بيىلعى پلەي-وفف ساتىسىندا ەكى كوماندا بۇعان دەيىن ءتورت مارتە كەزدەستى. ويىندار سەرياسىندا «بارىس» 3:1 ەسەبىمەن العا شىققان ەدى.
بۇگىنگى كەزدەسۋ تارتىستى وتەتىنى انىق بولاتىن. جارىس تالابى بويىنشا ءتۋرنيردىڭ اتالمىش ساتىسى كوماندانىڭ بىرەۋى ءتورت جەڭىسكە جەتكەنگە دەيىن جالعاسادى. جەڭىسكە جەتكەن جاعدايدا ەلوردالىق كلۋب جارتىلاي فينالعا جولداما السا, «مەتاللۋرگ» جارىس جولىنان شىعىپ قالاتىن. ويىن باسىنان ەكى كوماندا بىردەن شابۋىلعا لاپ قويدى. ناتيجەسىندە 3-مينۋتتا «بارىس» حوككەيشىسى انتون ساگادەەۆ ءوز كومانداسىن العا شىعاردى.
ال 5-مينۋتتا «مەتاللۋرگ» ساپىنان نيكولاي كۋليومين تارازى باسىن تەڭەستىردى. ودان كەيىن ەلوردالىق كلۋب قاتارىنان ءۇش شايبا سوعىپ كەتتى. الدىمەن داررەن ديتس 6-مينۋتتا مەرگەندىك تانىتسا, 14-مينۋتتا انتون ساگادەەۆ بۇگىنگى كەزدەسۋدەگى ەكىنشى شايباسىنىڭ اۆتورى اتاندى. ال 25-مينۋتتا پاۆەل اكولزين ەسەپتى ۇستەمەلەي ءتۇستى. «مەتاللۋرگ» ساپىنان ارتيوم مينۋلين 28-مينۋتتا ەسەپتى ايىرماسىن قىسقارتتى. ال 59-مينۋتتا ەلوردالىق پاۆەل اكولزين ويىندا حەت-تريكتىڭ اۆتورى اتاندى. «بارىس» وسىلايشا بۇگىن 5:2 ەسەبىمەن جەڭىسكە جەتتى. ناتيجەسىندە ويىندار سەرياسىندا جەڭىسىن تورتەۋگە جەتكىزىپ, پلەي-وفف ساتىسىنىڭ جارتىلاي فينالىنا جولداما الدى.
