ماسكەۋدەن كەلگەن اتباسار اۋدانىنىڭ 3 ازاماتى ستاتسيونارعا جاتقىزىلدى. بۇلار ءبىر وتباسىنىڭ مۇشەلەرى. ولاردىڭ بالالارىنىڭ دەنە قىزۋى كوتەرىلگەن. ابىروي بولعاندا ۆيرۋس بەلگىلەرى انىقتالمادى. قازىر وڭىردە جاعداي تۇراقتى. كوروناۆيرۋس ىندەتىنە شالدىققاندار تىركەلمەگەن. ايماققا شەتەلدەن ۇشاقپەن كەلگەن 14 ادام قان تاپسىردى. ساراپتاما قورىتىندىسى كوروناۆيرۋس دەرتىنىڭ جوق ەكەندىگىن انىقتادى. قازىر وبلىستاعى بارلىق مەديتسينالىق ۇيىمداردا كارانتين جاريالانعان. ناۋقاستاردىڭ جاعدايىن سۇراي كەلگەندەر اۋرۋحاناعا كىرگىزىلمەيدى. ال ەمدەلىپ, قارالامىن دەۋشىلەرگە, جەدەل كومەككە مۇقتاج جاندارعا ەسىك اشىق.
– ءبىزدىڭ وڭىردەگى ينفەكتسيالىق ءبولىم وبلىستىق تۋبديسپانسەردە ورنالاسقان. ال بولجالدى ءبولىم تەرى-ۆەنەرولوگيالىق ديسپانسەرىندە. كارانتيندىك گوسپيتال جوعارى مەديتسينالىق كوللەدجىنىڭ جاتاقحاناسىندا دايىندالعان. قانداي دا ءبىر جاعداي ورىن السا, مەديتسينالىق قىزمەتكەرلەرىمىز دايىن. گوسپيتالدىق كارانتينعا ءار ادام تۇرعىلىقتى مەكەنجايى بويىنشا جىبەرىلەدى. ياعني, وبلىس ورتالىعىنا كەلۋدىڭ قاجەتى جوق. ال تۇرعىندارعا مۇمكىندىگىنشە ۇيدە بولىڭىزدار دەگىم كەلەدى, – دەيدى وبلىستىق دەنساۋلىق ساقتاۋ باسقارماسى جەتەكشىسىنىڭ مىندەتىن اتقارۋشى سۇلەن ءىلياسوۆ.
ۆەدومستۆو وكىلى ءوڭىر تۇرعىندارىنا كوپ اداممەن بايلانىسقا تۇسپەۋگە شاقىردى. ويتكەنى, الەم تاجىريبەسىنە ساي, بارىنشا ساقتىق شارالارىن ۇستانىپ, ۇيدە بولعان ابزال. ايتا كەتەيىك, قازاقستاندا كوروناۆيرۋس ىندەتىن جۇقتىرعاندار سانى 39-عا جەتتى. قازىر وڭىردەگى قوعامدىق ورىندار جابىلىپ, بىرقاتار مەكەمە قىزمەتكەرلەرى قاشىقتىقتان جۇمىس ىستەۋدە. سونداي-اق الداعى ەكى اپتانىڭ ىشىندە ونلاين كەڭەس بەرۋ جۇمىسى ىسكە قوسىلماق. ماسەلەن, الىس اۋداندارداعى ەمدەلۋشىلەرگە وبلىس دارىگەرلەرىنىڭ الدەبىر سىرقاتقا قاتىستى ساراپتاما قورىتىندىسى قاجەت بولسا, ونى ونلاين تۇردە الۋعا بولادى.
كوكشەتاۋ قالاسى
