سوڭعى تاۋلىكتەردە بۇل جۇقپالى ىندەت بولگاريا, كوستا-ريكا, مولداۆا, فرانتسۋزدىق گۆيانا, مالديۆ, مالتا, داتتىق فارەر ارالدارى, سونداي-اق فرانتسۋزدىق مارتينيكا ارالىنا دا جەتكەن ەكەن.
ال گەرمانيادا كوروناۆيرۋستىڭ جاڭا تۇرىمەن اۋىرعاندار سانى ءبىر تاۋلىكتە 163 ادامنان 847 ادامعا دەيىن جەتتى. بۇل تۋرالى اتالعان ىندەتپەن كۇرەسىپ جاتقان روبەرت كوح اتىنداعى عىلىمي-زەرتتەۋ ينستيتۋتىنىڭ ەسەبىندە ايتىلدى. ەڭ كوبى سولتۇستىك رەين باتىس فەدەرالدى جەرىندەگى ۆەستفاليادا – 392, بادەن-ۆيۋرتەمبەرگتە كوروناۆيرۋسقا كۇدىكتى دەپ تانىلعان 182 ادام تىركەلسە, باۆاريادا 148 ادام قاۋىپتى ىندەتتى جۇقتىرۋى مۇمكىن. گفر دەنساۋلىق ساقتاۋ ءمينيسترى يەنس شپان تۇتاس ەل اۋماعىنا تاراعان ىندەتتىڭ شىرقاۋ شەگى ءالى وتپەگەنىن ايتادى. ول ناۋقاستارداعى اۋرۋ جاعدايىنىڭ 80 پايىزى جەڭىل فورمادا وتەتىنىن نەمەسە بەلگىلەرى بايقالمايتىنىن جەتكىزدى. جەرگىلىكتى بالاباقشالار مەن مەكتەپتەردى جابۋ قاجەت دەپ سانامايتىنىن ايتتى.
سونداي-اق البانيادا كوروناۆيرۋسپەن اۋىرعان العاشقى ەكى جاعداي تىركەلدى. ەلدىڭ دەنساۋلىق ساقتاۋ مينيسترلىگىنىڭ حابارلاۋىنشا, اۋرۋ بەلگىلەرى بار ازاماتتار جاقىندا عانا يتاليادان كەلگەن ەكەن. ەكەۋى دە جاقىن تۋىستار بولىپ شىقتى. اۋرۋدى جۇقتىرعانداردىڭ جاعدايى تۇراقتى. ال مىسىر ەلىندە جۇرگەن نەمىس ءتۋريسى اتالعان ەلدەگى كوروناۆيرۋستىڭ تۇڭعىش قۇربانى بولدى. مىسىر دەنساۋلىق ساقتاۋ مينيسترلىگىنىڭ مالىمەتىنشە, 60 جاستاعى ازامات حۋرگاداعا ءبىر اپتا بۇرىن ۇشىپ كەلگەن. مىسىردا 55 ادام اتالعان ىندەتتى جۇقتىرعان. ال رەسەيدە جۇقپالى دەرتپەن كۇرەس جونىندەگى جەدەل شتاب جاڭادان ءۇش ادامنىڭ كوروناۆيرۋس جۇقتىرعانى تىركەلگەنىن مالىمدەدى. بۇل ناۋقاستار كالينينگراد, بەلگورود جانە ماسكەۋ وبلىستارىندا انىقتالدى. ۆيرۋس جۇقتىرعاندار سوڭعى اپتالاردا يتالياعا بارىپ كەلگەن كورىنەدى. جالپى, رەسەيدە بارلىعى 17 ادام اتالعان اۋرۋدى جۇقتىرسا, ولاردىڭ ەكەۋى قىتايدىڭ, بىرەۋى يتاليانىڭ, قالعانى يتاليادان كەلگەن رەسەيدىڭ ءوز ازاماتتارى. وتكەن اپتادا ماسكەۋدە جوعارى قاۋىپتىلىك رەجىمى ەنگىزىلدى. ياعني اۋرۋ تىركەلگەن ەلدەردەن كەلگەن ازاماتتار وزدەرىنىڭ كەلۋى تۋرالى قاۋىرت جەلىگە حابارلاپ ايتۋى مىندەتتەلدى. ال ىندەت ورشىگەن ەلدەردەن كەلگەندەر ەكى اپتالىق كارانتيندى ساقتاۋى ءتيىس.
جالپى, كوروناۆيرۋستان اجال قۇشقاندار بويىنشا يتاليا العاشقى ورىنعا شىقتى. اتالعان ەلدە اۋرۋدى جۇقتىرعانداردىڭ ءار جيىرماسىنشى ادامى قازا بولۋدا. ياعني, 7,3 مىڭ ناۋقاستىڭ 4,96 پايىزى قايتىس بولدى. ەكىنشى ورىندا يران (3,96%), ءۇشىنشى قىتاي (3,83%) ەلى تۇر. ال وڭتۇستىك كورەيادا كوروناۆيرۋس ىندەتىن جۇقتىرۋشىلاردىڭ 0,68%-ى ومىرىمەن قوشتاستى.
2019 جىلى 31 جەلتوقساندا قىتاي بيلىگى ۋحان قالاسىنداعى تۇماۋدىڭ تارالۋى تۋرالى مالىمدەگەن بولاتىن. اۋرۋدى قوزدىرۋشىنىڭ جاڭا ءتۇرى – Covid-2019 اتانعان كوروناۆيرۋس. سوڭعى مالىمەتتەر بويىنشا, بۇل اۋرۋدان 3797 ادام ومىرىمەن قوش ايتىستى.
