قازىردىڭ وزىندە سول جارىستا كۇش سىناساتىن قوس جۇپ بەلگىلى. ايتۋلى كومپانيانىڭ قۇرامىندا ونەر كورسەتىپ جۇرگەن وزبەكستاننىڭ اتاقتى بوكسشىسى, وليمپيادا چەمپيونى فازليددين گايبنازاروۆ (8-1, 5 كو) جارتىلاي ورتا سالماقتا يرلانديالىق دارراگ فوليمەن (18-4-1, 9 كو) قولعاپ تۇيىستىرەدى.
ال سونىڭ الدىندا عانا جانقوش تۇراروۆتىڭ كىممەن جۇدىرىقتاساتىنى بەلگىلى بولعان. ءوزىنىڭ كارەراسىنداعى 24 كەزدەسۋدىڭ بارلىعىن جەڭىسپەن اياقتاپ, 17 قارسىلاسىن ەسىنەن تاندىرعان قازاق جىگىتى پانامانىڭ وكىلى الەكساندەر ديۋرانمەن شەبەرلىك بايقاسادى.
بىردەن ايتا كەتەيىك, ديۋران دا وسال بوكسشى ەمەس. ول دا 20 باسەكەنىڭ بارلىعىندا باسىمدىق تانىتىپ, جەتى كەزدەسۋدى مەرزىمىنەن بۇرىن اياقتادى. سونىمەن قاتار, پانامالىق بىلعارى قوعاپ شەبەرى قازىرگى كەزدەگى IBF نۇسقاسىنىڭ التىن بەلبەۋ يەگەرى جانە IBA نۇسقاسى بويىنشا الەمنىڭ ەكس-چەمپيونى.
جانقوش تۇراروۆ پەن الەكساندەر ديۋران اراسىنداعى جەكپە-جەكتە جارتىلاي ورتا سالماقتاعى WBO Inter-Continental نۇسقاسىنىڭ چەمپيوندىق ءتاجى ساراپقا سالىنادى.
