ۇستاز بولۋ مىندەتتى تۇردە شاكىرتتى وقىتۋ ەمەس. تالانتتى تاپ باسىپ تانۋ, قارلىعاشتىڭ قاناتىمەن سۋ سەپكەندەي بولسا دا قامقورلىق كورسەتۋ دە ۇستازدىقتىڭ بەلگىسى بولسا كەرەك. اسىلحان شۇڭىرەكوۆ دەگەندە, كوز الدىمىزعا سىرباز, ساليقالى, دومبىرانى جانىنا سەرىك ەتكەن سال-سەرىنىڭ كەيپى ەلەستەيدى. ءوزى تۋرالى كوپ ايتا بەرمەيتىن, جارناماعا جوق ازاماتتىڭ تالانتتى تۇڭعىش تانىعان تۇلعا ەكەنى شىن. مۇنى ءبارى ايتىپ تا ءجۇر. شىن تالانت ءوزى-اق جارىپ شىعادى, بىراق جاناشىرلىقتىڭ, اعالىق ءىلتيپاتتىڭ, ءارى-بەرىدەن سوڭ بالا بولسا دا ونىڭ تالانتىنا دەگەن قۇرمەتتىڭ ءوزى ادامدىق پەن ادالدىقتىڭ كورىنىسى.
ارينە, مەيرامبەكتىڭ اتىن قالىپتاستىرۋدا, حالىققا تانىتۋدا التىنبەك قورازباەۆتىڭ ەڭبەگى ەرەكشە. بىراق ودان بۇرىن اسىلحان شۇڭىرەكوۆتىڭ دە اعالىق قامقورلىعىن ايتپاي كەتۋگە بولمايدى. «1978 جىلى اۋىلدان كەلىپ, جامبىل قالاسىنداعى كاسىپتىك-تەحنيكالىق ۋچيليششەگە وقۋعا ءتۇستىم. 1979 جىلى ءبىر ازاماتتار ارقىلى مەيرامبەكتىڭ اكەسى ءابىلاشىم اعامىزبەن تانىسىپ, ارالاسا باستادىم. ءالى ەسىمدە, جامبىل قالاسىنداعى ىبىرايىم سۇلەيمەنوۆ كوشەسىندەگى 144-ۇيدە تۇراتىن. اكەسى ءابىلاشىم دە, اناسى جىبەك تە ونەرگە جاقىن جاندار ەكەن. مەيرامبەك ول كەزدە كىشكەنتاي بالا. سول كەزدە ىلعي ونەرگە جاقىن جاندار وسى ۇيدە باس قوسىپ, وتىرىس جاسايتىنبىز. 28 اقپان مەنىڭ, ال 1 ناۋرىز ءابىلاشىم اعانىڭ تۋعان كۇنى. بۇل دا ءبىز ءۇشىن مەرەكە. كەيىننەن مەيرامبەك دومبىرا ۇيرەنىپ ءجۇردى. بالا كۇنىنەن اياز بەتباەۆتىڭ تەرمەلەرىن, باكىر تاجىباەۆتىڭ «تۋعان جەر» ءانىن ايتقانىن كوردىم. ءبىر كۇنى جامبىل قالاسىندا ۇلكەن ايتىس ۇيىمداستىرىلدى. قازىلار قۇرامىندا اقىن جاقسىلىق ساتىبەكوۆ باستاعان ىلعي مىقتىلار ەكەن. وسى كەزدە تالانتى ەندى اشىلىپ كەلە جاتقان مەيرامبەكتى ساحناعا شىعارىپ, حالىققا تانىستىرۋ كەرەك بولدى. ەسەبىن تاۋىپ, ساحناعا شىعاردىق. سوندا اياز اقىننىڭ تەرمەلەرىن قارا دومبىرامەن ناقىشىنا كەلتىرە شىرقاعان مەيرامبەككە دەگەن كوپتىڭ ىقىلاسى ەرەكشە بولدى. حالىق قول شاپالاقتاپ تۇرىپ الدى. وسى كەزدە ايتىسكەر اقىن سەرىك قاليەۆ بالا مەيرامبەكتى ساحنادان كوتەرىپ الىپ كەتتى», دەيدى اسىلحان شۇڭىرەكوۆ.
ادام ەستەلىكپەن تىرلىك كەشەدى. وتكەن كۇننىڭ ءبارى ەستەلىك. بۇگىندە قازاق ءان ونەرىنىڭ ءبىر بايتەرەگىنە اينالعان مەيرامبەك بەسپاەۆتى العاش ساحناعا شىعارىپ, ماڭدايىنان سيپاعان ازاماتتاردىڭ قامقورلىعى ەلدىڭ ەسىندە, حالىقتىڭ كوز الدىندا. ەشكىم ءوزىنىڭ تالانتىن وزگەگە ءبولىپ بەرە المايدى, بىراق جاقسىلىققا سەپتەسۋ دە سانالى ادامنىڭ ءىسى بولسا كەرەك. اسىلحان شۇڭىرەكوۆتىڭ بالا مەيرامبەكتى ماسكەۋگە ەرتىپ بارعانىن, كەلگەن سوڭ ەكەۋى اۋىل-اۋىلدى ارالاپ ءجۇرىپ كونتسەرت قويعانىن كوپ ەل ايتادى. ء«بىر كۇنى جامبىل وبلىستىق حالىق شىعارماشىلىعى ورتالىعىنىڭ ديرەكتورى پەرنەبەك وسپانوۆ حابارلاسىپ, ماسكەۋدە قازاق ونەرىنىڭ ونكۇندىگى وتەتىندىگىن ايتتى. سول 1987 جىلى ماناربەك ەرجانوۆتىڭ ستيلىندە ءان سالاتىن عاجاپ ءانشى التىنبەك ورازبەكوۆ, مەن, ءداستۇرلى ءانشى قارلىعاش قوجاعازينا جانە مەيرامبەك بەسپاەۆ تورتەۋمىز دەلەگاتسيا بولىپ ماسكەۋگە اتتاندىق. مەيرامبەك مەكتەپ وقۋشىسى بولعاندىقتان اناسى جىبەك تە ىلەستى. ماسكەۋ ساحناسىندا مەيرامبەك دومبىرامەن «تۋعان جەر» ءانىن ايتقاندا, كورەرمەن تاڭ قالدى. ەندى ءتورتىنشى سىنىپتا وقيتىن بالا عوي. ءتىپتى «موسكوۆسكايا پراۆدا» گازەتىنە مەيرامبەك تۋرالى «قازاقتىڭ روبەرتينو لورەتتيى» دەگەن سىڭايداعى ماقالا دا شىقتى. بۇل جەردە ءبىز بيبىگۇل تولەگەنوۆا, الىبەك دىنىشەۆ سياقتى اتاقتى ونەر ساڭلاقتارىمەن قاتار جۇردىك. كونتسەرت بىتكەن سوڭ, كەيىننەن «ا ستۋديو» توبىن قۇرعان تانىمال ونەرپاز بايعالي سەركەباەۆ ءبارىمىز ەلگە بىرگە قايتتىق. بالا ەمەس پە, مەيرامبەك جولدا ماسكەۋدەن العان توسبەلگىسىن جوعالتىپ الىپ, جىلاعاندا بايعالي وعان ءوزىنىڭ توسبەلگىسىن بەرىپ, جۇباتقان ەدى», دەيدى اسىلحان شۇڭىرەكوۆ.
ماسكەۋدەن كەلگەن بويدا ءبارى مويىنقۇم اۋدانىنا بارىپ, كونتسەرت قويادى. سوۆحوزداردى تۇگەل ارالاپ, حالىققا ونەر كورسەتەدى. ال كونتسەرتتەن تۇسكەن قاراجاتتى ولار بۇكىلوداقتىق قايىرىمدىلىق قورىنا اۋدارادى. «تالانت تالانتتى تانيدى», دەگەن بار. اتا-اناسىمەن ارالاس-قۇرالاس بولىپ ءجۇرىپ, بالا مەيرامبەكتىڭ بويىندا جىلت ەتكەن ۇشقىننىڭ بارىن بايقاعان اسىلحان شۇڭىرەكوۆ ونىڭ العاش ساحناعا شىعىپ, از دا بولسا حالىققا تانىلۋىنا جول اشىپتى. كەيىننەن اۋليەاتا جەرىندە ەڭبەك ەتىپ جۇرگەن التىنبەك قورازباەۆ الماتىعا اۋىسىپ, بالا مەيرامبەكتى ءبىرجولا ءوزىنىڭ تاربيەسىنە الادى. ءان ونەرىندەگى قاناتقاقتى ورىنداۋى اياز بەتباەۆتىڭ, باكىر تاجىباەۆتىڭ اندەرىنەن باستالعان ول التىنبەك قورازباەۆتىڭ «بوزتورعاي» ءانىن ايتىپ, بىرتە-بىرتە حالىققا تانىلدى. ءان ونەرىنىڭ مەيرامبەگى, مەيرامبەك بەسپاەۆ بولىپ قالىپتاستى.
جامبىل وبلىسى
