قارا تەڭىزدىڭ ودەسسا پورتىنداعى «بەلورۋسسيا», «گرۋزيا» جانە «ازەربايجان» تەپلوحودتارىنىڭ قاتارىنا بيىل «قازاقستان» تەپلوحودى دا قوسىلعان بولاتىن. ول وسى پورتتاعى ەڭ جاس, بىراق, ەڭ ءىرى كەمەلەردىڭ ءبىرى. وسى زامانعى ەڭ سوڭعى تەحنيكالىق جەتىستىكتەر نەگىزىندە جاسالعان بۇل تەپلوحودتا 500 كىسىلىك ون پالۋبا بار. ءبىر ەرەكشەلىگى تەپلوحود جولاۋشىلاردى اۆتوماشينالارىمەن قوسا تاسۋعا بەيىمدەلگەن. ونىڭ گاراجىندا 250 اۆتوموبيلدىك ورىن بار. مۇنىڭ ءوزى تەپلوحود توقتاعان پورتتا جولاۋشىلاردىڭ ءوز ماشيناسىمەن قالانى ارالاۋىنا مۇمكىندىك بەرەدى.
جاڭا تەپلوحود العاشقى ساپارىن وسى جازدا كاريب تەڭىزىنە — كۋباعا جاسادى. بوستاندىق ارالىنا بارىپ قايتقاندا سوۆەت وداعىندا وقيتىن ستۋدەنتتەردى تاسىدى. ال, ودەسساعا قايتىپ ورالعان سوڭ ەلىمىزدىڭ تۇكپىر-تۇكپىرىنەن قارا تەڭىزگە دەم الۋعا كەلگەن ەڭبەكشىلەردى تەڭىز بويىمەن سەرۋەندەتتى. ولار يالتا, سوچي, نوۆوروسسيسك, باتۋمي قالالارىن ارالادى.
تەپلوحود ىشىندە جولاۋشىلار ءۇشىن بارلىق قولايلى جاعداي بار. «الماتى», «بايقوڭىر» رەستوراندارى مەن «قىرىم» كافەسى جۇمىس ىستەيدى. ولاردا قازاقتىڭ, ۋكرايننىڭ, ورىستىڭ نەشە ءتۇرلى ۇلتتىق تاعامدارى بار.
جولاۋشىلار ءوز ۋاقىتتارىن مادەنيەتتى تۇردە وتكىزە الادى. لەكتسيالار تىڭدايدى, كونتسەرتتەردى تاماشالايدى, ءتۇرلى ويىن-ساۋىقتارعا قاتىسادى, كينوزالدان فيلمدەر كورە الادى. مۇندا جولاۋشىلار تۋىسقان سوۆەتتىك قازاقستاننان كەلگەن ونەر شەبەرلەرىمەن ءجيى-ءجيى جۇزدەسىپ تۇرادى. ماسەلەن, قازاق سسر-ءىنىڭ ەڭبەك سىڭىرگەن ارتيسكاسى گ. رازيەۆا, ە. مالبەكوۆ, تاعى باسقالارى ونەر كورسەتتى. ال, گ. رازيەۆا تەپلوحود جولاۋشىلارى اراسىڭداعى ەڭ سۇلۋ كىم دەگەن اتپەن وتكىزىلگەن كونكۋرسقا قاتىسىپ, پولشالىق تۋريستكا ن. كوزلوۆسكايا ەكەۋى باستى جۇلدەنى جەڭىپ الدى.
«قازاقستان» تەپلوحودىنىڭ كاپيتانى — تاجىريبەلى تەڭىزشى, تەڭىزدە جۇرگىزۋدىڭ شەبەرى ە. بالاشوۆ. ونىڭ باسقارۋىمەن ەكيپاج مۇشەلەرى جولاۋشىلارعا ۇلگىلى قىزمەت ەتىپ, جوسپارلارىن ارتىعىمەن ورىنداۋدا. كاپيتان كومەكشىلەرى ا. كۋرتوۆ, س. ماركوۆ, س. رودين, تاعى باسقالارى ءوز مىندەتتەرىنە ۇقىپتى قاراپ, ەڭبەك ۇلگىسىن كورسەتىپ ءجۇر.
تەپلوحودتى الدا كوپتەگەن جۇزۋلەر كۇتىپ ءتۇر. قاراتەڭىزدىكتەر قازاقستان ەسىمى بەرىلگەن تەپلوحودتىڭ اتىنا كىر كەلتىرمەي, ارقاشان دۇرىس الىپ جۇرەدى دەپ سەندىرەدى.
ۆ. كوسونوگي,
قارا تەڭىز پاروحودستۆوسىنىڭ
«مورياك» گازەتى رەداكتورىنىڭ ورىنباسارى.
«سوتسياليستىك قازاقستان», 17 قاراشا 1976 جىل
