اقان ساتاەۆ كانادالىقتارمەن بىرگە جاڭا فيلم تۇسىرمەك
بۇل كۇندەرى ەلىمىزدەگى «ساتايفيلم» كينوكومپانياسى كانادالىق Know Rules Media كينوكومپانياسىمەن بىرىگىپ, «حاكەر» كينوجوباسىن جۇزەگە اسىرۋعا كىرىسىپ كەتتى. قازاقستانداعى ەڭ تابىستى رەجيسسەر سانالاتىن اقان ساتاەۆ بۇعان دەيىن «رەكەتير», جاۋجۇرەك مىڭ بالا», «اداسقاندار», «ليكۆيداتور» اتتى كارتينالاردى ءتۇسىرىپ, وتاندىق كينەماتوگرافيادا ءوز بەدەلىن مىقتاپ بەكەمدەگەن سۋرەتكەر.
اقان ساتاەۆ كانادالىقتارمەن بىرگە جاڭا فيلم تۇسىرمەك
بۇل كۇندەرى ەلىمىزدەگى «ساتايفيلم» كينوكومپانياسى كانادالىق Know Rules Media كينوكومپانياسىمەن بىرىگىپ, «حاكەر» كينوجوباسىن جۇزەگە اسىرۋعا كىرىسىپ كەتتى. قازاقستانداعى ەڭ تابىستى رەجيسسەر سانالاتىن اقان ساتاەۆ بۇعان دەيىن «رەكەتير», جاۋجۇرەك مىڭ بالا», «اداسقاندار», «ليكۆيداتور» اتتى كارتينالاردى ءتۇسىرىپ, وتاندىق كينەماتوگرافيادا ءوز بەدەلىن مىقتاپ بەكەمدەگەن سۋرەتكەر.
ال جاڭا كينوجوبانىڭ سيۋجەتىنە كەلسەك, وندىردەي جاس جىگىت حاكەرلىكتىڭ ۇڭعىل-شۇڭعىلىن مەڭگەرە كەلە وڭاي ولجا تابۋعا قۇنىعا باستايدى. الايدا, ادام ءوزىنىڭ بارلىق ارەكەتىنە جاۋاپ بەرۋى ءتيىس قوي. كۇندەردىڭ كۇنىندە «جەڭىل كەلگەن اقشانىڭ» وتەۋى اۋىر بولارىن كىم بىلگەن... عالامتور كەزگەن قىلمىسكەر ءوزى قازعان وردان ءوزى شىعا الا ما؟ جاڭا كارتينا وسى جايىندا.
– ءبىز ءۇشىن ساتاەۆپەن سەرىكتەس بولۋ ۇلكەن مارتەبە. ءبىز ءوز تاراپىمىزدان تابىستى كينو ءتۇسىرۋ ءۇشىن قولدان كەلگەندى جاسايمىز, – دەيدى كينوجوبانىڭ بىرىككەن پروديۋسەرى سانجار سۇلتانوۆ.
ايتقانداي, Know Rules Media كينوكومپانياسىنىڭ پرەزيدەنتى – لوۋدەن وۋەن مىرزانىڭ ءداپ ءوزى. ول «تيتانيك», «پارك يۋرسكوگو پەريودا» اتتى اتىشۋلى كارتينالاردى تۇسىرگەن 3D تەحنولوگياسىمەن قامتاماسىز ەتىلگەن Softlmage كومپانياسىن قاراجاتتاندىرىپ, ىسكە قوسۋىمەن دە ايگىلى بيزنەسمەن.
سونداي-اق, جوبانى قازاقستاندىق ىسكەرلەر عالىمجان مەيرامبەكوۆ پەن جانبولات سەرىكوۆ قارجىلاندىراتىنى بەلگىلى بولىپ وتىر. سول سياقتى, دەمەۋشىلەر قاتارىندا Mobli كومپانياسىنىڭ نەگىزىن قالاعان ەركىن راقىشەۆتىڭ دا اتى اتالۋدا. ازىرگە كارتينا بيۋدجەتى قانداي قاراجاتتى قاجەت ەتەرى ايتىلعان جوق.
«حاكەر» كارتيناسىنىڭ كينوبازاسى تورونتو قالاسىندا قونىستاناتىن بولادى. ال الداعى قىركۇيەك ايىنان باستاپ قىزۋ دايىندىق جۇمىستارى قولعا الىنىپ, جاڭا كينوجوبا بەدەلدى حالىقارالىق كينوفەستيۆالدەردىڭ بىرىندە تانىستىرىلادى. ءفيلمدى ءتۇسىرۋ جۇمىستارى نيۋ-يورك, تورونتو, دۋباي مەن بانگكوكتا جالعاسادى.
ازىرگە كارتيناعا تۇسۋگە كاستينگ جۇرگىزىلمەگەن. دەگەنمەن, بىزگە بەلگىلىسى, باستى جانە ەكىنشى كەزەكتەگى رولدەردىڭ بارلىعىن امەريكالىق جانە كانادالىق اكتەرلار وينايتىن بولادى. ولاردىڭ اراسىندا الەمگە ايگىلى كينوجۇلدىزدار دا بار.
ايناش ەسالي,
«ەگەمەن قازاقستان».
الماتى.
