كوكتەمگى سۋ تاسقىنىنىڭ الدىن الۋدا ءالى دە ولقىلىقتار ورىن الىپ وتىر. ماسەلەن, جانار-جاعارماي قورى جەتىسپەيدى. ينەرتتى ماتەريالدار سالاتىن قاپ تا جەتىمسىز. وبلىستاعى سۋ باسىپ قالۋ قاۋپى بار ەلدى مەكەندەردەگى قاردى تازالاۋ ىركىلىسپەن جۇرگىزىلۋدە. وبلىستىق توتەنشە جاعدايلار دەپارتامەنتىنىڭ باسشىسى الەكسەي سوۆەتوۆتىڭ ايتۋىنا قاراعاندا, ارشالى, استراحان, بۇلاندى, بۋراباي, ەرەيمەنتاۋ, ەسىل ءتارىزدى بىرقاتار اۋداندا ولقىلىقتار ورىن الىپ وتىر. تاياۋدا توتەنشە جاعدايلاردىڭ الدىن الۋ جانە زاردابىن جويۋ جونىندەگى وبلىستىق كوميسسيانىڭ وتىرىسىندا وبلىس اكىمى ەرمەك مارجىقپاەۆ بارلىق اۋدان اكىمدەرىنە, جولاۋشىلار كولىگى جانە اۆتوموبيل جولدارى باسقارماسى, «قازاۆتوجول» وبلىستىق فيليالى, اقىلى اۆتوموبيل جولدارى ديرەكتسياسى, «قازاقستان تەمىر جولى» اق فيليالىمەن بىرلەسە وتىرىپ, سۋ وتەتىن قۇرىلعىلاردى مۇقيات تازارتىپ, سۋ قويمالارىنىڭ دايىندىعىن تەكسەرۋدى تاپسىردى. وبلىس اكىمى ناۋرىزدىڭ ونىنا دەيىن گيدروتەحنيكالىق قۇرىلعىلاردى جاڭعىرتۋ جونىندە مىندەت قويدى. سونداي-اق تاۋلىك بويى كەزەكشىلىك ۇيىمداستىرۋ شارت. ال سۋ تاسقىنىنا دايىندىعى ناشار اۋدان باسشىلارىنا ناقتى تاپسىرما بەردى.
وتكەن جىلدارداعى سۋ تاسقىنىنان تۇيگەن تاجىريبەگە قاراعاندا, قاۋىپ ەڭ الدىمەن سۋى مول, ارناسى كەڭ ەسىل, جاباي ءتارىزدى ءىرى وزەندەردىڭ بويىنان سۋدىڭ ىركىلىسسىز وتۋىنە بايلانىستى. قارعىن سۋ ساي-سالامەن وزەنگە قۇيىلعان كەزدە لىقسىعان سۋ اقپاي قالىپ, جاعالاۋدى شايىپ كەتىپ جاتىر. سوندىقتان ەڭ ءبىرىنشى سۋ الۋ قاۋپى بار ەلدى مەكەندەردەگى سۋ وتكىزەتىن جۇيەنى تاپ-تۇيناقتاي ەتىپ تازارتقان ءجون. قىس بويى تۇسكەن قار ءوز الدىنا, ناۋرىزدا دا قار ارالاس جاڭبىر جاۋىپ, ىلعالدى مولايتا تۇسۋدە. دالاداعى جۇمىسپەن بىرگە قالاداعى دايىندىقتى دا جەرىنە جەتكىزە اتقارعان ءلازىم.
سۋ باسىپ قالۋ قاۋپى بار 54 ەلدى مەكەننىڭ ماڭىنداعى سۋ جۇرەتىن 26,8 شاقىرىم كانالدىڭ تابانىن تەرەڭدەتۋ كوزدەلگەن. 16,5 شاقىرىم دامبانى نىعايتۋ جوسپارلانعان. ونىڭ ۇستىنە ۋاقىتشا 17,1 شاقىرىم سۋ بوگەتىن سالۋ قولعا الىنعان. 41 سۋ وتكىزەتىن قۇرىلعى قايتادان جابدىقتالدى.
توتەنشە جاعدايلار دەپارتامەنتىنىڭ ءىس-شارالارىنا 1 ملرد 179 ميلليون تەڭگە قارجى باعىتتالىپ وتىر. ونىڭ 128,2 ملن تەڭگەسى توتەنشە جاعدايلار قورى, 861,6 ملن تەڭگەسى كەزەك كۇتتىرمەس شارالارعا ارنالعان. قالالىق جانە اۋداندىق بيۋدجەتتەر ەسەبىنەن قوسىمشا تاعى دا 189,2 ملن تەڭگە قاراستىرىلعان.
قازىر وبلىستا 225,6 توننا جانار-جاعارماي قورى بار. 24,1 مىڭ توننا ينەرتتى ماتەريالدار دايىندالعان. ەلدى مەكەندەردەن 1 ملن 103,4 مىڭ تەكشە مەتر قار شىعارىلدى. بۇل باعىتتاعى جۇمىس ءالى دە جالعاسا تۇسەتىن بولادى. قازىرگى كۇنى اپاتتىڭ الدىن الۋعا 1921 ادام مەن 979 تەحنيكا دايىن تۇر. ەگەر كوكتەمگى قارعىن سۋ بوي بەرمەي بارا جاتسا, وبلىس اۋماعىندا العاشقى توپقا كومەككە كەلەتىن 814 ادام مەن 160 تەحنيكا, 31 دانا ءجۇزۋ قۇرالدارى ساقاداي ساي. «جامان ايتپاي جاقسى جوق» دەگەندەي, قارعىن سۋ باسۋ قاۋپى بار ەلدى مەكەندەردىڭ تۇرعىندارىن ۋاقىتشا پانالاتۋ ءۇشىن 192 ورىن دايىندالعان. ولاردىڭ 147-ءسى ءبىلىم بەرۋ نىساندارى بولسا, ال 45-ءى باسقا دا عيماراتتار.
قازىر وبلىستاعى جاعداي ءجىتى قاداعالانۋدا. الداعى تاۋلىكتەردەن باستاپ 97 جەردە كەزەكشىلىك ۇيىمداستىرىلادى.
اقمولا وبلىسى
