17:10
پولشادا العاشقى جاعداي تىركەلدى
پولشانىڭ دەنساۋلىق ساقتاۋ ءمينيسترى لۋكاش شۋموۆسكي ەلدە كورoناۆيرۋس جۇقتىرعان العاشقى ناۋقاس انىقتالعانىن ايتتى.
قازىر ول زەليونا-گۋرا اۋرۋحاناسىندا ەم الىپ جاتىر. ناۋقاستىڭ وتباسى مەن جەكە باسىنا قاتىستى ەش اقپارات بەرىلمەدى. دەسە دە مينيستر پولشانىڭ ەپيدەميامەن كۇرەسۋگە دايىن ەكەنىن جەتكىزدى.
______________________________________________________________________________________________
16:53
يراكتا العاشقى ناۋقاس كوز جۇمدى
ۆيرۋس جۇقتىرعان 70 جاسار ەر ادام يراكتىڭ سولتۇستىگىندە كوز جۇمدى.
ەلدىڭ رەسمي اقپارات اگەنتتىگىنىڭ حابارلاۋىنشا, ناۋقاستىڭ جاعدايى ناشارلاپ, جۇقتىرعان ىندەتتەن قازا بولعان.
______________________________________________________________________________________________
16:23
گەرمانيادا 240 ادام ۆيرۋس جۇقتىرعان
روبەرت كوح ينستيتۋتى (RKI) گەرمانيادا كوروناۆيرۋس جۇقتىرعاندار سانى 240-قا جەتتى, بۇگىن جاڭا 44 جاعداي تىركەلگەن.
RKI مالىمەتى بويىنشا, قازىرگى ۋاقىتتا گەرمانيانىڭ 16 فەدەرالدى ايماعىنىڭ ون بەسىندە ىندەت بەلگىلەرى انىقتالعان.
______________________________________________________________________________________________
12:12
ءۇندىستاندا ون بەس يتاليالىق ۆيرۋس جۇقتىرعانى انىقتالدى
ءۇندىستاندا ون بەس يتاليا ازاماتىنىڭ كوروناۆيرۋسقا تاپسىرعان ساراپتاماسى وڭ شىقتى. بۇل اقپاراتتى ەلدەگى مەملەكەتتىك جانە تاۋەلسىز باق تاراتتى.
وسىعان دەيىن Reuters اگەنتتىگى دۇيسەنبى كۇنى رادجاستان شتاتىندا يتاليا ازاماتىنىڭ ۆيرۋس جۇقتىرعانىن دەنساۋلىق ساقتاۋ ورگاندارىنىڭ وكىلىنە سىلتەمە جاساپ حابارلاعان ەدى.
______________________________________________________________________________________________
11:55
جاپونيادا ۆيرۋس جۇقتىرعاندار سانى 1000-نان استى
ەلدىڭ دەنساۋلىق ساقتاۋ مينيسترلىگى مەن جەرگىلىكتى بيلىك بەرگەن اقپاراتقا سايكەس, توكيوعا جاقىن كارانتيندە بولعان Diamond Princess لاينەرىنىڭ بورتىندا بولعان 706 ادامدى قوسا العاندا, ەلدەگى ناۋقاستار سانى 1001 ادامعا جەتكەن.
جەرگىلىكتى تۇرعىندار اراسىندا قازا بولعاندار سانى 12 ادام, ونىڭ التاۋى كرۋيز لاينەرىندە بولعان.
وتكەن اپتادا پرەمەر-مينيستر سيندزو ابە ەلدەگى بارلىق مەكتەپتەردى جابۋدى تاپسىرعان. سونداي-اق سپورت جانە ويىن-ساۋىق مەكەمەلەرىنىڭ وپەراتورلارىنان ءىرى ءىس-شارالاردى كەيىنگە قالدىرۋدى سۇراپ ەدى.
______________________________________________________________________________________________
11:30
World Bank (دۇنيەجۇزىلىك بانك) كومەككە $12 ملرد بولۋگە ۋادە بەردى
دۇنيەجۇزىلىك بانك كوروناۆيرۋس تاراعان دامۋشى ەلدەرگە كومەك رەتىندە 12 ملرد دوللار بولەتىن بولدى.
بۇل كەي ەلدەردىڭ قوعامدىق دەنساۋلىق ساقتاۋ سالاسىنداعى داعدارىسقا قارسى شارالارىن جاقسارتۋعا, سونداي-اق ەكونوميكالىق قاتەردى ازايتۋعا كومەكتەسپەك.
ۇيىم قارجىلاي كومەكتى ۆيرۋس تاراعان 70-تەن استام ەلدەر ىشىنەن ەڭ كەدەي جانە ىندەتپەن كۇرەسۋگە مۇمكىندىگى جوقتارىنا بەرەدى.
بەرىلەتىن سومانىڭ جارتىسى جەكە سەكتورمەن جۇمىس ىستەيتىن بانكتىڭ حالىقارالىق قارجى كورپوراتسياسىنان كەلىپ تۇسسە, ال شامامەن $4 ملرد قولجەتىمدى قورلاردان الىنادى.
______________________________________________________________________________________________
9:30
الەمدەگى جاعداي قانداي؟
► سوڭعى مالىمەتكە سەنسەك, الەم بويىنشا ۆيرۋس جۇقتىرعاندار سانى 92 مىڭعا جەتكەن. ال ىندەتتەن كوز جۇمعاندار 3 مىڭ ادامنان استى.
► وڭتۇستىك كورەيا پرەزيدەنتى ۆيرۋسقا «سوعىس» اشاتىنىن مالىمدەدى. ەلدە تىركەلگەن ناۋقاستاردىڭ 60%-عا جۋىعى 2,5 ميلليون حالقى بار دەگۋدە ورنالاسقان سينچحوندزي ءدىني سەكتاسىنىڭ فيليالىمەن بايلانىستى. سەكتا باسشىسىنىڭ كوروناۆيرۋس جۇقتىرماعانى انىقتالدى.
► گونكونگ وزگە الەم ەلدەرىنە قاراعاندا ءوز تۇرعىندارىن ۋحاننان سوڭعىلاردىڭ ءبىرى بولىپ ەۆاكۋاتسيالايتىن بولدى.
► كەشە تاعى ءبىر قىتاي دارىگەرى ۆيرۋستان كوز جۇمدى.
► ۋكراينادا يتاليادان كەلگەن ەر ادامنىڭ ۆيرۋس جۇقتىرعانى انىقتالدى.
► فرانتسيادا 100-دەن استام مەكتەپتى ۋاقىتشا جابۋعا تۋرا كەلدى.
► يراندا 23 دەپۋتات ۆيرۋس جۇقتىرعان, ال ىندەتتەن كوز جۇمعاندار سانى 77-گە جەتتى.
