اشىق, اسەم داۋىس تازا كۇمىستەي سىڭعىرلاپ تۇر. ۇلى حاكىمنىڭ ۇلاعاتىن زامانداستارىنىڭ سۇيەگىنە سىڭىرگىسى كەلەتىندەي. ءتىپتى, ساحناعا جانارى جەتپەگەن ادام اباي اتاسىنىڭ ولەڭىن جان دۇنيەسىمەن بەرىلىپ, سىبىزعىداي سىزىلىپ تۇرعان ادامدى ورىس قىزى دەسە, سەنبەستەي. تىلىندە ءبىر مۇكىس جوق.
وبلىس ورتالىعىنداعى شوقان ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ ستۋدەنتى الەنا سولوپوۆا زەرەندى اۋدانىنداعى ترويتسك اۋىلىنىڭ تۋماسى ەكەن. بۇل جەردە نەگىزىنەن وزگە ۇلت وكىلدەرى تۇرادى. ءبىلىم وشاعى دا ورىس تىلىندە. جۇزدەسىپ, تىلدەسكەن سوڭ الەنانىڭ ءتىل سىندىرار قازاقى ورتاسى جوق جەردە قالايشا قازاق تىلىندە تازا سويلەيتىندىگىنە تاڭعالعانبىز. كەيىپكەرىمىزدىڭ ءوزى بار جەتىستىگىم مەكتەپتە قازاق ءتىلى مەن ادەبيەتى پانىنەن ساباق بەرگەن تولتىر ابىشەۆا مەن سايران لەكەروۆا سياقتى ۇستازدارىمنىڭ ارقاسىندا دەيدى.
– «جاستا بەرگەن تاربيە, جاس قايىڭدى يگەنمەن ءبىر» دەيتىن ءسوز بار قازاقتا, – دەيدى الەنا سولوپوۆا, – ءتىل مايەگىن, قازاق ءتىلىنىڭ قۇدىرەتىن, بوياۋى مەن ناقىشىن ۇستازدارىمنىڭ ارقاسىندا بويىما ءسىڭىردىم. ودان سوڭ اباي الەمىنە عاشىق بولدىم. تۇنىپ تۇرعان عيبرات. كەيدە زامانداستارىمنىڭ بويىنان ەرىنشەكتىك پەن جالقاۋلىقتى, توعىشارلىقتى كورگەندە, شىركىن وسىلار اباي مۇراسىن ءتۇسىنىپ, ءتۇيسىنىپ وقىسا عوي دەپ ارماندايمىن. وقي قالسا, ءسوز استارىنداعى مازمۇن مەن ماعىنانى ۇعار شاماسى بولسا, جان دۇنيەلەرىندەگى شاڭ-توزاڭنان ارىلىپ, كوركەم كەسكىندەرى قالىپتاسار ەدى.
اباي مۇراسىنا عاشىق ارۋ اۋەلى 6-سىنىپتان وزگە ۇلت وكىلدەرى اراسىندا ۇيىمداستىرىلعان اۋداندىق ءتىل بايقاۋىندا جەڭىسكە جەتىپتى. سول ساتتەن باستاپ بويىندا ءوز بىلىمىنە دەگەن سەنىمدىلىك قالىپتاسقان. العا ۇمتىلعان. ءتۇپسىز تەرەڭ دارياعا ارمانسىز بويلاعان. ءىنجۋ-مارجانىن تەرگەن. قايتسەم دە رەسپۋبليكالىق بايقاۋدا توپ جارامىن, سول ارقىلى اباي مۇراسىن وزگە ۇلتتىڭ قالاي قادىرلەيتىنىن كورسەتەمىن دەپ ماقسات قويعان ەكەن. ۋنيۆەرسيتەتتىڭ ءبىرىنشى كۋرسىندا وبلىستىق ء«تىل پاراسات» بايقاۋىنىڭ جەڭىمپازى اتانعاندا توبەسى كوككە ءبىر-اق ەلى جەتپەي قالىپتى. بايقاۋ جەڭىمپازى كەيىن رەسپۋبليكالىق جارىستا وبلىس نامىسىن قورعاعان.
– بۇل جەردە ءتىل مەڭگەرگەن تۇلەكتەر كوپ بولدى. بايقاۋ وتە تارتىستى ءوتتى, – دەيدى الەنا, ء–ۇشىنشى ورىن الدىم. سونىڭ ءوزى مەن ءۇشىن ۇلكەن مەرەي بولدى.
– دانا ابايدىڭ قانشا ولەڭىن جاتقا بىلەسىڭ؟ – دەپ سۇرادىق ءبىز.
– بالكىم, وتىز, مۇمكىن قىرىق شىعار. ساناماپپىن. قالعانىن جاتقا بىلمەسەم دە, مازمۇنىن جادىما توقىپ, وقىپ شىقتىم. اسىرەسە, قارا سوزدەرىن قايتالاپ وقۋعا قۇمارمىن. جانىما جىگەر, بويىما قۋات, بىلەگىمە كۇش بەرەدى.
بىلەك تۋرالى بىلىكتى قىز تەگىن ايتىپ تۇرعان جوق ەكەن. وسى جاسىندا-اق الەنا سولوپوۆا پاۋەرليفتينگتەن قازاقستان رەسپۋبليكاسىنىڭ سپورت شەبەرى, ۇلتتىق ساناتتاعى تورەشى, ازيانىڭ ءتورت دۇركىن, قازاقستاننىڭ ون دۇركىن چەمپيونى بولعان. بىرىككەن اراب امىرلىگىندە, موڭعوليادا, وزگە دە بىرقاتار شەتەلدە ونەر كورسەتكەن. وتكەن جىلى وقۋداعى جانە سپورتتاعى جەتىستىكتەرى ءۇشىن قازاقستان رەسپۋبليكاسىنىڭ تۇڭعىش پرەزيدەنتى قورىنىڭ شاكىرتاقىسىنا يە بولىپتى. «رۋحاني جاڭعىرۋ» باعدارلاماسى اياسىندا قولعا الىنعان ء«جۇز جاڭا ەسىم» جوباسىنا قاتىسقان.
كوكشەتاۋ
