تۇجىرىمدامامەن ساۋدا جانە ينتەگراتسيا ءمينيسترى ب. سۇلتانوۆ تانىستىردى, دۇنيەجۇزىلىك بانكتىڭ وكىلى ش. راحاردجا مەن پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءا. سمايىلوۆ ەلىمىزدە ساۋدانى دامىتۋعا قاتىستى ماسەلەنىڭ وزەكتىلىگى مەن تاسىلدەرى تۋرالى بايانداما جاسادى.
ساۋدا قازاقستاننىڭ ءجىو-ءنىڭ 17%-ىن قۇرايدى. 2019 جىلدىڭ قورىتىندىسى بويىنشا سالانىڭ ءوسۋ قارقىنى 7,6%-دى قۇرادى, ال جۇمىسپەن قامتىلعان قىزمەتكەرلەردىڭ سانى 1,4 ملن ادامعا جەتتى. قازاقستاننىڭ سىرتقى ساۋدا اينالىمى – $96,1 ملرد, ونىڭ ىشىندە ەكسپورت – $57,7 ملرد جانە يمپورت $38,4 ملرد قۇرادى. ىشكى تاۋار اينالىمى 37,5 ترلن تەڭگەدەن استى, بۇل 2018 جىلمەن سالىستىرعاندا 11%-عا ارتىق.
ازىرلەنىپ جاتقان مەملەكەتتىك باعدارلامانىڭ ماقساتى — نارىقتى ساپالى ونىممەن تولىقتىرۋدى جانە ەكسپورتتىق تاۋارلار مەن قىزمەتتەردىڭ باسەكەگە قابىلەتتىلىگىن قامتاماسىز ەتەتىن زاماناۋي ساۋدا جۇيەسىن قۇرۋ جانە دامىتۋ.
نەگىزگى مىندەتتەر رەتىندە ءونىمنىڭ ساپاسى مەن قاۋىپسىزدىگىن ارتتىرۋ, ساۋدا سالاسىندا ساپالى ادامي كاپيتالدى قالىپتاستىرۋ, وڭتايلاندىرىلعان تسيفرلىق ساۋدا پروتسەسىن قامتاماسىز ەتۋ, كوپ فورماتتى ساۋدا-تاراتۋ ينفراقۇرىلىمىن, قولايلى تۇتىنۋ ورتاسىن قۇرۋ, شيكىزاتتىق ەمەس تاۋارلار مەن قىزمەتتەردىڭ يمپورتى مەن ەكسپورتىن ءارتاراپتاندىرۋ, ىشكى جانە سىرتقى نارىقتاردا وتاندىق تاۋار وندىرۋشىلەر ءۇشىن قولايلى جاعدايلار جاساۋ انىقتالدى.
الدىن الا باعالاۋ بويىنشا, مەملەكەتتىك باعدارلامانى جۇزەگە اسىرۋعا جەكە ينۆەستيتسيالاردى قوسا العاندا شامامەن 285 ملرد تەڭگە قاجەت. جوسپارلانعان مىندەتتەردى ورىنداۋ 2025 جىلعا قاراي ساۋدانىڭ ورتاشا جىلدىق جالپى قوسىلعان قۇنىن 106,2%-عا ارتتىرۋعا, ۇلتتىق ستاندارتتاردى قولدانۋ دەڭگەيىن 41%-دان 75%-عا دەيىن ارتتىرۋعا, تاۋارلار مەن قىزمەتتەردىڭ شيكىزاتتىق ەمەس ەكسپورتىن $41 ملرد-قا دەيىن ۇلعايتۋعا, بولشەك تاۋار اينالىمىنان ەلەكتروندى ساۋدا ۇلەسىن 10%-عا دەيىن ارتتىرۋعا مۇمكىندىك بەرەدى.
مەملەكەتتىك باعدارلامادا تاۋار وتكىزۋ جۇيەسىن قالىپتاستىرۋ, بيرجالىق, شەكارا ماڭى جانە ەلەكتروندىق ساۋدانى دامىتۋ, تەحنيكالىق رەتتەۋ جانە تۇتىنۋشىلاردىڭ قۇقىقتارىن قورعاۋ قۇرالدارىن جەتىلدىرۋ شارالارى قاراستىرىلاتىن بولادى.
ۇكىمەت باسشىسى ساۋدا جانە ينتەگراتسيا مينيسترلىگىنە وسى جىلدىڭ 1 شىلدەسىنە دەيىن مەملەكەتتىك باعدارلامانىڭ جوباسىن ۇكىمەتكە ەنگىزۋدى قامتاماسىز ەتۋدى, ورتالىق جانە جەرگىلىكتى اتقارۋشى ورگاندارعا – قۇجاتتى ازىرلەۋگە بەلسەنە قاتىسۋدى تاپسىردى.
«قۇجاتتا قولايلى تۇتىنۋ ورتاسىن قۇرۋعا, حالىقتى ساپالى جانە قاۋىپسىز تاۋارلارمەن قامتاماسىز ەتۋگە, سونداي-اق قازاقستاندىق تاۋارلار مەن قىزمەتتەردىڭ سىرتقى نارىقتاردا باسەكەگە قابىلەتتىلىگىن ارتتىرۋعا باعىتتالعان باعدار ورناتىلۋى ءتيىس. سونداي-اق حالىقارالىق ىنتىماقتاستىق اياسىندا ۇلتتىق مۇددەلەردى قورعاۋ جانە ىلگەرىلەتۋ ازىرلەنىپ جاتقان باعدارلامانىڭ باستى ماقساتتارىنىڭ ءبىرى بولۋى ءتيىس», — دەدى ا. مامين.
