ايماقتار • 12 ناۋرىز، 2020

تاراز ماڭىنداعى تۇرعىن القاپتارىنىڭ ماسەلەلەرىن شەشۋ جولدارى قانداي؟

31 رەت كورسەتىلدى

تاراز قالاسىنداعى كەيبىر شەتكى اۋداندار مەن ساياجاي القاپتارىنىڭ قوردالانعان ماسەلەلەرىن شەشۋ – بۇگىنگى ماسەلەنىڭ ءبىرى. بۇل رەتتە جامبىل وبلىسىنىڭ اكىمى بەردىبەك ساپارباەۆ مۇنداعى تۇرعىندارمەن كەزدەسۋلەر وتكىزىپ، ولارعا ءتۇيىندى ماسەلەلەردىڭ جەرگىلىكتى بيۋدجەتتىڭ مۇمكىنشىلىگىنە قاراي كەزەڭ-كەزەڭىمەن شەشىلەتىندىگىن اشىق ءتۇسىندىرۋدىڭ ماڭىزدىلىعىن باسا ايتقان بولاتىن. سونىمەن قاتار اكىم الەۋمەتتىك مەكەمەلەر مەن قاجەتتى ينفراقۇرىلىمداردىڭ قۇرىلىسى قوماقتى قارجىنى تالاپ ەتەتىنىن،  دەگەنمەن وزەكتى ماسەلەلەردى شەشۋ ءۇشىن كەز-كەلگەن جاعدايدا ءتيىستى شارالاردى قابىلداۋ كەرەكتىگىنە دە نازار اۋدارعان.

تاراز قالاسىنىڭ اكىمى ايتقازى قارابالاەۆتىڭ ايتۋىنشا، شالعاي قاراسۋ تۇرعىن القابىندا 25 كەلۋشىگە ارنالعان دارىگەرلىك امبۋلاتوريانىڭ قۇرىلىسىن جۇرگىزۋدى كاسىپكەردىڭ ءبىرى ءوز موينىنا الىپ وتىر ەكەن. ول ءۇشىن ارنايى جەر تەلىمى دە بولىنگەن. ەمدەۋ مەكەمەسىنىڭ قۇرىلىسى اعىمداعى جىلى باستالىپ، اياقتالادى دەپ كۇتىلۋدە. امبۋلاتوريا كەلىسىم-شارتقا سايكەس سەنىمگەرلىك باسقارۋعا بەرىلەدى. سونداي-اق قازىرگى تاڭدا اتالعان القاپتا تۇراتىن 2 388 بالا قالانىڭ ءتۇرلى ءبىلىم وشاقتارىنا قاتىناپ وقيدى. سوندىقتان دا جاڭا مەكتەپ سالۋ قاجەتتىگى بار. قالا اكىمدىگىنىڭ مالىمەتىنشە، الدىن-الا ەسەپكە سايكەس جوبا قۇنى 2،1 ميلليارد تەڭگەنى قۇراپ وتىر ەكەن. دەگەنمەن، بەردىبەك ساپارباەۆ 600 ورىندىق مەكتەپ ءۇشىن بۇل وتە جوعارى باعا ەكەنىن، جوبا قۇنىن قايتا قاراۋ كەرەكتىگىن ەسكەرتتى. بۇل ورايدا اكىم قۇرىلىس تەك كەلەسى جىلى، قۇجاتتامالار مەن مەملەكەتتىك ساراپتامانىڭ قورىتىندىسى دايىندالعاننان كەيىن باستالۋى مۇمكىن ەكەندىگىن العا تارتىپ، ازىرگە بالالاردى تاسىمالداۋ ءىسىن دۇرىس ۇيىمداستىرۋ قاجەتتىگىنە كوڭىل ءبولدى. سونىمەن قاتار شالعاي قاراسۋدىڭ جەتى جاڭا تۇرعىن القابىنا اۋىز سۋ مەن ەلەكتر جەلىلەرىن تارتۋ دا ۇلكەن ماسەلەنىڭ ءبىرى. بۇل جۇمىستارعا بيۋدجەتتەن ءبىرىنشى كەزەڭدە 570 ميلليون تەڭگە، ەكىنشى كەزەڭدە 450 ميلليون تەڭگە قاراستىرۋ كەرەك ەكەن. بۇگىندە ءتيىستى قۇجاتتارى دايىندالۋ ۇستىندە. جوبالاردى جۇزەگە اسىرۋ كەلەسى جىلدىڭ جوسپارىندا. سونداي-اق بارلىق جولداردى بىردەن اسفالتتاۋ مۇمكىن ەمەس بولعاندىقتان، بىرقاتار كوشەلەرگە قيىرشىق تاس توسەلسە، كەيبىر جولدار اعىمداعى جىلى جوندەۋدەن وتپەك.

سونىمەن قاتار تاراز قالاسىنىڭ اكىمى ايتقازى قارابالاەۆ جەكە اۆتوبۋس پاركتەرىنىڭ قوعامدىق كولىكتەرى شەتكى اۋداندارعا قاتىناي بەرمەيتىنىن اتاپ ءوتىپ، كەلەسى كونكۋرس تالاپتارىندا وسىنداي تيىمدىلىكتەردى ەسكەرۋ كەرەكتىگىن ايتادى. اتالعان تۇرعىن القاپتاعى تاعى ءبىر ماسەلە – جەرگىلىكتى كوشەلەردىڭ تارىلۋى. ونداعى كوپتەگەن تۇرعىنداردىڭ رۇقساتسىز ءار ءتۇرلى شارۋاشىلىق قۇرىلىستارىن جۇرگىزۋى قوعامدىق كولىكتەردىڭ قوزعالىسى ءۇشىن ىڭعايسىزدىق تۋعىزۋدا. جالپى، بۇل ماسەلەلەر قالانىڭ بارلىق ساياجاي القاپتارىنا ورتاق. 

القاپتاردى ەلەكتر جەلىلەرىمەن قامتۋعا 1،5 ميلليارد تەڭگە، اۋىز سۋمەن قامتاماسىز ەتۋگە 2 ميلليارد تەڭگە قاجەت. «تارازدىقتار قوعامدىق كولىكتەردىڭ جاعدايىنا جانە ولاردىڭ جۇمىس كەستەسىنە شاعىمدانۋدا. شاعىن اۆتوبۋستاردى ىڭعايلى وتاندىق كولىكتەرمەن اۋىستىرۋ كەرەك. قوعامدىق كولىك كەمىندە 22:00 ساعاتقا دەيىن جۇمىس ىستەۋگە  مىندەتتى. بۇل تالاپ كەلىسىم شارتتا ناقتى جازىلۋى ءتيىس. بيۋدجەتتىك باعدارلامالار اكىمشىلەرى وسى شارتتىڭ ورىندالۋىن قاتاڭ باقىلاۋدا ۇستاعانى ابزال»، دەدى جيىندا بەردىبەك ساپارباەۆ. سونىمەن قاتار وسى ماسەلەنى تاراز قالاسى اكىمىنىڭ ءتيىستى ورىنباسارىنا تاپسىردى. جيىندا وبلىس اكىمى ساياباقتاردى، سكۆەرلەر مەن اللەيالاردى وبلىستىق باسقارمالارعا بەكىتۋ، تاراز تۇرعىندارىن تارتا وتىرىپ، اۋقىمدى سەنبىلىكتەر وتكىزۋدى باستاۋ تۋرالى تاپسىرماسىن قايتا نىقتادى.

 

جامبىل وبلىسى

سوڭعى جاڭالىقتار

«بارىس» ۇتىلىپ قالدى

سپورت • 06 ناۋرىز، 2021

ەلدوس سمەتوۆ كۇمىس الدى

سپورت • 06 ناۋرىز، 2021

«قايرات» – قولا جۇلدەگەر

ايماقتار • 06 ناۋرىز، 2021

ۇقساس جاڭالىقتار