«قتج» ۇلتتىق كومپانياسىنىڭ يننوۆاتسيالار مەن ءبىلىمدى باسقارۋ سالاسىنداعى ساياساتى يدەيا گەنەراتسياسىن ىنتالاندىرۋ جانە قولايلى يننوۆاتسيالىق ورتا قالىپتاستىرۋ بويىنشا جۇيەلى شارالاردى جاساۋعا باعىتتالىپ وتىر. س.مىڭباەۆ اتاپ وتكەندەي, قىزمەتكەرلەر وندىرىسكە يننوۆاتسيانى ەنگىزۋدە كومپانيانىڭ نەگىزگى قوزعاۋشى كۇشى سانالادى. ون جىل ىشىندە ەكونوميكالىق تيىمدىلىگى 1,3 ملرد تەڭگەدەن اساتىن 12 مىڭنان استام ۇتىمدى ۇسىنىس تىركەلگەن. ال 2019 جىلى ەكونوميكالىق تيىمدىلىگى 61 ملن تەڭگەنى قۇرايتىن 986 ۇسىنىس وندىرىسكە ەنگىزىلىپتى. وسى رەتتە, كومپانيانىڭ جاس قىزمەتكەرلەرىن يننوۆاتسيالىق پروتسەسكە تارتۋعا «مەنەدجمەنت جوباسى» بايقاۋى زور مۇمكىندىك بەرگەنى ايتىلدى. سالا قىزمەتكەرلەرىنىڭ ونەرتاپقىشتىق قىزمەتىن ودان ءارى دامىتۋ جانە قولداۋ الداعى ۋاقىتتا دا جالعاسىن تابا بەرمەك.
– بۇگىندە بىزدە 570 تالگو ۆاگونى بار. بارلىعى تولىق جۇمىس ىستەيدى. جەرگىلىكتى قىزمەت كورسەتۋ دە ۇلعايتىلدى. ءبىز قىزمەت كورسەتۋ كەلىسىمشارتىنىڭ باعاسىن بارىنشا ارزانداتتىق. بيىل كومپانيا تاريفتىك جۇك اينالىمىنىڭ كولەمىن 226,4 ملرد تەكشە نەتتودان تومەن ەمەس, ياعني وتكەن جىلعى كولەمنەن 1% ارتىق ورىنداۋ مىندەتىن العا قويىپ وتىر. بۇل تاپسىرمانى جۇك تيەۋ كولەمىن ارتتىرۋ ەسەبىنەن ورىنداۋ مەجەلەنۋدە. ساندىق كورسەتكىشتەرمەن قاتار ساپالىق كورسەتكىشتى جاقسارتۋ, ياعني تارتىمدىق جىلجىمالى قۇرامدى ءتيىمدى پايدالانۋ جۇمىستارىن جالعاستىرۋ كوزدەلىپ وتىر, – دەدى س.مىڭباەۆ.
ونىڭ ايتۋىنشا, ەڭبەك ونىمدىلىگىن ارتتىرۋ جانە كومپانيانىڭ دامۋ مەن وڭتايلاندىرۋ ساياساتىن جۇزەگە اسىرۋ ماقساتىندا «تسيفرلى ترانسفورماتسيا» باعدارلاماسىنىڭ جوسپارلارىن ىسكە اسىرۋ جالعاسادى. تەمىر جول ينفراقۇرىلىمىن دامىتۋ باعىتىندا بيىل 495 شاقىرىم جولعا كۇردەلى جوندەۋ جۇمىستارى جۇرگىزىلۋگە ءتيىس. ونىڭ ىشىندە, جىلدىق جوسپاردىڭ 68 پايىزى ترانزيتتىك پويىزدار جۇرەتىن جولداردىڭ تەحنيكالىق جاعدايىن جاقسارتۋعا باعىتتالىپ وتىر.
سونىمەن قاتار ول 3-ءشى, 4-ءشى دارەجەلى اقاۋلى جولداردىڭ كەم-كەتىگىن ۋاقىتىلى تۇزەمەۋ نەمەسە تۇزەسە دە ساپاسى سىن كوتەرمەۋى «جولداعى ءدۇمپۋ» وقيعالارىنا اكەلىپ وتىرعانىن تىلگە تيەك ەتتى. ايتسە دە قوزعالىس قاۋىپسىزدىگى رەۆيزورلارى جۇرگىزگەن تەكسەرۋلەر ءتيىمدى ءارى ناتيجەلى بولعان. تەكسەرىستىڭ ناتيجەسىندە تەحنيكالىق قۇرالداردىڭ ىستەن شىعۋى كەمىپ, پويىزداردىڭ كەشىگۋى ازايا تۇسكەنى وسىعان دالەل.
وتكەن جىلى رەۆيزورلىق اپپارات تاراپىنان 7 مىڭنان استام تەكسەرىس جۇرگىزىلىپ, 90 مىڭعا جۋىق سايكەسسىزدىك انىقتالعان. سونداي-اق 500 قىزمەتكەر اتتەستاتسيالاۋدان وتە الماعان.
جيىن سوڭىندا ساۋات مىڭباەۆ كوروناۆيرۋسقا قاراماستان قازاقستان قىتايمەن اراداعى جۇك تاسىمالىن توقتاتپايتىنىڭ ايتتى. دەسە دە اقپان ايىندا ترانزيت كولەمى 39 پايىزعا ازايعان. «بۇل قوماقتى كورسەتكىش, قتج-نىڭ قارجىلىق احۋالىنا اسەر ەتەتىنى ءسوزسىز, سەبەبى كونتەينەرلىك ترانزيت ءبىز ءۇشىن پايدالى», دەدى ول. كومپانيا باسشىسى الداعى ۋاقىتتا جۇك اينالىمىن ۇلعايتۋعا كۇش سالاتىنىن جەتكىزدى.
مۇحتار كۇمىسبەك,
«Egemen Qazaqstan»
