ايتۋلى جارىستىڭ باستى باسەكەسىندە برازيليالىق دانيەل دە المەيدا (26 جەڭىس, 6 جەڭىلىس) مەن شەشەنستاندىق ءشامىل شاحبۋلاتوۆ (11 جەڭىس, 2 جەڭىلىس) ايقاسادى. ولار اسا نۇسقاسى بويىنشا جارتىلاي جەڭىل سالماقتىڭ التىن بەلبەۋىن ساراپقا سالادى.
تاعى ءبىر اسا ماڭىزدى جەكپە-جەك قازاقتىڭ قايسار ۇلى ارمان وسپانوۆ (9 جەڭىس, 3 جەڭىلىس) پەن داعىستاندىق راسۋل ميرزاەۆ (18 جەڭىس, 2 جەڭىلىس) اراسىندا وتەدى.
سونداي-اق «الماتى ارەنادا» وتەتىن ءدۇبىرلى دودادا تاعى بەس جەرلەسىمىز ءوز ونەرلەرىن ورتاعا سالادى. اتاپ ايتساق, 65,9 كيلو سالماقتاعى ەرمەك تلاۋوۆ (16 جەڭىس, 6 جەڭىلىس) شەشەنستاندىق ءاليحان سۋلەيمانوۆپەن (10 جەڭىس, 2 جەڭىلىس) جانە نۇرسۇلتان قاسىمحانوۆ (9 جەڭىس, 2 جەڭىلىس) بەلارۋستىك يۆان جۆيربليامەن (7 جەڭىس, 3 جەڭىلىس) جۇدىرىقتاسادى.
70,4 كيلو سالماق دارەجەسىندەگى ارتەم رەزنيكوۆ (20 جەڭىس, 6 جەڭىلىس) ينگۋشەتيالىق حامزات اۋشەۆپەن (13 جەڭىس, 3 جەڭىلىس) ايقاسادى.
93 كيلو سالماقتاعى اسىلجان باقىتجان ۇلى (10 جەڭىس, 1 جەڭىلىس) يسپانيالىق دانيەل تولەدو (9 جەڭىس, 7 جەڭىلىس) جانە ەۆگەني ەگەمبەرديەۆ (10 جەڭىس, 2 جەڭىلىس) پولشالىق كارل سەلينسكيمەن (17 جەڭىس, 8 جەڭىلىس) كۇش سىناسادى.
- بىردەن ايتا كەتەيىك, اسا تۋرنيرلەرىنە كىل مىقتىلار عانا قاتىسادى. بۇل جارىستا كىمنىڭ جەڭىپ, كىمنىڭ جەڭىلەتىنىن كۇنى بۇرىن جورامالداۋ مۇمكىن ەمەس. ءيا, بىلتىر نۇرسۇلتاننان باسقا جىگىتتەرىمىزدىڭ تەگىستەي ۇتىعانى راس. بىراق ءتۇرلى سەبەپتەرمەن ول جارىسقا ارمان, اسىلجان, ارتەم جانە ەۆگەني سىندى مىقتىلار قاتىسقان جوق. سودان كوپتى كورگەن كانىگى سپورتشىلاردى وزگە ورەندەرمەن الماستىرۋعا ءماجبۇر بولدىق. وكىنىشكە قاراي, ولاردىڭ دەنى ۇتىلىپ قالدى, دەسەك تە بۇل ەرەجەسىز جەكپە-جەك الەمىندەگى ەڭ ۇزدىك پروموۋشەننىڭ ءبىرى ۇيىمداستىرعان ءتۋرنيرى ەكەنىن ەستەن شىعارماعان ءجون. ءبىز دە ءوز شاكىرتتەرىمىزدىڭ تەك كۇشتىلەرمەن عانا ايقاسقانىن قالايمىز. ويتكەنى, سپورتشىلاردىڭ شەبەرلىك دەڭگەيى تەك مىقتى باسەكەلەستىك بەلەڭ العان جاعدايدا عانا وسەدى. ءبىزدىڭ ۇستانعان پوزيتسيامىز وسىنداي. سوندىقتان دا بۇل جولى دا الداعى باسەكەلەرگە بولجام جاساۋعا اسىقپايمىز, – دەيدى «الاش پرايد» كلۋبىنىڭ پرەزيدەنتى دانيار قاسقاراۋوۆ.
