ايماقتار • 19 ناۋرىز، 2020

بيىل جايىقتا سۋ كوبەيەدى

34 رەتكورسەتىلدى

بۇل جونىندە باتىس قازاقستان وبلىستىق ءماسليحاتىنىڭ كەزەكتى سەسسياسى وتىرىسىندا ءوڭىر باسشىسى عالي ەسقاليەۆ حابارلادى. اكىمنىڭ ايتۋىنشا، ناۋرىز ايىنىڭ باسىندا ورىنبور قالاسىندا وتكەن كەزدەسۋدە رەسەيلىكتەر يرەكلى سۋ قويماسىنان جىبەرىلەتىن سۋ مولشەرىن بىلتىرعىمەن سالىستىرعاندا ەكى ەسە كوبەيتۋگە كەلىسكەن.

مامانداردىڭ ايتۋىنشا جايىق وزەنىندەگى سۋ دەڭگەيى ناۋرىز ايىنىڭ سوڭىنا تامان كوتەرىلە باستاماق. وبلىس اكىمى مول سۋدى پايدالانىپ، وڭىردەگى سۋ قويمالارى مەن ارنالاردى بارىنشا تولتىرىپ الۋدى تاپسىرىپ وتىر.

باتىس قازاقستان وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى رينات شاۋەنوۆ بيىل رەسەي اۋماعىندا جاۋىن-شاشىن كوپ بولعانىن، بۇل سۋ قورىنىڭ 80 پايىزى رەسەي جەتىندە قالىپتاساتىن جايىق وزەنى ءۇشىن جاقسى جاڭالىق ەكەنىن ايتادى.

- كەلىسىلگەن كەستەگە سايكەس، ناۋرىزدىڭ 20-سىنان باستاپ جايىققا بەرىلەتىن سۋدىڭ مولشەرى سەكۋندىنا 60 تەكشەمەتر بولسا، 25 ناۋرىزدا – 90، ال ناۋرىزدىڭ سوڭىندا سەكۋندىنا 180 تەكشەمەتر سۋ بەرىلە باستايدى. جايىق ارناسىنىڭ 55 پايىز سۋ قورىن قۇرايتىن ساقمار وزەنىنىڭ دە دەڭگەيى بيىل جوعارى. سوندىقتان ءبىز بيىل كوكتەمدە جوعارىدان جايىققا كەلەتىن سۋ بىلتىرعىدان اناعۇرلىم كوپ بولادى دەپ كۇتىپ وتىرمىز، - دەيدى رينات ساتىم ۇلى.

بىلتىر باتىس قازاقستان وبلىسىندا سۋ تاپشىلىعىنان جايىق وزەنىنىڭ دەڭگەيى سوڭعى 50 جىلداعى ەڭ تومەن كورسەتكىشتى كورسەتىپ، ەكولوگيالىق اپات دارەجەسىنە تاياپ قالعان بولاتىن. ياعني جايىقتىڭ ورتاشا دەڭگەيى ادەتتە 594 سم شاماسىندا بولسا، بىلتىر ونىڭ كولەمى 240 سم-دەن اسپادى. ونىڭ ۇستىنە بيىلعى قىس قارسىز، جاۋىن-شاشىنسىز بولدى. ەكولوگتاردىڭ «ەگەر سۋ دەڭگەيى وسىلاي قۇلدىراي بەرسە، جايىق ماۋسىمدىق وزەن بولىپ قالۋى ابدەن مۇمكىن» دەگەن تۇجىرىمى جەرگىلىكتى تۇرعىنداردى قاتتى الاڭداتقان.

«بيىل جايىققا كەلەتىن سۋ كولەمى بىلتىرعىدان 2-2،5 ەسە كوپ بولادى» دەيدى عالي ەسقاليەۆ. ال وبلىستىڭ وڭتۇستىگىندەگى جانىبەك، قازتالوۆ جانە جاڭاقالا اۋداندارىنىڭ قاجەتى ءۇشىن ەدىل سۋىن جانىبەك سۋ ارناسىنا جانە قاراوزەن مەن سارىوزەنگە قۇيۋ ءۇشىن 2 ملرد تەڭگە قارجى رەسپۋبليكا بيۋدجەتىنەن قاراستىرىلعان. بۇل 72-75 ملن تەكشەمەتر سۋ دەگەن ءسوز.

- ءبىز رەسەيدەن كەلەتىن سۋ شىعىندارى ءۇشىن قوسىمشا تاعى 1 ملرد تەڭگەنىڭ جوبالىق قۇجاتىن جاساپ، قارجى سۇراپ وتىرمىز. ەگەر بۇل ۇسىنىستى ۇكىمەت قولداسا، وبلىستىڭ سۋعا قاجەتتىلىگى تولىق وتەلەدى، - دەيدى رينات شاۋەنوۆ.

باتىس قازاقستان

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار