اباي • 13 ناۋرىز، 2020

ۇلى اقىننىڭ مۇرالارى - وتىرار تورىندە

تۇركىستان وبلىسى وتىرار اۋدانىندا اباي قۇنانباەۆتىڭ 175 جىلدىق مەرەيتويىنا ارنالعان «شەجىرەلى شىڭعىستاۋدان – كيەلى وتىرارعا» تاقىرىبىندا جىلجىمالى كورمەنىڭ سالتاناتتى اشىلۋى ءوتتى.

Egemen Qazaqstan

«كورمەنى اشىپ بەرگەن وتىرار اۋدان اكىمى ءجۇنىسوۆ ابدىعالي ايتجان ۇلى: «ابايدىڭ مەرەيتويى – قازاقستان مادەنيەتى مەن ادەبيەتىنىڭ، قازاقتىڭ ءسوز ونەرىنىڭ مەرەكەسى. ونىڭ ونەگەلى ءومىرى مەن عاجايىپ تۋىندىلارى حالقىمىزدىڭ يگىلىگىنە ماڭگى قىزمەت ەتە بەرەدى. بارشاڭىزدى قازاقتىڭ باس اقىنى، اعارتۋشى، فيلوسوف، جازبا ادەبيەتىنىڭ نەگىزىن سالۋشى اباي قۇنانباەۆتىڭ قۇرمەتىنە ارنالعان كورمەنىڭ سالتاناتتى اشىلۋىمەن شىن جۇرەكتەن قۇتتىقتايمىن!» - دەپ، اتالعان كورمەنى ۇيىمداستىرعان ابايدىڭ «جيدەباي-ءبورىلى» مەملەكەتتىك قورىق-مۋزەيىنىڭ ۇجىمىنا ريزاشىلىعىن بىلدىرە وتىرىپ، العىس حاتىن تابىس ەتتى.

قازاقتىڭ ۇلى اقىنى اباي قۇنانباەۆتىڭ 175 جىلدىعىنا ارنالعان كورمەنىڭ اشىلۋىنا قۇتتىقتاۋ ءسوز العان حالىق اقىنى اسەلحان قالىبەكوۆا مەن نۇرتازا الدابەرگەنوۆ اباي مۇراسى - قازاقتىڭ ەڭ قاسيەتتى، تەڭدەسى جوق، التىن قازىناسى ەكەندىگىن جەتكىزىپ، وسىنداي يگى ءىس-شارالار ارقىلى حالقىمىز عۇلاما ابايدىڭ رۋحاني دۇنيەسىنە تەرەڭ بويلاپ، ونىڭ ۇلىلىعىنىڭ تىڭ قىرلارىن اشىپ، جاڭا سىرلارىنا قانىعا تۇسەتىندىگىن ايتتى.

كورمەنىڭ اشىلۋ سالتاناتىندا ۇلى اقىننىڭ ولەڭدەرى مەن اندەرى شىرقالىپ، جاس اقىن گاۋحار جۇسىپاليەۆا اباي قۇنانباەۆقا ارناعان جىرىن وقىدى.

ابايدىڭ «جيدەباي-ءبورىلى» مەملەكەتتىك قورىق-مۋزەيىنىڭ جەتەكشى عىلىمي قىزمەتكەرى نۇرسۇلۋ ومىربەكوۆا كورمەنىڭ ماقساتى مەن مازمۇنىنا توقتالىپ، وتىرار وڭىرىنە اباي مۇرالارىن ناسيحاتتاۋعا قولداۋ بىلدىرگەن وتىرار قورىق-مۋزەيى ۇجىمىنا العىس ءبىلدىردى.

ابايدىڭ «جيدەباي-ءبورىلى» مەملەكەتتىك قورىق-مۋزەيىنىڭ قورىنداعى اباي قۇنانباي ۇلىنىڭ ءومىرى مەن شىعارماشىلىعىنا قاتىستى تاريحي قۇجاتتار مەن ارحيۆتىك دەرەكتەر، قۇندى قولجازبالارىمەن جابدىقتالعان كورمەنى ابايدىڭ «جيدەباي-ءبورىلى» مەملەكەتتىك قورىق-مۋزەيىنىڭ جەتەكشى عىلىمي قىزمەتكەرى نۇرجان ەرلان ۇلى تانىستىردى. سونداي-اق كورمەدە ابايدىڭ ءومىر سۇرگەن كەزەڭى جانە ونىڭ اينالاسىنا قاتىستى تاريحي تۇلعالار تۋرالى، ابايدىڭ اقىندىق ونەر اينالاسى جانە سەمەي قالاسىنداعى 80 جىلدىق تاريحى بار قاسيەتتى قارا شاڭىراق ابايدىڭ «جيدەباي-ءبورىلى» مەملەكەتتىك قورىق-مۋزەيىنىڭ تاريحى مەن ابايتانۋ عىلىمىنىڭ دامۋى حاقىندا مول ماعلۇماتتار الۋعا بولادى.

ۇلى اقىننىڭ مۇرالارى وتىرار اۋدانىنىڭ تۇرعىندارى مەن قوناقتارىنا ءبىر اي كولەمىندە ناسيحاتتالادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز