2006 جىلى مەكتەپتىڭ ىرگەسى قالانعاننان بەرى جاس ۇرپاقتى اباي مەن شاكارىم تاعىلىمىندا تاربيەلەۋ, جەكە تۇلعانىڭ شىعارماشىلىق قۇزىرەتتىلىگىن دامىتۋ باعىتىندا اشىلعان «اباي-شاكارىم» كلۋب-مۇراجايى جىلدان-جىلعا تولىسىپ كەلەدى. باستى نىسانامىز – جاس بۋىندى جوعارى ينتەللەكتۋالدى, رۋحاني باي, ومىرگە الەۋمەتتىك جاعىنان بەيىمدەلگەن تۇلعا رەتىندە قالىپتاستىرۋ جانە ءبىلىم مەن تاربيە ىسىندە اۋەلى ۇلتتىق قۇندىلىقتاردى شاكىرت بويىنا ءسىڭىرۋ.
اباي مەن شاكارىم شىعارمالارىنىڭ, باسقا دا كورنەكتى اقىن-جازۋشىلار مەن عالىمداردىڭ قۇندى وي-پىكىرلەرىمەن ۇندەستىگى اياسىنداعى كەزدەسۋلەردىڭ ۇرپاق ءۇشىن ماڭىزى زور. وسى ورايدا بەلگىلى قوعام قايراتكەرلەرى, عالىمدار, اقىن-جازۋشىلارمەن جۇزدەسۋلەر ءجيى وتكىزىلەدى. اتالعان ماقساتتا ۇيىمداستىرىلعان دوڭگەلەك ۇستەلگە ل.ن.گۋميلەۆ اتىنداعى ەۇۋ وقىتۋشىسى, فيلولوگيا عىلىمدارىنىڭ كانديداتى ومار جالەل, كورنەكتى الاش قايراتكەرى قوشكە كەمەڭگەروۆتىڭ ۇرپاعى, ل.ن.گۋميلەۆ اتىنداعى ەۇۋ قازاق ادەبيەتى كافەدراسىنىڭ دوتسەنتى قايىربەك كەمەڭگەر جانە اقىن الماحان مۇحامەتقاليقىزى قاتىسىپ, ابايتانۋ مەن شاكارىمتانۋ, الاشتانۋ باعىتىنداعى وسكەلەڭ ۇرپاقپەن بايلانىستىڭ ماڭىزىنا توقتالعان بولاتىن. وسى ءۇردىس ءارى قاراي جالعاسىن تاۋىپ, سەمەيدەگى اباي قورىق-مۇراجايىنىڭ ءبولىم مەڭگەرۋشىسى مەيرامگۇل قايرانباەۆا, قولجازبالار جانە سيرەك كىتاپتار ۇلتتىق ورتالىعى ديرەكتورىنىڭ ورىنباسارى قايىرجان كۇزەمباەۆ جانە تاعى باسقا زيالىلارمەن جارقىن كەزدەسۋلەر ءوتتى.
ءبىلىم ورداسى باس شاھارداعى «دارىن» ورتالىعىمەن, وقۋشىلار سارايىمەن, «اتامەكەن» ەتنوكەشەنىمەن, مۇراجايلارمەن, ۇلتتىق كىتاپحانامەن تىعىز بايلانىس ورناتقان. «اباي-شاكارىم» ورتالىعىندا جىل سايىن قالالىق «اباي-شاكارىم» وقۋلارى ۇيىمداستىرىلىپ كەلەدى. بيىل دا ابايدىڭ 175 جىلدىق مەرەيتويى قارساڭىندا مەكتەپتەگى ءار ساباق ابايدىڭ قاناتتى سوزدەرىمەن ساباقتاستىرىلىپ وتكىزىلۋدە. مەكتەپ ۇستازدارى مەن وقۋشىلارى ءبىر-بىرىنەن چەللەندج قابىلداپ, اقىن ولەڭدەرى مەن اندەرىن ناسيحاتتاۋعا ۇلەس قوسۋدا. اباي توپىراعىن باسىپ, ەرەكشە شابىتپەن ورالعان شاكىرتتەرىمىز عىلىمي جوبالارىن جەتىلدىرىپ جاتىر. شاكارىم اتىنداعى ءپان كابينەتى دە ءبىلىم ورداسىنىڭ اتالعان ەسىمگە لايىقتى ەكەنىن بايقاتادى.
سوندىقتان «مەن ولسەم, ۇرپاعىم, ارتىمدا قالارسىڭ, شاتتىقپەن شالقىتىپ, انىمە سالارسىڭ» دەپ شاكارىم جىرلاعانداي, اقىن اماناتىنا ادالدىق تانىتىپ كەلە جاتقان №56 مەكتەپ-ليتسەيىنىڭ ۇيىمشىل ۇستازدار قاۋىمى مەن وقۋشىلارىن ءالى تالاي بەلەس كۇتىپ تۇر دەپ ويلايمىز.
روزا حالەسوۆا,
شاكارىم اتىنداعى №56 مەكتەپ-ليتسەيى «اباي-شاكارىم» ورتالىعىنىڭ جەتەكشىسى
