قار قاڭتار, اقپان ايلارىندا قالىپتى مولشەردەن ەكى جارىم ەسە كوپ ءتۇستى. جاباي وزەنىندە مۇز جارۋ جۇمىستارى 13 ناۋرىزدا باستالدى. ەندىگى ماسەلە وزەن ارناسىن تازارتۋ.
– جاباي وزەنىن تازالاۋ وتە كۇردەلى ماسەلە. 2019 جىلى تولىق سمەتالىق قۇجاتى دايىندالعان. قاجەتتى قاراجات كولەمى 23 ميلليارد 400 ميلليون تەڭگە. قارجى ءبولۋ شەشىلىپ جاتىر. ەگەر بيىل شەشىلسە, ءبىرىنشى كەزەڭدەگى جۇمىس باستالادى, ۇزىن-ىرعاسى ءۇش جىلعا نەگىزدەلگەن,–دەيدى اتباسار اۋدانىنىڭ اكىمى امانبەك قالجانوۆ.
جاباي وزەنىنىڭ جاعالاۋىنداعى قاتەرلى ايماقتا ءالى 88 وتباسى تۇرىپ جاتىر. وبلىس اكىمى ەرمەك مارجىقپاەۆتىڭ تاپسىرماسىنا سايكەس بىلتىر 5 بىردەي 100 پاتەرلى تۇرعىن ءۇيدىڭ جوبالىق-سمەتالىق قۇجاتتارى ازىرلەندى. مەملەكەتتىك ساراپتامادان دا وتكەن. اپات ورىن الا قالعان جاعدايدا ادامداردى قاۋىپسىز جەرگە كوشىرۋ كوزدەلۋدە. ونداي جاعدايعا تاپ بولسا, قالاداعى 5 مەكتەپ ءازىر تۇر.
– الەۋمەتتىك نىساندار مەن 3 مەكتەپتى قۇم تولتىرىلعان قاپتارمەن قورشاۋ جۇمىستارى جۇرگىزىلىپ جاتىر. قالادا 5 مەكتەپ پەن اۋىلدىق جەرلەردەگى بارلىق ءبىلىم وشاقتارىنا ادامدار ۋاقىتشا كوشىرىلەتىن بولادى. تۇرمىسقا قاجەتتى بارلىق جاعدايلار جاسالادى. 350 ادامنان جاساقتالعان قۇتقارۋشى مەن 60-تان استام تەحنيكا دايىن,–دەيدى اۋداندىق توتەنشە جاعدايلار جونىندەگى ءبولىمىنىڭ باستىعى ەربولات اشكەنوۆ.
اۋداندا 79 مىڭ تەكشە مەتر قار قالا سىرتىنا شىعارىلعان. بۇدان بولەك, 8 شاقىرىم سۋاعارلار مەن ارىقتاردىڭ ارنالارى تازارتىلىپتى. اعىن سۋدىڭ الدىن-الۋعا جەرگىلىكتى بيۋدجەتتەن 25 ميلليون تەڭگە باعىتتالعان.
