ايماقتار • 22 ناۋرىز، 2020

اقتوبەدە مەديتسينا قىزمەتكەرلەرىن ىنتالاندىرۋ شارالارى بەلگىلەندى

38 رەتكورسەتىلدى

تاس تۇسكەن جەرىنە اۋىر دەگەندەي، بۇگىنگى تاڭداعى كوروناۆيرۋس ىندەتى ءبىرىنشى كەزەكتە مەديتسينا قىزمەتكەرلەرىنە اتان-تۇيە تارتا المايتىنداي ءزىل باتپان اۋىر سالماق تۇسىرۋدە. ياعني، قازىرگى كۇردەلى جاعدايلارعا بايلانىستى ولارعا تۇسەتىن جۇكتەمە بىرنەشە ەسە ءتۇسىپ وتىر. وسىعان وراي اقتوبە ايماعىندا مەديتسينا قىزمەتكەرلەرىنىڭ قىزمەتىن قولداۋ مەن ىنتالاندىرۋعا قاتىستى بىرقاتار ءىس-شارالار كەشەنى بەلگىلەندى.

بۇل ءۇشىن ءبىرىنشى كەزەكتە جەدەل-جاردەم بريگادالارىنىڭ ءىس-قيمىلدارىن جۇيەلى جولعا قويۋ جونىندە ارنايى شەشىم الىنىپ، سالاداعى ساقتىق شارالارى كۇشەيتىلدى. سوعان ساي قاجەتتى مەديتسينالىق قۇرال-جابدىقتار قورى جاساقتالدى. اقتوبە وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ ايتۋىنشا مۇنداعى مەديتسينا قىزمەتكەرلەرىنىڭ ءبارى  56 مىڭ ءبىر رەت پايدالانىلاتىن بەت-پەردەمەن جانە 500 دانا ارنايى كيىم ۇلگىلەرىمەن قامتىلعان. بۇعان قوسا قوسىمشا كوپ رەتتىك كيىم قورلارى دا ازىرلەنگەن.

قازىرگى كۇنى وبلىستىڭ بارلىق اۋداندارىندا قاجەتتى قۇرال-جابدىقتارمەن تولىقتاي جاساقتالعان جەدەل جاردەم بريگادالارى جاۋاپتى جۇمىستاردىڭ بەل-ورتاسىندا ءجۇر. سونىڭ ىشىندە وبلىس ورتالىعىنداعى جەدەل جاردەم بريگادالارى شاقىرىلعان جەرگە كەشىكپەي تەز جەتۋ رەجيمىنە كوشىرىلگەن. بۇلاردىڭ قۇرامى بىلىكتىلىگى مەن كاسىبي دەڭگەيى جوعارى مەديتسينا قىزمەتكەرلەرى قاتارىنان ىرىكتەلىپ الىنعان.

«جەرگىلىكتى دەنساۋلىق ساقشىلارى ۆيرۋستىق بەلگىلەرى بويىنشا كۇدىك تۋعىزعان ازاماتتاردى وقشاۋلاۋ ماسەلەسىندە دە بەلسەندى ءىس-قيمىل تانىتىپ جۇرگەندەرىن ايتۋ پارىز. بۇل باعىتتاعى ازىرلەنگەن توسەك ورىنداردىڭ مولشەرى كۇننەن كۇنگە كوبەيىپ كەلەدى. تاياۋ ارادا ونىڭ سانىن كەم دەگەندە ءۇش مىڭعا دەيىن جەتكىزۋ ماقساتى قويىلعان. بۇعان قاجەتتى مۇمكىندىكتەر دە بار» دەپ مالىمدەدى ءا.قاليەۆ.

وڭىردە قازىرگى كۇردەلى كەزەڭدە ۋاقىتپەن ساناسپاي كۇندىز-ءتۇنى جۇمىس جاساۋعا ءبىر كىسىدەي جۇمىلعان مەديتسينا قىزمەتكەرلەرىن ماتەريالدىق جانە مورالدىق تۇرعىدان ىنتالاندىرۋدىڭ بىرنەشە جولدارى قاراستىرىلۋدا. ارينە ولاردىڭ جالاقىلارىن كوتەرۋ جونىندەگى تەتىك پەن وكىلەتتىلىك مۇمكىن جەرگىلىكتى اتقارۋشى ورگانداردىڭ نەمەسە وبلىس باسشىسىنىڭ قولىندا تۇرماعان دا شىعار. سوعان قاراماستان وبلىستا بۇل ءۇشىن جەرگىلىكتى بيۋدجەتتەن قوسىمشا قاراجات كوزدەرى قاراستىرىلىپ جاتقانى قولداۋعا ابدەن تۇرارلىقتاي.

ءتۇيىپ ايتقاندا بۇگىنگى كۇنى اقتوبەدە جاساقتالعان 840 باقىلاۋ ورنى كوز ىلمەستەن قىزۋ ءىس ۇستىندە.

اقتوبە

سوڭعى جاڭالىقتار

بەنزين باعاسى ارزاندادى

ەكونوميكا • كەشە

14 وتباسىعا قول ۇشىن سوزدى

قازاقستان • كەشە

ۇقساس جاڭالىقتار