«بۇل قازاقستاننىڭ ونەركاسىبىندەگى ەڭ پروبلەمالى سەكتور دەپ ايتۋعا بولادى. سەبەبى, ەكونوميكادا وڭدەۋشى سالانىڭ ايرىقشا باسىمدىقتا بولۋىنا بايلانىستى بۇل سالا كوپ ۋاقىت بويى نازاردان تىس تاسا قالىپ كەلدى. جەڭىل ونەركاسىپ ەكونوميكانى تۇرلەندىرۋگە, اسىرەسە پايدالى قازبالار قورىنىڭ ازايىپ, مۇناي باعاسىنىڭ تومەندەگەن كەزىندە داعدارىس تولقىنىنا قارسى تۇرۋ مۇمكىندىگىنىڭ ءبىرى بولىپ تابىلادى», دەدى داريعا نازارباەۆا.
سەنات توراعاسىنىڭ ايتۋىنشا, جەڭىل ونەركاسىپتەگى ستارتاپتاردىڭ نەگىزگى ۇلەسى ايەلدەرگە تيەسىلى.
«جەڭىل ونەركاسىپ الەۋمەتتىك ماڭىزعا يە سالا. ول حالىقتىڭ, اسىرەسە ايەلدەردىڭ جوعارى دەڭگەيدەگى جۇمىسپەن قامتىلۋىن قامتاماسىز ەتەدى. بۇگىنگى تاڭدا ەلىمىزدەگى شاعىن جانە ورتا بيزنەس سۋبەكتىلەرىنىڭ بارلىق اكتيۆتەرىنىڭ 44%-ىن ايەلدەر باسقارادى. ولار شاعىن جانە ورتا بيزنەس سەكتورىنداعى بارلىق جۇمىس ورىندارىنىڭ 31%-ىن قامتاماسىز ەتەدى. جەڭىل ونەركاسىپتەگى ستارتاپتاردىڭ نەگىزگى ۇلەسى ايەلدەرگە تيەسىلى. ولاردىڭ بەلسەندىلىگىنىڭ ارقاسىندا سالا جاندانا باستادى», دەدى د. نازارباەۆا.
