–پرەزيدەنت اكىمشىلىگىنىڭ كەلىسىمىمەن تسەلينوگراد اۋدانىنىڭ اكىمى بولىپ باقىتبەك امانتاي ۇلى وسپانبەكوۆ تاعايىندالادى. باقىتبەك امانتاي ۇلى 1968 جىلى دۇنيەگە كەلگەن. اقمولا وبلىسىنىڭ تۋماسى. تسەلينوگراد ينجەنەرلىك-قۇرىلىس ينستيتۋتىندا ءبىلىم العان,–دەدى وبلىس اكىمى.
باقىتبەك وسپانبەكوۆ 2018 جىلدىڭ ءساۋىر ايىنان بەرى وبلىستىق مەملەكەتتىك ساۋلەت-قۇرىلىس باقىلاۋ باسقارماسىنىڭ جەتەكشىسى قىزمەتىن اتقارعان. تۇرعىن ءۇي-كوممۋنالدىق شارۋاشىلىعى جانە قۇرىلىس سالالارىنداعى تاجىريبەسى مول. وسى اۋداندا اكىمنىڭ ورىنباسارى قىزمەتىن اتقارعان.
ەرمەك مارجىقپاەۆ بۇعان دەيىن 6 جىل تسەلينوگراد اۋدانىنىڭ اكىمى قىزمەتىن ابىرويمەن اتقارعان مالعاجدار تاتكەەۆكە العىس ءبىلدىردى. وسى جىلدار ىشىندە مالعاجدار ساتتار ۇلى ءوڭىردىڭ وركەندەۋىنە ەلەۋلى ۇلەس قوسىپ, ەلدى مەكەندەردىڭ ينفراقۇرلىمىن جاڭعىرتۋعا كوپ كۇش جۇمسادى. تاعايىنداۋدان كەيىن, وبلىس اكىمى ەرمەك بورانباي ۇلى اۋدانداعى كوكتەمگى سۋ باسۋ قاۋپىنە قارسى ارەكەت ەتۋدىڭ بارىسىن باعامدادى. تالاپكەر جانە نۇرەسىل اۋىلدارىنىڭ اراسىن جالعاعان كوپىردىڭ بۇگىنگى جاي-كۇيىمەن تانىستى.
12 ناۋرىزدا تالاپكەر اۋىلىنىڭ تۇسىنان وتەتىن ەسىل وزەنىنىڭ 1 شاقىرىم ارناسىن تۇزەتۋ جانە تەرەڭدەتۋ شارالارى جۇرگىزىلگەن ەدى. جاعالاۋدى بەكىتۋ جۇمىستارى دا اياقتالعان. وبلىس اكىمى ەرمەك مارجىقپاەۆ سۋ باسۋ قاۋپىنە قارسى شارالاردى تاۋلىك بويى باقىلاۋدى تاپسىردى.
تسەلينوگراد اۋدانى,
اقمولا وبلىسى.
