ايماقتار • 17 ناۋرىز، 2020

الماتىدا ۋربانيزاتسيا ماسەلەسى تالقىلانىپ جاتىر

302 رەت كورسەتىلدى

الماتىدا  «كولىك سەكتورىندا شەشىم قابىلداۋ. الماتى مەن باسقا قالالاردىڭ تاجىريبيەسى» اتتى اناليتيكالىق ەسەپتىڭ تانىستىرىلىمى جانە بريفينگى ءوتىپ جاتىر. 

ءىس-شارانى سوروس-قازاقستان قورىنىڭ قولداۋىمەن Urban Forum Kazakhstan ۇيىمداستىردى.  

كولىك قالا دامۋىندا اسا ماڭىزدى ءرول وينايدى، سول سەبەپتى قالالار كولىك جوبالارى مەن يننوۆاتسيالىق باعدارلامالارعا ۇلكەن ءۇمىت ارتادى. سوڭعى ون جىلدا الماتى تۇرعىندارىنىڭ كولىك ايداۋ دەڭگەيى جىل سايىن شامامەن 10 پايىزعا ارتىپ وتىردى. قالانىڭ كەڭەيىپ، قالا ماڭىنىڭ دامۋى كەپتەلىستەردىڭ ۇلعايۋىنا اكەلىپ، بۇل قاربالاس قوزعالىس ۋاقىتتارىندا عانا ەمەس، سونىمەن بىرگە، تۇسكى ۋاقىتتا دا ۇلكەن ماسەلەگە اينالدى. كەپتەلىستەر قورشاعان ورتاعا زيان كەلىتىرىپ قانا قويماي، قالا ەكونوميكاسىنا دا زالال كەلتىرىپ وتىر. ماسەلەن، ساراپشىلاردىڭ ەسەپتەۋىنشە، تەك 2013 جىلدىڭ ءبىر وزىندە كەپتەلىستەر سەبەپتى قالا ەكونوميكاسى كۇن سايىن 210 ملن. تەڭگە مولشەرىندە شىعىنعا باتقان. الماتى باستى كولىك ماسەلەلەرىن شەشۋ ءۇشىن سوڭعى 7 جىل ىشىندە قانداي شەشىمدەر قابىلدادى، بۇل تاجىريبەنى باسقا قالالاردىڭ تاجىريبەسىمەن قالاي سالىستىرۋعا بولادى؟

Urban Forum Kazakhstan كولىك جونىندەگى مامانى رومان بارابانوۆ قۇجاتتا  كەلتىرىلگەن مىسالدار قالا كولىك سەكتورىنىڭ كولىك ينفراقۇرىلىمىن جانە دە جەردى پايدالانۋ سالاسىن ساپالى تۇردە ۇزاق مەرزىمدى جوسپارلاۋعا قاتتى تاۋەلدى ەكەندىگىن ايتادى. 

«قالانى دامىتۋ ستراتەگياسى دەڭگەيىندە قوعامدىق كولىكتىڭ جەكە كولىككە قاراعاندا باسىمدىعىن بەلگىلەۋ قاجەت. سونداي-اق، اۋماقتاردا قۇرىلىس جۇرگىزۋ ءۇشىن رۇقسات بەرۋ كەزىندە قالا موبيلدىلىگى باسقارماسى، قالانى جوسپارلاۋ  جانە ۋربانيستيكا باسقارماسى، قالا قۇرىلىسىن باقىلاۋ باسقارماسى اراسىنداعى ارەكەتتەردى ۇيلەستىرۋ قاجەتتىلىگى اسا وتكىر بولىپ تۇر» دەدى.

رۇقساتتاردى بەرۋ كەزىندە جاڭا نىساننىڭ كولىك جەلىسىنە اسەرىن، سونداي-اق، قوعامدىق كولىككە دەگەن سۇرانىستى قاناعاتتاندىرۋ مۇمكىندىگىن باعالاۋ مىندەتتى بولۋى ءتيىس» دەيدى ول بۇگىن ءوتىپ جاتقان ونلاين رەجيمىندەگى جيىندا. كولىك جونىندەگى ماماندار قالا اكىمشىلىگى تۇراقتى موبيلدىلىكتى ىلگەرىلەتۋ، قالا كولىكتەرىنەن اۋاعا شىعارىلاتىن قالدىقتاردى تومەندەتۋ جانە ازاماتتاردىڭ قانداي كولىككە ارتىقشىلىق بەرەتىندىگىن ءتۇسىنۋ ءۇشىن قانداي شارالاردى قابىلداپ جاتقاندىعىنا تالداۋ جۇرگىزدى. ەسەپتە الماتىنىڭ مىسالىندا كولىك ساياساتىنداعى شەشىمدەرگە، سونداي-اق، الماتىنىڭ جەرگىلىكتى تاجىريبەسىن دامىعان جانە دامىپ جاتقان ەلدەردىڭ تاجىريبەسىمەن سالىستىرۋعا ەرەكشە ءمان بەرىلدى.

ساراپشى ەلەنا ەرزاكوۆيچ كولىك سالاسىن جوسپارلاۋ الماتى ءۇشىن جاڭا ءپان ەمەس ەكەنىن ايتتى. الايدا وتكەن جىلداردىڭ تاجىريبەسى كورسەتكەندەي، ءجيى رەتتە كوشەلەر مەن جاڭا جول ايىرىقتاردى سالۋ، جولداردى جوندەۋدەن باسقا بارلىق شەشىمدەر ەكىنشى-ءۇشىنشى ورىنعا قويىلىپ كەلەدى، ال بۇل ءىس-شارالار قالانىڭ باس جوسپارىندا كورسەتىلگەنىمەن، كوپتەگەن جىلدار بويى جۇزەگە اسىرىلماپتى. «سونداي-اق، موبيلدىلىك باسقارماسىنىڭ قىزمەتكەرلەرىندە شەشىمدەردى قابىلداۋ كەزىندە كولىك قوزعالىسىن مودەلدەۋ ناتيجەلەرىن پايدالانۋ بويىنشا داعدىلاردىڭ جوقتىعى دا ۇلكەن ماسەلە تۋدىرىپ وتىر. بۇل ماماندار قانداي دا ءبىر جوبالاردىڭ تيىمدىلىگىن باعالاۋدىڭ ورنىنا، كوبىنەسە كۇندەلىكتى شاعىمدارعا ءمان بەرەدى، ياعني جۇيەلى جۇمىس جۇرگىزۋدىڭ ورنىنا جىرتىقتى جاماۋمەن الەك» دەدى ول. 

گۇلبارشىن ساباەۆا،

«Egemen Qazaqstan»

سوڭعى جاڭالىقتار

QazaqGaz ديرەكتورلار كەڭەسىنىڭ قۇرامى وزگەردى

قازاقستان • 02 جەلتوقسان، 2022

ماۋلەن اشىمباەۆ قىتاي حالقىنا كوڭىل ايتتى

پارلامەنت • 02 جەلتوقسان، 2022

ۇقساس جاڭالىقتار