تالاپكەرلەر ءوتىنىش بەرۋ بارىسىندا تەستىلەۋ كۇنىن, ۋاقىتىن جانە پۋنكتىن وزدەرى تاڭدادى.
وقۋ-اعارتۋ مينيسترلىگىنىڭ مالىمەتىنشە, ۇبت بارىسىندا كالكۋلياتور, حيميالىق ەلەمەنتتەردىڭ پەريودتىق جۇيەسى (مەندەلەەۆ كەستەسى) جانە تۇزداردىڭ ەرىگىشتىك كەستەسى تەستىلەۋ باعدارلاماسىندا قولجەتىمدى بولادى. تەست تاپسىرۋشىلار تەستىلەۋ اياقتالعاننان كەيىن 30 مينۋت ىشىندە اپەللياتسياعا ءوتىنىش بەرە الادى. اپەللياتسياعا ءوتىنىش بەرگەن تەستىلەنۋشىلەردىڭ سەرتيفيكاتى اپپەلياتسيالىق كوميسسيانىڭ شەشىمىنەن كەيىن تالاپكەردىڭ جەكە كابينەتىندە شىعادى.
2026 جىلى ۇلتتىق بىرىڭعاي تەستىلەۋدىڭ فورماتى وزگەرىسسىز قالادى. تالاپكەرلەر ءۇش مىندەتتى ءپاندى جانە تاڭداۋى بويىنشا ەكى بەيىندىك ءپاندى تاپسىرادى. ۇبت تاپسىرمالارىنىڭ جالپى سانى – 120. ونىڭ ىشىندە «قازاقستان تاريحى» ءپانى بويىنشا 20 تاپسىرما, «وقۋ ساۋاتتىلىعى» مەن «ماتەماتيكالىق ساۋاتتىلىق» پاندەرىنەن 10 تاپسىرمادان, سونداي-اق ەكى بەيىندىك ءپاننىڭ ارقايسىسىنان 40 تاپسىرمادان بەرىلەدى. ۇبت بويىنشا ەڭ جوعارى بالل دا وزگەرمەيدى جانە 140 بالدى قۇرايدى.
تەستىلەۋ ۋاقىتى – 4 ساعات (240 مينۋت). بۇل رەتتە ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالاتىنىن ايتا كەتۋ كەرەك.
ايتا كەتەيىك, ۇبت 2 ناۋرىز بەن 6 ءساۋىر ارالىعىندا وتەدى.
ۇبت: قوستاناي وبلىسىندا تالاپكەرلەردىڭ 74%-ى شەكتى بالل جينادى
ەستەرىڭىزگە سالا كەتسەك, ناۋرىزداعى ۇبت-عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعاندار, وتكەن جىلعى مەكتەپ تۇلەكتەرى, كوللەدج تۇلەكتەرى, قر ازاماتى بولىپ تابىلمايتىن ۇلتى قازاق تۇلعالار, شەتەلدە ءبىلىم العان قر ازاماتتارى, مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىسادى.
ناۋرىز ايىنداعى ۇبت-عا قاتىسۋ ءۇشىن ءوتىنىش قابىلداۋ 15 اقپاندا باستالادى
