بۇدان كەيىن ءسوز العان دەپارتامەنت جانىنداعى اقپاراتتىق-اعارتۋشىلىق شتابتىڭ توراعاسى عوسمان تولەعۇل شتاب قىزمەتى تۋرالى كەڭىنەن اڭگىمەلەپ بەردى.
–قازاقستان پرەزيدەنتى قاسىم-جومارت توقاەۆ ەل حالقىنا ارناعان جولداۋىندا ازاماتتاردىڭ بارلىق سىندارلى ءوتىنىش-تىلەكتەرىن جەدەل ءارى ءتيىمدى قاراستىراتىن «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋدىڭ ماڭىزى وراسان ەكەنىن اتاپ كورسەتتى,–دەدى ع.تولەعۇل ۇلى, –ويتكەنى, بيلىك پەن قوعام اراسىندا تۇراقتى ديالوگ ورناتۋ ارقىلى عانا قازىرگى گەوساياسي احۋالعا بەيىمدەلگەن ۇيلەسىمدى مەملەكەت قالىپتاستىرۋعا بولادى. وسىعان بايلانىستى سىبايلاس جەمقورلىققا قارسى كۇرەس اگەنتتىگى وتكەن جىلدىڭ قاراشاسىندا رەسپۋبليكالىق اقپاراتتىق-اعارتۋشىلىق شتاب قۇردى. سول كەزدەن باستاپ بۇل قۇرىلىم ءبىزدىڭ وبلىستىڭ وڭىرلەرىندە دە جۇمىس ىستەي باستادى. ونىڭ قۇرامىنا «نۇر وتان» پارتياسى وبلىستىق فيليالىنىڭ, ارداگەرلەر كەڭەسىنىڭ, انالار كەڭەسىنىڭ, ءدىني بىرلەستىكتەردىڭ, بۇقارالىق اقپارات قۇرالدارىنىڭ وكىلدەرى ەندى.
ءبىزدىڭ پايىمداۋىمىزشا, شتاب وسىناۋ قىسقا مەرزىمدە بەلسەندى قىزمەتىمەن تانىلىپ وتىر. وبلىستىق قوعامدىق قۇرىلىم پوليتسيا, مەملەكەتتىك قىزمەت ىستەرى, باسەلەكەلەستىكتى قورعاۋ جانە دامىتۋ, قىلمىستىق-اتقارۋ جۇيەسى دەپارتامەنتتەرىندە, ساۋلەت جانە قالا قۇرىلىسى, اۋىل شارۋاشىلىعى, جەر قاتىناستارى, قۇرىلىس, دەنە شىنىقتىرۋ جانە سپورت, ەنەرگەتيكا جانە تۇرعىن ءۇي-كوممۋنالدىق شارۋاشىلىعى, جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارمالارى مەن كوكشەتاۋ قالاسى اكىمدىگىنىڭ اپپاراتىندا جانە باسقا مەكەمەلەردە كەزدەسۋلەر وتكىزگەن. سونىمەن بىرگە زەرەندى, ساندىقتاۋ, بۋراباي, قورعالجىن جانە ارشالى اۋداندارىندا كوشپەلى ماجىلىستەر ۇيىمداستىرىلىپتى. جالپى, 4115 ادام قاتىسقان 43 ءىس-شارانىڭ رەسمي قۇجاتتارى قاتتالىپ, بۇقارالىق اقپارات قۇرالدارىندا 90 ماتەريال جاريالانعانى ايتىلدى.
بۇل باعىتتاعى جۇمىس الداعى ۋاقىتتا دا جالعاسىن تاۋىپ, قىزمەت اۋقىمى كەڭىمەكشى. بريفينگتە اتالعان تۇسىنىك جۇمىستارى تۇرعىنداردىڭ قۇقىقتىق ساۋاتتىلىعىن جانە ازاماتتىق قوعامنىڭ بەلسەندىلىگىن ارتتىرادى دەگەن سەنىم ءبىلدىرىلدى.
اقمولا وبلىسى
