداي جاعداي كۇتىلىپ وتىرماعانىن, ءارى وعان نەگىز جوق ەكەنىن ايتىپ بەردى.
تىكەلەي ەفيردە جاسالعان باستى ءتۇيىن بۇدان كەيىنگى كۇندەرى وڭىردە باقىلاۋ مەن ساقتاندىرۋ شارالارى بارىنشا كۇشەيتىلەتىنى تۇرعىسىنان ءوربىدى.
اقتوبە
