اينۇر ءامىرحاننىڭ ايتۋىنشا, قازىرگى تاڭدا كاسىپكەرلىكپەن اينالىسۋعا, ءبىلىم الۋعا كوپتەگەن مۇمكىندىكتەر جاسالعان.
«ترەنينگتە ءبىز ايەلدەرگە تابيعي قابىلەتتەردى كاسىبي دەڭگەيگە قالاي كوتەرۋ قاجەتتىگىن ايتامىز. وكىنىشكە قاراي, ءبىزدىڭ ورتالىققا كەلەتىن ايەلدەر وزدەرىنىڭ مىقتى جاقتارىمەن بولىسكىسى كەلمەيدى, ال كەيبىرى ءتىپتى ءوزىنىڭ قابىلەتتەرى جايلى ويلانباعان. تابىستى ادامدار بيزنەستى ءوزىنىڭ تالانتى مەن قابىلەتتەرى ارقىلى جاسايدى. ولار بويىنداعى كاسىبي قابىلەتتى قالاي تانىپ, دامىتۋعا بولاتىندىعىن بىلەدى. ولار وزدەرىنە لايىقتى رولدەردى تاۋىپ, وزدەرىنىڭ دارىنىن ومىردە قالاي قولدانۋ كەرەكتىگىن ويلاستىرادى», - دەيدى اينۇر ءامىرحان.
«كاسىپكەر انا» ءبىلىم بەرۋ جوباسىنىڭ ماقساتى – قارجىلىق قيىن جاعدايداعى ايەلدەرگە قولداۋ كورسەتۋ. ولاردىڭ قاتارىنا كوپبالالى انالار, جالعىزباستى انالار, مۇگەدەك بالالاردى تاربيەلەپ وتىرعان جانە قيىن الەۋمەتتىك جاعدايدا تۇراتىن انالار جاتادى. «اينۇر ءامىرحان - موتيۆاتور. ترەنينگتەن كەيىن مەن ءوز بيزنەسىمدى باستاۋ ءۇشىن مەنىڭ كۇشتى جانە ءالسىز جاقتارىم تۋرالى جەتكىلىكتى بىلمەيتىنىمدى ءتۇسىندىم. بۇل اقپارات بولماسا مەن جەكە بيزنەسىمدى باستاۋعا قورقاقتادىم. سەبەبى, مەن كۇن سايىن كەشەگى شەشىمنەن وزگەشە جاڭا بيزنەس-جوبانى قاراستىردىم. ترەنينگ ماعان شەشىم قابىلداۋعا كومەكتەستى. تۇلعالىق مىقتى قاسيەتتەرىمدى تالداۋ ماعان قىزمەت سالاسىن تاڭداۋعا مۇمكىندىك بەردى», - دەيدى ترەنينگكە قاتىسۋشى باقىت توقسانباەۆا.
«كاسىپكەر انا» جوباسىندا وقىتۋ بىرنەشە كەزەڭنەن تۇرادى. ءبىرىنشى كەزەڭ قابىلەتتەر مەن الەۋەتتى انىقتاۋ ءۇشىن كوۋچينگ سەسسيالارىن قامتيدى. ەكىنشى كەزەڭدە ۇزاق مەرزىمدى وقىتۋ ماماندىق بويىنشا پراكتيكالىق ينتەنسيۆ تۇرىندە وتكىزىلەدى. ءۇشىنشى كەزەڭ جەكە بيزنەستى باستاۋعا كومەك كورسەتىلەدى.
وقىتۋ كەلەسى باعىتتار بويىنشا جۇرگىزىلەدى:
- سۇلۋلىق يندۋسترياسى (مانيكيۋر, پەديكيۋر, شاشتاراز, ماكياج, كىرپىكتەردى جالعاۋ, پەرمانەنتتى ماكياج);
- تاماق ونەركاسىبى (اسپاز, كونديتەر اسپاز, اسپازشى);
- IT يندۋسترياسى (گرافيكالىق ديزاين, كوپيرايتينگ, SMM);
- كاسىبي تۇردە سۋرەتكە ءتۇسىرۋ;
- فلوريستيكا.
