قازاقستاندا كوروناۆيرۋستىق ينفەكتسيانىڭ ودان ءارى تارالۋىنا جول بەرمەۋ شارالارى تۋرالى دەنساۋلىق ساقتاۋ ءمينيسترى ە. ءبىرتانوۆ, ەكونوميكانى تۇراقتاندىرۋ تۋرالى ۇلتتىق ەكونوميكا ءمينيسترى ر. دالەنوۆ, ءىرى ساۋدا نىساندارىنىڭ جۇمىسىن شەكتەۋگە قاتىستى جاعداي مەن الەۋمەتتىك ماڭىزى بار تاۋارلاردىڭ باعاسى, وڭىرلەردەگى احۋال تۋرالى ساۋدا جانە ينتەگراتسيا ءمينيسترى ب. سۇلتانوۆ, كولىك سالاسى تۋرالى يندۋستريا جانە ينفراقۇرىلىمدىق دامۋ ءبىرىنشى ۆيتسە-ءمينيسترى ق. وسكەنباەۆ, قوعامدىق قاۋىپسىزدىكتى قامتاماسىز ەتۋ تۋرالى ىشكى ىستەر ءمينيسترى ە. تۇرعىمباەۆ, اقپارات جانە بايلانىس سالاسىنداعى جاعداي تۋرالى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى ا. جۇماعاليەۆ, ءبىلىم بەرۋ سالاسىنداعى احۋال تۋرالى ءبىلىم جانە عىلىم ءمينيسترى ا. ايماعامبەتوۆ, قارجىلىق تۇراقتىلىقتى قامتاماسىز ەتۋ تۋرالى قارجى نارىعىن رەتتەۋ جانە دامىتۋ اگەنتتىگىنىڭ توراعاسى م. ابىلقاسىموۆا جانە ۇلتتىق بانك توراعاسى ە. دوساەۆ باياندادى.
وبلىس اكىمدەرى مەن رەسپۋبليكالىق ماڭىزى بار قالالار اكىمدەرىنىڭ كوروناۆيرۋستىڭ تارالۋىنا جول بەرمەۋ جانە وڭىرلەردە الەۋمەتتىك-ەكونوميكالىق تۇراقتىلىقتى قامتاماسىز ەتۋ بويىنشا قابىلدانىپ جاتقان شارالار تۋرالى باياندامالارى تىڭدالدى.
ۇكىمەت باسشىسى بارلىق ۇيىمدار مەن نىسانداردا سانيتاريالىق-ەپيدەمياعا قارسى شارالار وتكىزۋ, ءدارىحانالار جەلىسىن ءدارى-دارمەكتەرمەن جانە جەكە قورعانىش قۇرالدارىمەن قامتاماسىز ەتۋ بويىنشا شارالاردى كۇشەيتۋدى تاپسىردى.
ىشكى ىستەر مينيسترلىگى مەن ارنايى مەملەكەتتىك ورگاندارعا كوروناۆيرۋستىڭ تارالۋىمەن كۇرەسۋگە تارتىلعان مەديتسينالىق جانە كارانتيندىك نىسانداردى قورعاۋدى كۇشەيتۋ تاپسىرىلدى.
«ساۋدا جانە ينتەگراتسيا مينيسترلىگى ءىرى ساۋدا جەلىلەرىمەن جانە ازىق-ت ۇلىك تاۋارلارىنىڭ جەتكىزۋشىلەرىمەن, سونداي-اق اكىمدىكتەرمەن بارلىق قاجەتتى ونىمدەر مەن العاشقى قاجەتتىلىك تاۋارلارىن ۇزدىكسىز قامتاماسىز ەتۋ ماسەلەسىن پىسىقتاۋى ءتيىس», — دەدى ا. مامين.
پرەمەر-مينيستر تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنە جوعارى جىلدامدىقتى ينتەرنەتتىڭ جۇمىس ىستەۋى مەن قىزمەتتەردى بارىنشا ەلەكتروندى تۇردە كورسەتۋدى قامتاماسىز ەتۋدى جانە قاشىقتىقتان جۇمىس ىستەۋ رەجيمىنە كوشۋدى ىنتالاندىرۋدى تاپسىردى.
«اكىمدەر مەملەكەت باسشىسىنىڭ توتەنشە جاعدايدى ەنگىزۋ تۋرالى جارلىعىنا سايكەس جەرگىلىكتى جەرلەردە تىيىم سالىنعان جانە شەكتەۋ قويىلعان شارالاردى ىسكە اسىرۋدى جەكە باقىلاۋعا الۋى ءتيىس. بارلىق ازاماتتارعا ەلدەگى تۇراقتى جاعدايدى ساقتاۋ جانە قازاقستاندا كوروناۆيرۋستىڭ تارالۋىن بولدىرماۋ ءۇشىن بارىنشا كۇش سالۋ قاجەت», — دەپ تۇيىندەدى ا. مامين.
