ماڭىزدى شاراعا ارنايى كەلىپ قاتىسقان وبلىس اكىمى جەڭىس قاسىمبەك جيىلعان قاۋىمدى مەرەكەمەن قۇتتىقتاپ, بۇل كۇننىڭ وسىدان ءتورت جىل بۇرىن تۇڭعىش پرەزيدەنت نۇرسۇلتان نازارباەۆتىڭ باستاماسىمەن قۇرىلعانىن ەسكە سالدى.
بەلگىلى مەتسەنات, «رۋحاني جاڭعىرۋ» باعدارلاماسىن جۇزەگە اسىرۋ بويىنشا وبلىس اكىمىنىڭ شتاتتان تىس كەڭەسشىسى, وبلىستىق ءماسليحاتتىڭ دەپۋتاتى بەكزات التىنبەكوۆ جالعىزباستى انا, ءى توپتاعى مۇگەدەك ارايلىم الدامقۇلوۆاعا ەكى بولمەلى پاتەردىڭ كىلتىن تابىس ەتتى.
– مەن #جاقسىلىقجاساپجارىسايىق چەلەندج ەستافەتاسىن نۇر-سۇلتان قالاسىنىڭ كاسىپكەرلەرىنەن قابىلداپ الدىم. بۇل چەللەندج مۇقتاج جاندارعا پاتەر سىيلاۋدى كوزدەيدى. قازاقستاندا ءاربىر وتباسىنىڭ ءوز باسپاناسى بولۋى ءتيىس. ءبىز, مەتسەناتتار مەن كاسىپكەرلەر بۇعان قول ۇشىن بەرۋىمىز كەرەك. بۇل ءبىزدىڭ قوعام الدىنداعى بورىشىمىز, – دەگەن كاسىپكەر اتالعان چەلەندجدى بالقاش قالاسىنىڭ كاسىپكەرلەرىنە جولدادى.
سونىمەن قاتار, اتالعان مەرەكەدە «ككك «ينجينيرينگ» جشس ديرەكتورى الەكساندر كيك بەلگىلى بوكسشى, ەڭبەك سىڭىرگەن سپورت شەبەرى ابىلايحان جۇسىپوۆكە ءبىر بولمەلى پاتەردىڭ كىلتىن سىيلادى. ال قازاقستان حالقى اسسامبلەياسىنىڭ مۇشەسى شاميل وسين سپورتشىعا تۇرمىستىق تەحنيكا ساتىپ الۋعا 700 مىڭ تەڭگەگە سەرتيفيكاتىن تابىس ەتتى.
قازاقستان حالقى اسسامبلەياسىنىڭ اتىنان «ۆايناح» وبلىستىق چەشەن-ينگۋش ۇلتتىق-مادەني ورتالىعىنىڭ توراعاسى ۋۆايس دجاناەۆ قۇتتىقتاپ, بالالار ءۇيىنىڭ تاربيەلەنۋشىسى ەليزاۆەتا سەدىشەۆاعا قازاقتىڭ ۇلتتىق مۋزىكالىق اسپابى – قوبىزدى سىيلادى.
– حح عاسىردىڭ ورتا تۇسىندا ونداعان ۇلت پەن ۇلىستىڭ بالاسى قازاق دالاسىنا كۇشتەپ جەر اۋدارىلدى. وسى قيىن-قىستاۋ زاماندى باستان وتكەرگەندەر قازاق حالقىنىڭ گۋمانيزمىن, جاناشىرلىعىن ەشقاشان ۇمىتپايدى, ول تۋرالى ۇنەمى ايتىپ جۇرەدى. وسى كومەكتىڭ ارقاسىندا ءبىزدىڭ اتا-بابامىز امان قالدى, بۇگىن كۇندە ءوسىپ-ءونىپ, جاڭا ۇرپاق تاربيەلەنۋدە, – دەگەن ۋۆايس دجاناەۆ قولىن كەۋدەسىنە قويىپ, ءوزىنىڭ قازاق حالقىنا دەگەن العىس سەزىمىن جەتكىزدى.
ءىس-شارانىڭ سوڭىنا تامان سلامبەك تاۋەكەلدىڭ «جەرۇيىق» اتتى ءفيلمى كورسەتىلدى.
قاراعاندى وبلىسى
