الدىن-الا جۇرگىزىلگەن بولجامدارعا سايكەس ايماقتا 125 ەلدىمەكەندى سۋ باسۋ قاۋپى بار كورىنەدى. ولاردىڭ 45-ءى ءىرى وزەن-كولدەردىڭ جاعالاۋىندا ورنالاسقان.
– كوكتەمگى سۋ تاسقىنىنىڭ الدىن-الۋ ءبىر كۇندىك ماسەلە ەمەس. سوندىقتان بۇل جۇمىستار بىرنەشە جىل قاتارىنان جانە ۇزدىكسىز جۇرگىزىلىپ كەلەدى. سينوپتيكتەر ناۋرىز ايىنىڭ سوڭعى اپتاسىندا كۇرت جىلىناتىنىن بولجاپ وتىر. وسىعان وراي, مۇز جارۋ جۇمىستارى 10 ناۋرىزدا باستالعان. سونىمەن قاتار وزەن ارنالارىن تازارتۋ, وتكەلدەردى قورشاۋ قولعا الىنعان. اسىرەسە ەسىل, شاعالالى, جاباي, قالقۇتان, سىلەتى وزەندەرىنىڭ قازىرگى جاعدايى سىن كوتەرمەيدى. ەلدىمەكەندەردەگى ىلعال كولەمى جىلدىق مولشەرلەمەدەن بىرنەشە ەسە اسىپ جىعىلادى. سۋ تاسۋ قاۋپىنە وراي ايماقتا 97 باقىلاۋ بەكەتى قۇرىلعان, – دەيدى وبلىستىق توتەنشە جاعدايلار جونىندەگى دەپارتامەنتىنىڭ باستىعى الەكسەي سوۆەتوۆ.
توتەنشە جاعدايلاردىڭ الدىن-الۋ ماقساتىندا ايماقتا 225,6 توننا جانار-جاعارماي, 24 مىڭ توننا ينەرتتى ماتەريال جانە 85 مىڭعا جۋىق قاپشىق ازىرلەنگەن. بۇدان بولەك 60 ءجۇزۋ قۇرالى مەن 229 سۋ سورۋعا ارنالعان تەحنيكا دايىن. ەلدى مەكەندەردەن 1 ميلليون 103 مىڭ تەكشە مەتردەن استام قار شىعارىلعان. 27 شاقىرىم سۋ ارناسى تازارتىلىپ, رەتكە كەلتىرىلسە, 16 شاقىرىم بوگەت جوندەلىپ, ىرگەسى نىعايتىلدى. كۇن كۇرت جىلىناتىن بولسا, قاۋىپ-قاتەر ەسەلەنە تۇسپەك.
– ايماقتاعى ىلعال كولەمى 2017 جىلى ورىن العان سۋ تاسقىنى كەزىندەگى مولشەردەن ءبىر جارىم, ەكى ەسە كوپ. ساندىقتاۋ, تسەلينوگراد, قورعالجىن جانە استراحان اۋداندارىندا قار قالىڭ. كوپ جىلعى باقىلاۋلارعا سايكەس جايىلما وزەن-سۋلارداعى مۇزدىڭ قوزعالۋى ناۋرىز ايىنىڭ ءۇشىنشى ونكۇندىگىنە ءدوپ كەلەدى. قازىر اتباسار مەن ساندىقتاۋ اۋداندارىندا سۋ تاسقىنىنىڭ قاۋپى وتە جوعارى. بۇعان ىلعال قورىنىڭ قالىپتى شامادان تىس, ياعني, 2 ەسە جوعارى بولۋى سەبەپ بولىپ تۇر, – دەيدى «قازگيدرومەت» رەسپۋبليكالىق كاسىپورنى وبلىستىق فيليالىنىڭ ءبولىم جەتەكشىسى نادەجدا گوريشكينا.
اپات ايتىپ كەلمەيدى. ايتسە دە, وڭىردە 3 مىڭعا جۋىق قۇتقارۋشى, 1 مىڭنان استام تەحنيكا ءازىر تۇر. دەگەنمەن, تابيعاتتىڭ توسىن مىنەزىنە توسقاۋىل بولۋ قيىن.
اقمولا وبلىسى
