ادامداردىڭ ءبىر-بىرىنە دەگەن ادال كوڭىلدەن تۋعان جاناشىرلىق پەيىلى تىرشىلىكتىڭ اق باس تولقىنىمەن الىسىپ, تاۋى شاعىلۋعا جاقىنداعان پەندەنىڭ كوڭىلىنە دەم بەرگەندەي. ءتىپتى قوس قولتىعىنان پەرىشتەدەي كوتەرىپ, جەلەپ-جەبەۋى ناعىز ادامگەرشىلىكتىڭ ايقىن مىسالى دەپ ايتساق, ارتىقتىعى بولماس. ءبىزدىڭ كەيىپكەرىمىز دامير ماريا زەلينسكايامەن كەزدەيسوق تانىسقان. توقساندى القىمداپ قالعان اپايدىڭ ءومىر جولىن ەستىپ-بىلگەننەن كەيىن ءبىر ادامعا بولسا دا كومەكتەسسەم دەگەن نيەت تۋىندادى. ازىق-ت ۇلىك پە, كۇندەلىكتى كەرەك-جاراقتار ما, ءبارىن اكەلىپ بەرەدى. ءبىر-بىرىمەن باۋىرلاسقان ادەمى ءسات جالعىز مارتە جۇزدەسۋدەن كەيىن تۋىنداپ وتىر.
جالعىز تۇراتىن قارتتارعا ماتەريالدىق كومەك قاجەت-اق. مۇنى تۇسىنگەن دامير از دا بولسا, بۇل يگى ىسكە ءوز ۇلەسىن قوسىپ كەلەدى. ءبىر-بىرىمىزگە كومەكتەسسەك, جۇرەگىمىزگە مەيىرىم تولادى دەيدى ءداميردىڭ ءوزى.
– بۇگىندە ادامدار جەكە باسىنىڭ ماسەلەسىن كۇيتتەپ كەتكەن. مەن كومەكتەسىپ جۇرگەن ماشا اجە ءوز قولىنان كەلگەنشە ماعان دا قولداۋ كورسەتۋدە. ول ماعان قاشان دا جاناشىر ەكەنىن بىلدىرەدى, ءاردايىم تىلەكتەس بولىپ جۇرەدى. ءوز اقىل-كەڭەستەرىن دە ايامايدى. اجەنىڭ كورگەنى كوپ, – دەيدى قالا تۇرعىنى دامير ءابىلوۆ.
بۇگىنگىدەي سىن ساعاتتا جانىنداعى جالعىزىلىكتى ادامعا جان نۇرىن سەبەزگىلەۋ ادام بويىنداعى اسىل قاسيەت. قارتتارىمىز قينالىپ قالماسىنشى ەكەن دەپ بويىندا كۇش-جىگەرى بار جاس تولقىن جاناشىر بولىپ جۇرسە جاراسىمدى.
– دامير ەكەۋىمىزدىڭ تانىسقاننان كەيىن, ءبىر-بىرىمىزگە باۋىر باسىپ قالدىق. ول مەنىڭ بالام سياقتى. ماعان قامقور بولىپ جۇرەدى. وسىنداي ساتتە ماعان سوناۋ 1955 جىلدار ەسىمە تۇسەدى. سول جىلدارى ءبىزدى تىڭ يگەرۋگە الىس ساپارعا جىبەردى. سوندا, سولتۇستىكتىڭ قازاقتارى ءبىزدى تۋعاندارىنداي قۇشاق جايا قارسى العان ەدى, – دەيدى تىل ەڭبەككەرى ماريا زەلينسكايا, – وسىنداي قامقورلىق تاعى دا قايتالانىپ وتىر. قيىن ساتتە قۇشاعىنا الىپ, جۇرەگىڭدى جىلىتاتىن قازاق حالقىنا مىڭ العىس.
