قازىرگى كەزدە ايتۋلى كاسىپقوي بوكسشىلاردىڭ پروموۋتەرلەرى تاراپىنان كەلىسسوزدەر جۇرگىزىلۋدە. كەيبىر دەرەككوزدەرىنە سەنسەك, ەكى جاق ورتاق مامىلەگە كەلگەن كورىنەدى. وسىلايشا, قوس ساڭلاق 11 ماۋسىمدا ساۋد ارابياسىندا كۇش سىناسادى.
راسىندا دا بۇل ءبىر كەرەمەت جەكپە-جەك بولاتىنى داۋسىز. سەبەبى, قازىرگى كەزدە ەكەۋىنىڭ دە داڭقى دۇركىرەپ تۇر. ماسەلەن, 41 جاستاعى پاكياونىڭ باعىندىرماعان بەلەسى جوق. ول بىرنەشە بەلدى نۇسقالارى بويىنشا جانە بىرنەشە سالماق دارەجەسىندە الەم چەمپيونى اتاعىنا قول جەتكىزدى. كاسىپقوي رينگتە 25 جىلدان اسا ۋاقىت بويى جۇدىرىقتاسىپ جۇرگەن ءفيليپپيننىڭ ماقتانىشى سول كەزدەن بەرى 71 جەكپە-جەك وتكىزىپ, 62 مارتە جەڭىس تويىن تويلادى. 39 قارسىلاسىن ەسىنەن تاندىردى. جەتى رەت ۇتىلىپ, تاعى ەكى باسەكە تەڭ اياقتالدى.
32 جاستاعى مايكي گارسيانىڭ دا سپورتتىڭ بۇل ءتۇرىن سەرىك ەتكەنىنە 15 جىلدان استى. ول 40 كەزدەسۋ وتكىزىپ, تەك بىرەۋىندە عانا ۇتىلدى. 30 باسەكەنى مەرزىمىنەن بۇرىن اياقتادى. اقش بوكسشىسى دا التىن بەلبەۋدىڭ تالايىن يەلەندى.
