ەكىنشىدەن, اتالعان ماسەلەگە جۇرتشىلىقتىڭ نازارىن اۋدارىپ, ورتاق جاۋاپكەرشىلىكتى كۇشەيتە ءتۇسۋدى دىتتەيتىندىگىن بىلدىرەدى. وسىدان شىعار, دەپارتامەنت جانە اۋدان باسشىلارى تاراپىنان الدارقاتىپ سويلەۋ, ناقتى جاعدايدى جۇمسارتىپ, قولعا العان ءىستى كوتەرمەلەپ كورسەتۋ بولعان جوق. ريزا بولدىق. ويتكەنى, تابيعات مۇندايدى كوتەرمەيدى. اسىرەسە, اتباسارلىقتار ءۇشىن.
اتباسار اۋدانىندا 5 گيدروتەحنيكالىق قۇرىلعى بار. ماڭىزدى نىساندار جەرگىلىكتى اتقارۋشى ورگانداردىڭ باقىلاۋىندا. ءتىپتى, ارنايى قۇرىلعان شتاب بۇل وڭىرلەردە قوسىمشا بەكەتتەر قۇرۋدى جوسپارلاپ قويىپتى. بۇل شتاب قۇرامىندا ءارتۇرلى كاسىپورىنداردان تارتىلعان 350 ادامدىق ءتورت وترياد جۇمىس ىستەۋدە. بيىلعا بولجام بويىنشا اتباسار قالاسى مەن 8 اۋىلدىق وكرۋگتىڭ ەلدى-مەكەندەرى اپاتتى اۋماق سانالىپ وتىر. وسىعان بايلانىستى, پولتاۆكا, پوكروۆكا, ياروسلاۆكا, ماكەەۆكا, اقان قۇرمانوۆ وكرۋگتەرى ماڭىنداعى ەسىل, جاباي, جىلاندى, كاشكاركا (قوشقار) وزەندەرى, شاعىن كولدەر, جار-جىرالار ارناسى كەڭەيتىلىپ, جابايى وسكىندەردەن تازارتىلعان جانە اۋىلىشىلىك كوشەلەر قاردان تازارتىلۋدا.
ءبىز اتباسارعا بارعان كۇنى جاباي وزەنىندەگى مۇزدى جارۋ شارالارى وتكىزىلدى. وبلىستىق توتەنشە جاعدايلار دەپارتامەنتى باسشىسىنىڭ ورىنباسارى, ازاماتتىق قورعانىس پولكوۆنيگى قانات دوسپاەۆ وبلىستاعى 125 ەلدى مەكەندى اعىن سۋلار باسۋ قاۋىپى بارلىعىن ايتادى. اسىرەسە, تسەلينوگراد, اتباسار, ساندىقتاۋ, ارشالى جانە ەرەيمەنتاۋ اۋداندارىندا توتەنشە جاعدايلار قاۋىپى باسىم. بەكىتىلگەن جوسپارعا سايكەس, اۋدان اكىمدىكتەرى توسىن جاعدايلاردىڭ الدىن الۋ شارالارىن جۇرگىزۋدە. «بۇگىنگى كۇنگە دەيىن اۋىلداردان 1 ميلليون تەكشە مەتردەن استام قار شىعارىلدى جانە بۇل جۇمىس جالعاسۋدا»,–دەيدى ق.دوسپاەۆ. 10 ناۋرىزدا وزەندەردە مۇز جارۋ جۇمىسى باستالدى. بۇل وبلىستاعى ون اۋداننىڭ 70 ۋچاسكەسىن قامتيدى. ارشالى جانە تسەلينوگراد اۋداندارىنداعى وزەندەردە بۇل ءىس ويداعىداي وتكىزىلدى.
اۋدان اكىمىنىڭ ورىنباسارى بىرلىك قامباتىروۆتىڭ سوزىنەن سۋ تاسقىنىنا قارسى شارالارعا بيۋدجەتتەن 23 ميلليون تەڭگە قارجى بولىنگەنىن بىلدىك. ەلدى مەكەندەردەن 76,5 مىڭ تەكشە مەتر قار شىعارىلسا, بۇنىڭ 40 مىڭى اتباسار قالاسىنىڭ ەنشىسىندە ەكەن. قالانىڭ شىعىس بولىگىندەگى ەڭىستى كەسىپ وتەتىن جاباي وزەنىنە ساندىقتاۋ, جاقسى اۋداندارى باعىتىنداعى ساي-جىرالارعا دالالىق القاپتان جينالعان اعىن سۋ كەلىپ قوسىلادى. وسىنداي تابيعي جىرالار قالانىڭ لوندون, تەمىر بەتون كومبيناتى اتالاتىن اۋماعىندا كوبىرەك. مۇنداعى جۇمىستارمەن تانىسۋ بارىسىندا جەرگىلىكتى تۇرعىن الەكساندر وكۋلشامەن تىلدەستىك. ول جاقسى جاعىنداعى توعانداردىڭ السىزدىگىنەن اعىن سۋ كوپتەپ جايىلاتىندىعىن ايتادى. «الدىن الۋ شارالارى ەندى باستالىپ جاتىر. كەش قالماساق جارايدى عوي. تەحنيكا مەن ادام كۇشىن كوبەيتۋ قاجەت»,–دەيدى وتكەن جىلدار زاردابىن تارتقان تۇرعىن.
اتباسار اۋدانىق توتەنشە جاعدايلار ءبولىمى باسشىسىنىڭ مىندەتىن اتقارۋشى بولات شابەزوۆتەن بۇل ماسەلەگە قاتىستى «جاباي وزەنىندەگى قورعانىشتىق توعان نىعايتىلىپ, ەنى 10-30 مەترلىك 2 شاقىرىمدىق اۋماق تابيعي وسكىندەردەن تازارتىلدى جانە 870 مەترلىك سۋ اڭعارى بيىكتەتىلدى. قالا اۋماعىنداعى 6900 مەترلىك ساي-جىرا كەڭەيتىلىپ, تازارتىلدى. جوسپاردان تىس №1 ورتا مەكتەپ اۋدانىنداعى «سەيفۋللين» شليۋزىندە جوندەۋ جۇمىستارى اتقارىلدى»,-دەگەن جاۋاپ الدىق.
جالپى, سۋ تاسقىنى قاۋىپى بولجانعان اۋماقتا 167 وتباسىنىڭ ءۇي-جايى بولسا, سونىڭ 87-ءسى اتباسار قالاسىندا ورنالاسقان. اقپان ايىنان بەرى ارنايى شتاب مۇشەلەرى مەن توتەنشە جاعدايلار ءبولىمىنىڭ قىزمەتكەرلەرى تۇرعىندار جينالىسىن وتكىزىپ, اۋلالاردى ارالاپ, تۇسىنىك جۇمىستارىن جۇرگىزدى جانە وزەن جاعالاۋىنداعى 400-دەن استام وتباسىنا ەسكەرتۋ قاعازدارىن تاپسىرىپتى. «كوكتەم 2020» شاراسى اياسىندا مەكتەپتەر مەن ەڭبەك ۇجىمدارىندا ارنايى وقۋ-جاتتىعۋلارى وتكىزىلگەن. سونداي-اق, سۋ الۋ قاۋىپىندەگى №1 ورتا مەكتەپتە 100 قۋما مەترلىك الاڭعا قۇم سالىنعان 1940 قاپ, №4 مەكتەپتە 1400, مەكتەپ ينتەرناتتا 350 قاپ ىقتىرما قويىلعانىن كوردىك. اتى جۇرتقا ءمالىم №1 مەكتەپتە بۇل جۇمىس ءالى دە جالعاسۋدا. ماسەلەن, ءبىز وسىندا بولعان كەزدە «اگروكومپلەكس اتباسار» جشس–نەن ارداق مۋستافين باستاعان توپ قىزۋ ءىس ۇستىندە ەكەن. ول الگى لوندون مولتەك اۋدانىنىڭ تۇرعىنى. «ۇنەمى الاڭداۋمەن كۇن كەشەتىن قالا تۇرعىندارى بيىل الدىن الۋ شارالارىنا جۇمىلا قاتىسۋدا. اۋدان ورتالىعىنداعى بارلىق كاسىپورىنداردان ءار جەردە ارنايى توپتار جۇمىس ىستەپ جاتىر. بيىل ءبىزدىڭ كوشەلەرىمىزدە ەكى مەتر تەرەڭدىكتەگى ارىقتار قازىلدى. قار قىس بويى تاسىمالدانىپ جاتتى. بۇل ىلعالدىڭ مولدىعىنا قاراماستان, اپاتتى جاعداي ورىن المايتىندىعىنان ۇمىتتەندىرەدى. مۇندا كاسىپورىنداردان بولىنگەن كىسىلەر مەن ەرىكتىلەر جۇمىس ىستەۋدە. اۋدان ورتالىعىندا توتەنشە جاعداي بولا قالعان جاعدايدا تۇرعىنداردى, مال مەن قۇستى ۋاقىتشا ورنالاستىرۋ ورىندارى بەلگىلەنىپتى.
اۋداندا «سۋ تاسقىنىنىڭ الدىن الۋ جانە ونىڭ سالدارىن جويۋدىڭ 2017-2020 جىلدارعا ارنالعان كەشەندى شارالارى» جول كارتاسى اياسىنداعى جۇمىستار ءوز ناتيجەسىن بەرۋدە, دەيدى اۋدان باسشىلارى. كوكتەمگى قاۋىرت كەزەڭدە ينجەنەرلىك, سۋ ايداۋ جانە ەۆاكۋاتسيالىق ماقساتتاعى 46 ارنايى تەحنيكا, 9 موتوپومپا جانە ءجۇزۋ قۇرالى ىسكە كىرىسەدى. وسىنىڭ ءبارىن ەسكەرگەندە «اعىن سۋ مىنەز تانىتار كۇن جاقىن, ال, وعان اتباسارلىقتار قانداي قام جاساۋدا؟» دەگەن ساۋالىڭىزعا ءبىرشاما جاۋاپ العانداي بولدىق.
اتباسار اۋدانى,
اقمولا وبلىسى.
