باسقا سالعانعا ءۇنسىز كونگەن كونتەرىلى كورەيلەردىڭ ءبىر توبى قىزىلوردا وبلىسىنا قونىستاندى. شيەلى اۋدانىنداعى سۇلۋتوبە ستانساسى تۇرعىندارىنىڭ قاتارىن قالىڭداتقان توپ ىشىندە شيندەر اۋلەتى دە بار ەدى. ازاپ ۆاگونىنداعى اۋىرلىقتى كوتەرە الماعان اكەسى مەن شەشەسى كوپ ۇزاماي كوز جۇمادى. نەمەرە اعاسى يننوكەنتي تسحايدىڭ ۇيىندە ەرجەتكەن ۆيلوري ءبىرىنشى سىنىپتى وبلىس ورتالىعىنداعى قازاق مەكتەبىندە وقىپ, كەيىننەن ورىس مەكتەبىنە اۋىستى.
سان ەتنوستى ساياسىنا سىيعىزعان سول سۇلۋتوبە ءالى دە كوز الدىنان كەتەر ەمەس. كەيدە ءتىپتى تۇسىنە كىرىپ, بوداۋسىز باياعىنىڭ بۇيداسىندا كەتكەن بالالىعىن ەسكە سالاتىنى بار. قازاقتار بۇلاردى جاتسىنىپ, شەتتەتكەن ەمەس. قايتا ەزۋىنەن جىرىپ ەنشى بەرىپ, قاتارعا قوسىلىپ كەتۋىنە جاعداي جاسادى. ءوزى قاتار ويناعان بالالاردىڭ دا بوتەنسىگەنىن بايقاعان كەزى جوق. «مەنىكى, سەنىكى» دەپ بولىنبەيتىن اۋىلدا ءبىر ۇيدەن نان تىستەپ شىعىپ, كەلەسى ۇيدەن ايران ۇرتتاپ جۇرە بەرەتىن كوپ بالانىڭ ءبىرى بولدى.
كىشكەنتايىنان سپورتتى جاقسى كوردى. كەيىن وسى ءحوببيى ونىڭ ۇستاز اتانۋىنا سەپتىگىن تيگىزدى.
اعايىندارى سۇلۋتوبەدە قالىپ, ءوزى جاس مامان رەتىندە قازالى اۋدانىنا العاش بارعان كەزى ءالى ەستە. جاڭا قونىستا دا وزگە ەتنوستار جەتەرلىك ەكەن, بىراق ءبارى قازاقشا سويلەگەندە جەرگىلىكتى جۇرتتىڭ ءوزىن جاڭىلدىراتىنداي. ستانساداعى №16 مەكتەپتە الدىمەن ەڭبەك جانە سىزۋ ساباعىنان ءدارىس بەردى. سودان سوڭ دەنە شىنىقتىرۋ ءپانىنىڭ مۇعالىمى بولدى. كەيىن جوعارى وقۋ ورنىندا ءبىلىمىن جالعاستىرىپ, تاريح ءپانى مۇعالىمى ماماندىعىن الدى. وسى مەكتەپتى باسقاردى.
– ءبىز قازاق حالقىنا بورىشتارمىز. جاسىڭ كەلگەن سايىن بەيبىت ءومىردىڭ باعاسىن بىلە تۇسەدى ەكەنسىڭ, وندايدا باياعى «قازاقتاردى سىيلاڭدار, ءبىزدىڭ ءتىرى جۇرگەنىمىز, سەندەردىڭ اماندىقتارىڭ وسى باۋىرمال ۇلتتىڭ ارقاسى» دەيتىن اتالارىمىزدىڭ وسيەتى ەسكە تۇسە كەتەدى. ءبىز دە قازىر جاستارعا وسىنى ءسات سايىن ايتىپ وتىرامىز, – دەيدى كەيىپكەرىمىز.
قازىر ء«بىز ءشيننىڭ شەكپەنىنەن شىققانبىز» دەگەندى ماقتانىشپەن ايتاتىن شاكىرتتەرى كوپ. ولاردىڭ ءبىرى شاكەن ايمانوۆ اتىنداعى كينوستۋديا پروديۋسەرى, ءتالىمىن كورگەندەر اراسىندا دارىگەر, گاز سالاسىنىڭ بىلىكتى مامانى, ەكونوميست تە بار. وسىدان ءتورت جىل بۇرىن 80 جاسقا تولعان مەرەيتويىن اتاپ وتكەندە الەمنىڭ ءار قيىرىنان جينالعان وقۋشىلارى ۇستازدارىنىڭ مەرەيىن كوتەردى.
ۇزاق جىلعى پەداگوگيكالىق قىزمەتى جوعارى باعالانىپ, «قازاق كسر-ءى ءبىلىم بەرۋ ءىسىنىڭ ۇزدىگى» اتاندى. بىرنەشە مارتە رەسپۋبليكالىق پەداگوگيكالىق وقۋلارعا قاتىسىپ, ءوزىنىڭ باي تاجىريبەسىمەن ءبولىستى. ۆيلوري ۇستاز ءۇشىن ەڭ ۇلكەن ماراپات 2014 جىلى قحا قىزمەتىن دامىتۋدا قوسقان ۇلەسى ءۇشىن ەلباسىنان العان «قۇرمەت گراموتاسى» بولدى.
قارىنداسى قىزىن قازاق جىگىتىنە ۇزاتاتىن ويى بارىن ايتقاندا جيەنىنىڭ اۋلەتتىڭ دارحان كوڭىل ۇلتپەن دوستىعىن بەكىتە تۇسكەنىن ماقۇل كورگەن كەيىپكەرىمىز قۋانا كەلىسىپتى. سوناۋ جۇرەگى جالىن اتىپ تۇرعان جاس كەزىندە ءشىنالى بايدىلداەۆ, قالاپبەرگەن ءپىرىمجانوۆ, اسىلبەك جۇماباەۆ سەكىلدى ازاماتتارمەن قاتار ءجۇردى. سول سىيلاستىق جىلدار وتە ارادان قىل وتپەيتىن دوستىققا اينالدى.
– ءبىزدىڭ وبلىسقا كوبىنە كورەي رەسپۋبليكاسىنان ارناۋلى ورتالىقتار كەلىپ, كىشىگىرىم كەزدەسۋلەر ءوتىپ تۇرادى. سونداي كەزدەسۋدىڭ بىرىندە ماعان كورەي ءجۋرناليسى: ء«سىز وڭتۇستىك كورەيانىڭ حالقىن جاقسى كورەسىز بە, الدە سولتۇستىك كورەيا جۇرتىن جاقىن تارتاسىز با؟» دەگەن ساۋال قويدى. وعان مەن «بەيبىتشىلىكتى جاقسى كورەمىن» دەپ قىسقا جاۋاپ بەردىم. بايقايمىن, مەنىڭ جاۋابىما كوزىن اشقالى ءبىر ۇلتتىڭ ەكىگە ءبولىنىپ, سان جىلدار بويى قىرقىسىپ كەلە جاتقانىن كورىپ وسكەن قانداسىمنىڭ كوڭىلى تولماي كەتتى. قازاق جەرىندە ءومىر سۇرگەن كورەيلەردىڭ وي-ساناسى ولاردان باسقاشا ەكەندىگىنە وسى جولى كوزىم انىق جەتتى. ويتكەنى, ءبىز دوستىق مەكەنىنىڭ تۇرعىنىمىز, – دەيدى اقساقال.
جاس كەزىندە ەل ىشىندەگى اقساقالدارعا سالەم بەرە ءجۇرىپ تالاي اڭگىمە تىڭداعانى بار. سوندايدا قارتتار ءتالىمدى ءسوزىن «ادام باسىنا باقتىڭ قونعانىن بىلمەيدى, ۇشقانىن بىلەدى» دەپ تۇيىندەيتىن. ىنتىماق پەن بەرەكەنى ەرتە جۇرەتىن سول باق قازىر قازاق ەلىندە. تاۋەلسىز ەلدىڭ باستى تابىسى دا وسى. ۆيلوري اقساقال وسى تاۋداي تابىسقا تىرناقتاي بولسا ۇلەس قوسقانىن ماقتان ەتەدى.
قىزىلوردا
