زەرەندى سەلوسىنىڭ ورتالىق الاڭى ناعىز مەرەكەدەگىدەي بەزەندىرىلگەن. قىسقى سپارتاكياداعا كەلگەن وبلىسىمىزدىڭ اۋداندارى مەن قالالارىنىڭ كوماندالارى ساپ تۇزەپ, ورتاعا شىقتى. سپورتشىلاردى سپارتاكياداعا ارنايى كەلگەن بوكستان وليمپيادا چەمپيونى, قازاقستان رەسپۋبليكاسى مادەنيەت جانە سپورت مينيسترلىگىنىڭ سپورت كوميتەتى توراعاسى سەرىك ساپيەۆتىڭ بۇقارالىق شاڭعى جارىسىنا قاتىسقانى تىپتەن جىگەرلەندىرە ءتۇستى.
–زامانداستارىمىزدىڭ سپورتپەن اينالىسۋى جانە بۇل ىسكە قاراپايىم حالىقتىڭ كوبىرەك قاتىسقانى وتە قۋانىشتى. سالاۋاتتى ءومىر سالتىن بەرىك ۇستانۋ تاماشا داستۇرگە اينالىپ كەلەدى. بايگەنىڭ بۇيىرار ولجاسى – ءوز دەنساۋلىعى, – دەيدى سەرىك ساپيەۆ.
مۇنان سوڭ وتباسىلىق جارىستار باستالىپ كەتتى. ءار اۋدان مەن قالادان كەلگەن سپورتشىلار ۇزدىك ناتيجيەدەن ءۇمىتتى. تسەلينوگراد اۋدانىنان كەلگەن احاماي باۋىرجاننىڭ ايتۋىنا قاراعاندا, ۇستازدار اۋلەتىنەن ەكەن. باۋىر ەتى بالالارىن بالا باقشا تابالدىرىعىن اتتاعاننان باستاپ ارقايسىسىنىڭ يكەمدەرىنە وراي سپورتپەن باۋىرلاستىرادى. سونىڭ ارقاسىندا تۇتاس وتباسى بولىپ سالاۋاتتى ءومىر سالتىن بەرىك ۇستانىپ كەلە جاتىر. شاڭعى بازاسىنداعى سپورتتىق ساۋىقتىرۋ كەشەنىندە, №2 مەكتەپتىڭ سپورت زالىندا, زەرەندى كولىنىڭ ۇستىندە قىسقى سپورتتىڭ بىرنەشە ءتۇرى ساراپقا سالىندى.
زەرەندى اۋداندىق سپورت ءبولىمىنىڭ جەتەكشىسى نۇرجان شاكىرجانوۆتىڭ ايتۋىنا قاراعاندا, بيىلعى سپارتاكياداعا 600-دەن استام سپورتشى جينالعان. ال, زەرەندىلىكتەر بولسا سپورتشىلاردى قارسى الۋعا جاقسىلاپ دايىندالعان.
تارتىستى وتكەن سپورت سايىستارىندا زەرەندىلىكتەر قىسقى سپارتاكيادانىڭ جەڭىمپازدارى اتاندى. ەكىنشى ورىندى استراحان اۋدانىنىڭ كومانداسى ەنشىلەدى. ءۇشىنشى تۇعىرعا ارشالى اۋدانىنىڭ وكىلدەرى كوتەرىلدى. قالالار اراسىندا كوكشەتاۋ ءبىرىنشى, شۋچە ەكىنشى, ستەپنوگرسك ءۇشىنشى ورىن الدى.
اقمولا وبلىسى
