ەكونوميكا • 28 اقپان، 2020

لوندوندا ەلىمىزدىڭ جاڭا ينۆەستيتسيالىق مۇمكىندىكتەرى تانىستىرىلدى

9 رەتكورسەتىلدى

قازاقستان رەسپۋبليكاسى يندۋستريا جانە ينفراقۇرىلىمدىق دامۋ مينيسترلىگى «قازاقستانداعى تاۋ-كەن ءىسى: روۋد-شوۋ 2020» شاراسى اياسىندا 2020 جىلعى 27 اقپاندا لوندوندا الەۋەتتى ينۆەستورلارعا ەلىمىزدىڭ تاۋ-كەن سالاسىنىڭ ينۆەستيتسيالىق مۇمكىندىكتەرىن تانىستىردى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.

ءىس-شارا قازاقستان رەسپۋبليكاسىنىڭ ۇلىبريتانياداعى ەلشىلىگىنىڭ قولداۋىمەن بريتانيانىڭ «British Expertise International» تانىمال ساۋدا ۇيىمى الاڭىندا ۇيىمداستىرىلىپ، ەلىمىزدىڭ پەرسپەكتيۆالىق ينۆەستيتسيالىق جوبالارى بويىنشا بريتاندىق كومپانيالارمەن ءوزارا ءتيىمدى ىنتىماقتاستىقتى دامىتۋعا ارنالدى.

ءىس-شارادا الەۋەتتى ينۆەستورلارعا قازاقستاننىڭ جەر قويناۋىن پايدالانۋ سالاسىنداعى سوڭعى ۇردىستەر، زاڭنامالىق رەفورما جانە ينۆەستيتسيالىق مۇمكىندىكتەر جونىندە مالىمەتتەر ۇسىنىلدى. جينالعاندارعا قازاقستاننىڭ ۇلىبريتانياداعى ەلشىسى ەرلان ىدىرىسوۆ، قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ ۆيتسە-ءمينيسترى رۋسلان بايميشەۆ، «تاۋ-كەن سامۇرىق «ۇك» اق توراعاسى قانات قۇدايبەرگەن جانە قازاقستان بيزنەس-قاۋىمداستىعى وكىلدەرى ءسوز سويلەدى. بايانداماشىلار قازاقستاندىق نارىقتىڭ كەلەشەگى، ينۆەستورلار ءۇشىن جاڭا مۇمكىندىكتەر، تاۋ-كەن سالاسىنداعى وزگەرىستەر مەن يننوۆاتسيالار، سونداي-اق قازاقستاننىڭ گەولوگيالىق بارلاۋدا يننوۆاتسيالىق تەحنولوگيالاردى ەنگىزۋ جەتىستىكتەرى تۋرالى ايتىپ بەردى.

رۋسلان بايميشەۆ مينيسترلىكتىڭ تاۋ-كەن سالاسىنىڭ ينۆەستيتسيالىق احۋالىن جاقسارتۋعا باعىتتالعان نەگىزگى باستامالارى، سونداي-اق، «جەر قويناۋى جانە جەر قويناۋىن پايدالانۋ تۋرالى» كودەكستىڭ نەگىزگى جاڭالىقتارى تۋرالى بايانداپ بەردى.  

2018 جىلى «جەر قويناۋى جانە جەر قويناۋىن پايدالانۋ تۋرالى» قازاقستان رەسپۋبليكاسىنىڭ جاڭا كودەكسى كۇشىنە ەندى. ءبىرىنشى ءوتىنىم قاعيداتى، CRIRSCO قورلارىن ەسەپتەۋدىڭ حالىقارالىق جۇيەسى ەنگىزىلدى. گەولوگيالىق اقپاراتقا اشىق قول جەتكىزۋ قامتاماسىز ەتىلدى. مەملەكەتتىك رەتتەۋدىڭ ايقىن جانە اشىق تەتىكتەرى قابىلداندى. قازاقستان جەر قويناۋىن پايدالانۋدىڭ ينۆەستيتسيالىق تارتىمدىلىعى بويىنشا جۇرگىزىلگەن جۇمىس ناتيجەلەرى بويىنشا فرەيزەر ينستيتۋتىنىڭ رەيتينگىسىندە 73-ورىننان 24-ورىنعا (49 پوزيتسياعا) كوتەرىلدى. دۇنيەجۇزىلىك بانكتىڭ Doing Business رەيتينگىسىندە قازاقستان الەمنىڭ 190 ەلىنىڭ اراسىندا 25-ورىندا. سەكتوردا Rio Tinto، Glencore، Illuka، Polymetal جانە ت.ب. سياقتى الەمدىك برەندتەر تابىستى جۇمىس ىستەۋدە» دەدى رۋسلان بايميشەۆ.

ۇلىبريتانيا حالىقارالىق ساۋدا مينيسترلىگىنىڭ وكىلى رولاند حانىم: «مەنىڭ ويىمشا، قازاقستان حالىقارالىق ينۆەستورلار ءۇشىن بارىنشا تارتىمدى ەلگە اينالۋدا. تاۋ-كەن سەكتورىنداعى جاڭا كودەكس، تاياۋ ارادا قابىلدانادى دەپ وتىرعان جاڭا ەكولوگيالىق كودەكس، CRIRSCO ستاندارتتارى مەن ءوندىرۋشى سالالاردىڭ اشىقتىعى باستاماسىنىڭ قولدانىلۋى قازاقستاندى بيزنەس جۇرگىزۋ ءۇشىن تارتىمدى مەملەكەت ەتەدى».

بريتاندىق كومپانيالار قازاقستاندا جۇرگىزىلىپ جاتقان رەفورمالاردى وڭ قابىلداپ، گەولوگيالىق جانە تاۋ-كەن سالاسىنداعى ىنتىماقتاستىقتى كەڭەيتۋگە جانە تەرەڭدەتۋگە مۇددەلىلىك تانىتىپ، سالاداعى قازاقستاندىق الەۋەتتى تولىق جۇزەگە اسىرۋعا قاتىسۋعا دايىن ەكەندەرىن جەتكىزدى.

 

سوڭعى جاڭالىقتار

ۇقساس جاڭالىقتار